26 مامىردا اۋدان اكىمى باۋىرجان ايتماعامبەتوۆ پەن تاسقالا اۋىلدىق وكرۋگىنىڭ اكىمى گۇلجان مۇحامبەتقاليەۆا اۋداندىق مادەنيەت ۇيىندە بىرلەسكەن كەزدەسۋ ۇيىمداستىردى. ءىس-شاراعا مەكەمە باسشىلارى, پروكۋراتۋرا, ىشكى ىستەر ورگانى قىزمەتكەرلەرى, دەپۋتاتتار, قوعامدىق ۇيىم وكىلدەرى, اۋىل تۇرعىندارى, زەينەتكەرلەر قاتىستى. جينالعاندار كوكەيلەرىندە جۇرگەن ساۋالىن قويىپ, تۇششىمدى جاۋاپ الدى. اتاپ ايتقاندا, 200 ورىندىق بالاباقشا قۇرىلىسى, كوشەنى جارىقتاندىرۋ, «ازالى انا» ەسكەرتكىشىن جوندەۋ, زيراتقا جەر ءبولۋ, جولداردى قالپىنا كەلتىرۋ, پۋشكين كوشەسىندەگى تابانجولدى قايتا سالۋ سياقتى ماڭىزدى ماسەلەلەر كوتەرىلدى. ال پرەزيدەنتتىڭ جارلىعىندا وسىنداي كەزدەسۋلەردەن كەيىن جەرگىلىكتى اتقارۋشى ورگاندار مەن پروكۋراتۋرا, ىشكى ىستەر ءبولىمى باسشىلىق قۇرامىنان, ءماسليحات دەپۋتاتتارىنان, قوعامدىق كەڭەس مۇشەلەرىنەن جەرگىلىكتى زيالىلارمەن بىرلەسىپ, ازاماتتاردى جەكە قابىلداۋ تالاپ ەتىلەدى.
جالپى, اۋىلداردا جىلدار بويى شەشىمىن تاپپاي كەلە جاتقان كوپ شارۋانىڭ ءبىر ۇشى اۋىل اكىمىنە بارىپ تىرەلەتىنى دە راس. وسى ورايدا بيىلعى جىلدىڭ ءۇشىنشى توقسانىندا وكرۋگ اكىمدەرىنىڭ حالىقپەن كەزدەسۋلەرى جالعاسقان بولاتىن. وكىنىشكە قاراي, وكرۋگ اكىمى گ.مۇحامبەتقاليەۆانىڭ بۇل جولعى كەزدەسۋلەرى كوشەلەردە, اۋلالاردا, ويىن الاڭدارىندا ۇيىمداستىرىلعاندىقتان, ادام از جينالىپ, فورمالدى ءوتتى. سوندىقتان اۋىل اكىمىنە حالىقپەن توقسان سايىنعى كەزدەسۋلەرىنە ايتارلىقتاي ءمان بەرىپ, باسقوسۋلاردى دالادا ەمەس, بارلىق قۇزىرلى ورگاندار باسشىلارىنىڭ قاتىسۋىمەن اۋداندىق دەمالىس ۇيىندە وتكىزسە دەگەن تىلەگىمىز بار. ايتپەسە, بىردە-ءبىر جاۋاپتى قىزمەتكەر توبە كورسەتپەيتىن, ەكى-ءۇش ادام عانا جينالاتىن كەزدەسۋلەردەن نە ءۇمىت, نە قايىر؟
بيسەنباي وتەگەنوۆ,
زەينەتكەر, اۋداندىق قوعامدىق ۇيىم مۇشەسى
باتىس قازاقستان وبلىسى,
تاسقالا اۋدانى
