تاۋەلسىزدىك العاننان بەرى حالىقتى ۇدايى مازالاپ كەلە جاتقان كۇردەلى ماسەلەنىڭ ءبىرى – جەر ماسەلەسى. وسى جيىندا بۇل ماسەلەگە باسا نازار اۋدارىلدى, بايتاق جەرىمىزدى ءتيىمدى پايدالانۋ قاجەتتىگى – بۇگىنگە پارىز, كەلەشەككە امانات ەكەنى ايتىلدى. ايتىلىپ قانا قويعان جوق, وتكەننىڭ قاتەلىگىن تۇزەۋ سوزباقتاۋعا كەلمەيتىن مىندەت ەكەنى العا تارتىلدى. بۇل مىندەتتى تەزدەتە شەشۋ ءۇشىن كەشەگى ۋاقىتتا لاتيفۋنديستەرگە زاڭسىز بەرىلگەن جەرلەر قايتارىلىپ, شارۋاشىلىق اشۋعا, كاسىپپەن اينالىسۋعا مۇددەلى ازاماتتارعا ءادىل جولمەن قايتا ءبولىنۋ قاجەتتىگى ماقسات ەتىپ قويىلدى.
ەلدەگى ءىرى ءوندىرىس ورىندارىنا دەگەن حالىقتىڭ كوزقاراسى دا ءارتۇرلى. ونىڭ وزىندىك سەبەپتەرى دە از ەمەس. سونىڭ ىشىندە كوپتىڭ كوڭىلىنە كۇمان تۋدىراتىن جاعداي الپاۋىت كومپانيالاردىڭ ەلمەن ساناسپاي, بۇگىنگە دەيىن دەربەس مەملەكەت سياقتى بولىپ كەلگەنى ەدى. پرەزيدەنت نازارىنان بۇل پروبلەما قالىس قالماي, وسى باعىتتا قولعا الىناتىن شارالار ەلمەن كەزدەسۋ بارىسىندا ناقتى كورسەتىلدى. مەملەكەت باسشىسى ەلىمىزدە جۇمىس ىستەيتىن ىرگەلى ءوندىرۋشى كومپانيالاردىڭ ءبارى ەندىگى ۋاقىتتا مەملەكەت تاراپىنان ءجىتى باقىلاۋدا بولاتىنىن انىقتاي جەتكىزدى. مەملەكەت مۇددەسىن قۇرمەتتەۋ, ءوندىرىستى جاڭعىرتۋ, ەكولوگيانى قورعاۋعا نازار اۋدارۋ, ەڭبەك زاڭدىلىعىن ساقتاۋ – بارشاعا ورتاق تالاپ ەكەنىن قاداپ ايتتى.
لوگيستيكا – ەكونوميكانىڭ كۇرەتامىرى. ەل ىشىندەگى جولدار جاقسارماي, ىستە بەرەكە بولمايدى. سول سەبەپتى ق.توقاەۆ ءوڭىردىڭ قارقىندى دامۋىنا سەرپىن بەرۋى ءبىرىنشى كەزەكتە جول ماسەلەسىنە ەرەكشە ءمان بەرۋ كەرەكتىگىنە توقتالدى. ورتالىق-وڭتۇستىك كولىك ءدالىزىنىڭ سالىنۋ قارقىنى باياۋ ەكەنىن ەسكەرتتى, جۇمىستى شيراتۋ قاجەتتىگىنە نازار اۋداردى.
ۇكىمەتكە قاراعاندى – بالقاش جانە بالقاش – بۋرىلبايتال تاس جولىن الداعى جىلى تولىق اياقتاۋدى, ساپاسىن قاتاڭ باقىلاۋدى مىندەتتەدى. سونداي-اق, قاراعاندى – جەزقازعان, قاراعاندى – قارقارالى كۇرە جولدارىن جوندەۋ جۇمىستارىنا كەلەر جىلى كىرىسۋ قاجەتتىگىن تاپسىردى.
بۇل – قاي-قايسى دا حالىق كوڭىلىنەن شىعاتىن, كوپتەن شەشىمىن كۇتكەن ماسەلەلەر. پرەزيدەنتتىڭ كەزدەسۋ بارىسىندا ايتقان سوزدەرىنە سەنىممەن قاراپ, ءۇمىتىن ۇكىلەپ وتىرعان ەلدىڭ ەندىگى ويى وسى جۇمىستاردىڭ ءوز ۋاقىتىندا ساپالى ورىندالۋى.
مەملەكەت باسشىسىنىڭ تاپسىرمالارىن ىسكە اسىرۋ ەنجارلىقتى كوتەرمەيدى. ەندەشە, ايماقتاردىڭ ەڭسەسى بيىكتەي بەرۋى ءۇشىن ءبىر كىسىدەي جۇمىلا ەڭبەك ەتەيىك.
امانجول التاەۆ,
ءماجىلىس دەپۋتاتى
