جالپى, ءبىزدىڭ وبلىس جونىندەگى ماعلۇماتتارعا قاسىم-جومارت كەمەل ۇلىنىڭ وتە قانىق ەكەنىن بايقادىق. ەرتىس-بايان وڭىرىندە تۋىپ, كەيىن تۇتاس الاش ەلىنە قىزمەت ەتكەن تاريحي تۇلعالار مەن مادەنيەت قايراتكەرلەرىن, وتاندىق عىلىم مەن ءبىلىم سالالارىنا ولشەۋسىز ۇلەس قوسقان عالىمدارىمىزدى تىزبەكتەپ, ءماشھۇر ءجۇسىپ, مۇسا شورمانوۆ, كوپەەۆ, قانىش ساتباەۆ سەكىلدى ءبىرتۋار پەرزەنتتەرىمىزدىڭ بارشا قازاق ەلى ءۇشىن ماقتانىش ەكەنىن جەتكىزدى. مۇنى ەستىگەندە ەرەكشە قۋانىپ, مەرەيىمىز كوتەرىلىپ قالدى.
پاۆلودار وبلىسىن دامىتۋدىڭ باسىمدىقتارى تۋرالى ايتقاندا بەس نەگىزگى باعىتىمىزدى ايقىنداپ بەرگەنىنە كۋا بولدىق. ولار – يندۋستريالىق-يننوۆاتسيالىق الەۋەتتى نىعايتۋ, ەكولوگيالىق ماسەلەلەردى شەشۋ, سۋمەن قامتاماسىز ەتۋ ماسەلەسى, ءوڭىردىڭ ينفراقۇرىلىمىن دامىتۋ, كرەاتيۆتى يندۋستريا مەن ءتۋريزمدى دامىتۋ. بۇل باسىمدىقتاردىڭ قاي-قايسىسىن بولماسىن جۇزەگە اسىرۋ ءتۇپتىڭ تۇبىندە ساپالى ءبىلىم بەرۋگە, وتانسۇيگىش جاس ۇرپاقتى قالىپتاستىرۋ ماسەلەلەرىنە بارىپ تىرەلەتىنى ايقىن. وسى رەتتە پرەزيدەنت بيىلعى جولداۋىندا جاريالاعان «جايلى مەكتەپ» ۇلتتىق جوباسى اياسىندا پاۆلودار وبلىسىندا الداعى 3 جىلدا 10 مەكتەپ سالىناتىنىن ايتىپ, زامانعا ساي وقۋ وردالارىندا ءبىلىم يگەرگەن جۇرتتىڭ مەرەيى ۇستەم بولاتىنىنا تاعى ءبىر مارتە ءمان بەردى. ولاردىڭ قۇرىلىسىن ساپالى جۇرگىزۋ – وزىمىزگە سىن.
بارىمىزگە بەلگىلى, كوكتەمدە قار ەرىسە, جازعى مەزگىلدە جاڭبىر جاۋسا پاۆلودار قالاسىنىڭ كوشەلەرى سۋعا كولكىپ, كىشىگىرىم ۆەنەتسياعا اينالىپ شىعا كەلەدى. شاھاردا نوسەر كارىزى جۇيەسىنىڭ جوقتىعى تۇرعىنداردى قيىندىققا تىرەپ وتىر. جىلدار بويىنا ساعىزشا سوزىلعان ماسەلەنى شەشۋدى پرەزيدەنت ۇكىمەتكە جۇكتەدى. بىلۋىمىزشە, جاڭبىر سۋىنا ارنالعان كارىز جۇيەسىنىڭ جوباسى دايىن كورىنەدى. ونىڭ قۇرىلىسى اۋەلى سولتۇستىك-باتىس بولىگىندە جۇرگىزىلىپ, ەكىنشى پاۆلودار شاعىن اۋدانىن قامتيدى. ودان سوڭ ەكىنشى كەزەڭدە سولتۇستىك-باتىس اۋماقتا جۇرگىزىلىپ, زەلەنسترويدىڭ درەناجدىق جۇيەسىن ومىرشەڭ ەتەدى. سوڭىنان قالامىزدىڭ وزگە بولىكتەرى دە قوسىلادى دەپ كۇتىلۋدە. وسى جۇمىستار كەلەسى جىلى باستالىپ كەتەتىنى ءبىزدى ايرىقشا قۋانتتى. سەبەبى كۇن جىلى مەزگىلدە كولكىگەن سۋدان كوشەلەرىمىزدە كولىك كەپتەلىسى ورىن الىپ, جەر ۇيلەردى سۋ باساتىنى بار. بۇل ماشاقاتتان تاياۋداعى جىلداردا قۇتىلاتىنىمىز انىق.
ءار جاز سايىن مازامىزدى الاتىن شىبىن-شىركەيگە قارسى كۇرەستىڭ دە جەرگىلىكتى حالىقتىڭ كوڭىلىنەن شىقپاي وتىرعانىن پرەزيدەنتىمىز جاقسى بىلەدى ەكەن. مىنا ەرتىس بويىن جايلاعان كوپ ەلدى مەكەندەر, سونىڭ ىشىندە پاۆلودار, اقسۋ قالالارى مەن بىرنەشە اۋدان جۇرتشىلىعى جاندىكتەردەن قاتتى زيان شەگىپ كەلەدى. ولاردى جويۋعا ميللياردتاعان تەڭگە قاراجات بولىنگەنىمەن, ناتيجەسىن ەل كورە الماۋدا. مەملەكەت باسشىسى وسى ماسەلەنى رەتتەۋدى, وعان عىلىمي ءادىس-تاسىلدەردى ەنگىزىپ, شەتەلدىك تاجىريبەنى تارتۋدىڭ ۋاقىتى جەتكەندىگىن ايتتى. راسىندا, ءبىزدىڭ وڭىردە شىبىن-شىركەيگە قارسى كۇرەس شارالارى تەك بيولوگيالىق جانە حيميالىق وڭدەۋمەن عانا شەكتەلىپ كەلە جاتىر.
بۇدان باسقا وبلىس ورتالىعىنىڭ ىرگەسىندەگى بىلقىلداق كولىندە جينالىپ قالعان سىناپتى قاۋىپسىز ەتۋدىڭ جولدارىن ىزدەستىرۋگە, ۇلكەن زاۋىتتارعا زامانعا ساي سۇزگىلەر ورناتۋعا قاتىستى تاپسىرمالار بەرىپ, ەكىباستۇزداعى كومىر كەنىشتەرىنەن شىققان ۇيىندىلەر مەن ەلەكتر ستانسالارىنداعى كۇل توگەتىن ورىنداردىڭ ماسەلەسىن شەشۋگە ايرىقشا كوڭىل بولگەنى پرەزيدەنتىمىزدى وڭىردەگى ەكولوگيالىق تۇيتكىلدەر ايرىقشا الاڭداتاتىنىن اڭعارتسا كەرەك. ءوندىرىس پەن قورشاعان ورتا اراسىنداعى تەڭگەرىمنىڭ ساقتالۋىن قامتاماسىز ەتۋ وتە كوپ قاراجاتتى قاجەت ەتەتىنىن جاقسى تۇسىنەمىز. وسى ورايدا قاسىم-جومارت توقاەۆتىڭ كەزدەسۋدە بەلگىلەگەن ناقتى مىندەتتەرى مەن ۇسىنىستارى جەرگىلىكتى الپاۋىت كاسىپورىنداردىڭ باسشىلارىن ويلاندىرادى دەپ ەسەپتەيمىز.
ەركە ەرتىستىڭ جاعاسىندا وتىرىپ اۋىزسۋعا جارىماعان اۋىلدار جايىندا اڭگىمە قوزعاۋدىڭ ءوزى ىڭعايسىز. كەزىندە ەرتىس اۋدانىندا – بەلوۆود, ماي اۋدانىندا ماي توپتىق سۋ قۇبىرى جۇيەلەرى جاقسى جۇمىس ىستەپ, جەرگىلىكتى جۇرتتى ساپالى اۋىزسۋمەن تۇراقتى قامتىدى. توقىراۋ كەزەڭىندە ولاردىڭ بارلىعى قۇردىمعا كەتكەنىمەن, سوڭعى جىلدارى بىرتىندەپ قالپىنا كەلتىرىلىپ جاتقانىن بايقايمىز. الايدا اۋىلعا بارعاندا كوپ تۇرعىندار جاڭادان سالىنعان سۋمەن قامتۋ جۇيەلەرىنىڭ دۇرىس جۇرگىزىلمەگەنىنە, مەردىگەرلەر قۇرىلىستى ساپاسىز تاپسىراتىنىنا ءجيى شاعىمدانادى. وسىنداي كەمشىلىكتەردى وبلىس باسشىلىعى مەن جاۋاپتى ورگاندار دەر ۋاقىتىندا انىقتاپ, ۇكىمەتكە جەتكىزبەي شەشىپ تاستاپ وتىرۋى كەرەك دەپ سانايمىن. نەگىزى سوڭعى جىلدارى اۋىل حالقىنىڭ تىرشىلىك نارىنە قولجەتىمدىلىگى ايتارلىقتاي وسكەنىمەن, كەيبىر جۇرگىزىلگەن جوبالاردىڭ شيكىلىگى كوڭىلگە قاياۋ تۇسىرەدى.
اۋىلدا تۋىپ-وسكەندىكتەن, قالادا تۇرساق تا ەلدىڭ جاعدايىنا الاڭداپ وتىرامىز. قازىر, مىنە, شارۋالار الا جازداي ەڭبەگىنىڭ جەمىسىن كورەتىن شاق. وكىنىشكە قاراي, كوپ جەردە اۋىلشارۋاشىلىق ونىمدەرىنىڭ باعاسىن دەلدالدار تىم كوتەرىپ جىبەرەتىنى, ءوزىمىزدىڭ كوكونىسىمىز بەن كارتوبىمىز وڭدەلمەي, سىرتقا ارزان باعاعا توننالاپ ساتىلىپ كەتەتىنى قىنجىلتادى. وڭىرگە وڭدەۋ ونەركاسىپتەرى اۋاداي قاجەت. وسى ماسەلەلەردىڭ ءتۇيىنىن تارقاتۋعا قاسىم-جومارت كەمەل ۇلى كوڭىل بولسە ەكەن دەگەن تىلەگىمىز بار.
كەزدەسۋ سوڭىندا الداعى پرەزيدەنتتىك سايلاۋدىڭ ءادىل ءارى اشىق وتەتىنىنە مەملەكەت باسشىسى رەتىندە كەپىلدىك بەرە كەلىپ, ەلىمىزدە جۇرگىزىلىپ جاتقان رەفورمالاردىڭ الەۋمەتتىك نەگىزىن قالىپتاستىراتىن قوعامدىق-ساياسي كۇشتەردىڭ ءىرى كواليتسياسىنىڭ اتىنان سايلاۋعا قاتىسقانىم دۇرىس بولادى دەپ تۇيىندەگەنى دە پرەزيدەنتىمىزدىڭ كەمەل ويلاي بىلەتىندىگىن دالەلدەسە كەرەك. مەنىڭشە, تۋعان حالقىنىڭ جاعدايىمەن ساناسقان ەل باسشىسى ءبىر عانا ساياسي كۇشتىڭ, ءبىر عانا پارتيانىڭ باعىت-باعدارىمەن جۇرمەۋى كەرەك. سوندىقتان ءوز باسىم قاسىم-جومارت توقاەۆتىڭ بۇل ۇستانىمىن, ونىڭ ءبىزدىڭ وبلىسقا قاتىستى ايتقان باسىمدىقتارى مەن تاپسىرمالارىن تولىق قولدايتىنىمدى ايتقىم كەلەدى.
عالىمبەك جۇماتوۆ,
جازۋشى, «قۇرمەت» وردەنىنىڭ يەگەرى
پاۆلودار وبلىسى
