وعان قوسا, مينيسترلىك بيىل جوعارى وقۋ ورىندارىن ەڭ الدىمەن قابىلداعان ستۋدەنتتەرىنە جاتاقحانا بەرۋگە مىندەتتەدى. بۇل ماسەلەنى مەملەكەت باسشىسى قاسىم-جومارت توقاەۆ حالىققا ارناعان «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا تاعى ءبىر مارتە اتاپ كورسەتىپ, ارنايى تاپسىرمالار بەردى. قازىرگى ۋاقىتتا جەر-جەردە جاتاقحانالار قۇرىلىسى ءجۇرىپ جاتىر.
«كەلەسى ماڭىزدى ماسەلە – ستۋدەنتتەردى جاتاقحانامەن قامتاماسىز ەتۋ. بۇل تۇيتكىلدى شەشۋ ءۇشىن جوعارى وقۋ ورىندارىمەن جانە قۇرىلىس كومپانيالارىمەن مەملەكەت-جەكەمەنشىك سەرىكتەستىك ورناتۋ ءتاسىلىن بارىنشا ەنگىزۋ كەرەك. سونداي-اق بارلىق ماسەلەنىڭ شەشىمىن تابۋدى مەملەكەتتىڭ موينىنا ءىلۋ دۇرىس ەمەس دەپ سانايمىن. سول سەبەپتى, مەملەكەتتەن قاراجات الۋ ءۇشىن جەكەمەنشىك جوعارى وقۋ ورىندارىنىڭ جاتاقحاناسى بولۋى شارت. ارينە, مۇنى وقۋ ورىندارىنان بىرتىندەپ تالاپ ەتكەن ءجون», دەدى پرەزيدەنت جولداۋىندا. بۇگىندە كەيبىر جوعارى وقۋ ورىندارىنىڭ ءوز قاراجاتتارى ەسەبىنەن جاتاقحانا سالۋدى قولعا العانىن اتاپ وتكەن ابزال.
قاراعاندى مەديتسينا ۋنيۆەرسيتەتى سۋ جاڭا جاتاقحانانى جەلتوقسان ايىندا ستۋدەنتتەر يگىلىگىنە تاپسىرادى. توعىز قاباتتى جاتاقحانانى وقۋ ورنى ءوز قاراجاتىنا تۇرعىزۋدا. وندا 400 ورىن بار. قاراعاندى قالاسىنىڭ ورتالىعىندا ورنالاسقان جاتاقحاناعا ارنايى جەر تەلىمى بەرىلگەن.
ستۋدەنتتەردىڭ بۇل ءۇيى زاماناۋي بولادى دەپ كۇتىلۋدە. ءبىر بولمەدە ەكى ورىن. ءار بولمەدە جەكە جۋىناتىن ورىن قاراستىرىلعان. بۇرىنعى جاتاقحانالارداي ورتاق ەمەس.
باسقالاردان اۋىز تولتىرىپ ايتارلىق ارتىقشىلىعى دا از ەمەس. ماسەلەن, تولىقتاي جارىقتاندىرىلعان جاتاقحانا اۋلاسى بار. بۇعان دەيىن جاتاقحانالاردا اۋلا اتىمەن ويلاستىرىلماعانىن ەسكەرسەك, مۇنى ءبىر باسىمدىق دەۋگە تۇرارلىق.
جاتاقحانا اۋماعىندا جاتتىعۋ قۇرال-جابدىقتارىمەن سپورت الاڭى دا جاساقتالادى. عيمارات ىشىندەگى كەڭ سپورت زالى جاستار اراسىنداعى بۇقارالىق سپورتتىڭ دامۋىنا ىقپال ەتە تۇسەرى حاق. بۇدان بولەك جوبادا ستۋدەنتتەردىڭ ءتۇرلى ءىس-شارا وتكىزۋىنە ارنالعان ءماجىلىس زالى ەسكەرىلىپتى. وقۋ زالى, كومپيۋتەرلىك سىنىپ تا ستۋدەنتتەر يگىلىگىنە قىزمەت ەتپەك.
قۇرىلىس مەردىگەرى «كازسترويپودرياد» جشس كومپانياسى جاتاقحانانىڭ قابىرعاسى قالانۋدان باستاپ, تابالدىرىعىنا توسەلەر كىلەمشەگە دەيىن جاۋاپتى. ياعني بۇل كومپانيا قۇرىلىستى سالىپ, تۇگەلدەي جيھازبەن جابدىقتاۋعا دەيىنگى مىندەتتى موينىنا العان. جالپى, جاتاقحانا قۇرىلىسىنىڭ قۇنى – 2 ملرد تەڭگە.
«جاتاقحانا ىسكە قوسىلعاندا وقۋ ورنىنىڭ تۇرعىن ءۇي قورى 3 مىڭنان اسپاقشى. جالپى, ۋنيۆەرسيتەتتە 7 مىڭنان استام ستۋدەنت ءبىلىم السا, ولاردىڭ جايلى دا الاڭسىز تۇرمىسىن وقۋ ورنىنىڭ 6 جاتاقحاناسى قامتاماسىز ەتەدى. بۇل جاتاقحانالارداعى ورىن سانى – 2 761», دەيدى قاراعاندى مەديتسينا ۋنيۆەرسيتەتىنىڭ ءباسپاسوز قىزمەتى.
قاراعاندى وبلىسى
