ساياسات • 07 قازان، 2022

جۇدىرىقتاي جۇمىلۋ ەلدى جىگەرلەندىرەدى

51 رەت كورسەتىلدى

«Amanat» پارتياسىنىڭ تاريحي سەزىندە ەلىمىزدىڭ تۇكپىر-تۇكپىرىنەن 1 200 دەلەگات باس قوسىپ، الداعى پرەزيدەنت سايلاۋىنا ءوز ۇمىتكەرىمىز – قاسىم-جومارت كەمەل ۇلى توقاەۆتى ۇسىندىق. اماناتتىقتار بۇل باستامانى ءبىراۋىزدان قولدادى.

سونىمەن قاتار سەزدە پارتيامىزدىڭ جاڭا ساياسي تۇعىرناماسىن قابىلدادىق. تۇعىرناما – ۇزاقمەرزىمدى ءارى ستراتەگيالىق قۇجات. پارتيا الداعى قىزمەتىندە وسى ۇستانىمداردى باسشىلىققا الادى. باستى قاعيداسى – ادام، قوعام جانە مەملەكەت. تۇعىرنامادا قازاقستاندىقتاردىڭ مۇڭ-مۇقتاجى كورىنىس تاپقان. ۇلت مۇددەسى باستى نازاردا تۇر. ءبىز ناقتى ىستەرگە، ناقتى جوبالارعا باسىمدىق بەرەمىز.

بارشاڭىزعا ءمالىم، ءبىزدىڭ پارتيادان باسقا دا بىرقاتار ساياسي ۇيىمدار مەن بىرلەستىكتەر پرەزيدەنتتىككە مەملەكەت باسشىسى قاسىم-جومارت توقاەۆتىڭ كانديداتۋراسىن ۇسىنىپ وتىر. وسى ورايدا ءبىز سول ساياسي ۇيىمدارمەن بىرلەسىپ، قاسىم-جومارت توقاەۆتى قولداۋ جونىندەگى حالىقتىق كواليتسيا قۇرۋ تۋرالى كەلىستىك. كواليتسيا مۇشەلەرى مەملەكەت باسشىسىنىڭ قاتىسۋىمەن وتكەن فورۋمدا باس قوستىق.

ءبىز پرەزيدەنتتىڭ ستراتەگيالىق باعدارىن قولدايمىز جانە ونىڭ رەفورمالارىن ءارى قاراي ىلگەرىلەتۋگە كۇش سالامىز. حالىقتىق كواليتسيا 20-دان استام رەسپۋبليكالىق قوعامدىق بىرلەستىك پەن ساياسي ۇيىمنىڭ، مىڭنان استام قايراتكەر تۇلعا مەن بەلسەندى ازاماتتىڭ باسىن بىرىكتىرىپ وتىر.

بۇل تاڭداۋ – ەلىمىزدىڭ شىنايى پاتريوتتارىنىڭ، قازاقستاننىڭ بولاشاعىنا بەيجاي قارامايتىن ميلليونداعان ازاماتتاردىڭ تاڭداۋى. ەڭ باستىسى، سايلاۋ قارساڭىندا جەتەكشى ساياسي كۇشتەردىڭ ورتاق ماقسات جولىندا جۇدىرىقتاي جۇمىلۋى ەلدى جىگەرلەندىرەدى. حالقىمىزدىڭ ىنتىماعىن ەسەلەپ ارتتىرا تۇسەدى.

ءبىز وسى قادام ارقىلى دالا دەموكراتياسىنىڭ داستۇرىنە بەرىكتىگىمىزدى كورسەتىپ، وتكەن عاسىرلاردا وردالى ورداباسىدا، قاسيەتتى قاراقۇمدا، ۇلت بەسىگى – ۇلىتاۋدا شاقىرىلعان تاريحي قۇرىلتايلاردىڭ تابيعي ساباقتاستىعىن جالعاپ وتىرمىز.

قازاقتا «تۋىڭ جىعىلماسىن!» دەگەن اتالى ءسوز بار. كوك تۋىمىز – ەلدىكتىڭ، مەملەكەتتىلىكتىڭ باستى نىشانى. مەملەكەت باسشىسى قانداي قيىن-قىستاۋ كەزەڭدە دە ەلدىڭ بايراعىن، مەملەكەتتىڭ تۋىن جىققىزباي ءوز تۇعىرىندا جەلبىرەتىپ كەلەدى.

بارشامىز سول تۋدىڭ استىنا جينالايىق!

 

ەرلان قوشانوۆ،

«Amanat» پارتياسىنىڭ توراعاسى

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار