اباي وبلىسىن قۇرۋ ماسەلەسىندە قاسىم-جومارت كەمەل ۇلىنىڭ ساياسي قارىم-قابىلەتى مەن كورەگەن ديپلوماتقا ءتان قايراتكەرلىك ەڭبەگى جاتىر. شىن مانىندە, 25 جىل ىشىندە سەمەي شىعىس قازاقستاننىڭ قۇرامىندا بولىپ, وزگە قالالار سەكىلدى قۇردىمعا كەتىپ قالعان جوق. ىسكەر ازاماتتار مەن حالىقتىڭ ارقاسىندا شاھارىمىز ءوزىنىڭ بەت-بەينەسىن ساقتاپ قالدى. ءبىراز قيىندىق بولعانى بەلگىلى.
ناۋرىز ايىندا مەملەكەت باسشىسى اباي وبلىسىنىڭ قۇرىلاتىنىن ايتقاندا كەۋدەمىزدى قۋانىش كەرنەدى. سەمەي تۋرالى وي قوزعاعاندا, بىرنەشە ماسەلەنى ءبولىپ ايتار ەدىم. بىرىنشىدەن, تاياۋدا پرەزيدەنت قاسيەتتى تۇركىستان ەلىمىزدىڭ تاريحي-مادەني ورتالىعىنا اينالادى دەپ ايتقان ەدى. راس, كيەلى تۇركىستان بۇل مارتەبەگە ابدەن لايىق. كەيىنگى جىلدارى اتالعان شاھاردا جۇرگىزىلگەن جۇمىستار كوپشىلىكتى تاڭعالدىرىپ وتىر. وڭىرىمىزگە جاساعان ساپارىندا قاسىم-جومارت توقاەۆ جاۋاپتى ورگاندارعا سەمەيدى مادەني-رۋحاني ورتالىققا اينالدىرۋعا بايلانىستى تاپسىرما بەردى. جاسىراتىنى جوق, مۇنى ىسكە اسىرۋ ءۇشىن قوماقتى قاراجات پەن قاجىرلى ەڭبەك قاجەت. ونىڭ بارلىعى الداعى ۋاقىتتا جۇزەگە اسىرىلادى دەپ ويلايمىز.
پرەزيدەنت جەرگىلىكتى حالىقپەن كەزدەسۋ كەزىندە ءوڭىردى دامىتۋعا بايلانىستى ورامدى ويلارى مەن ىلكىمدى باستامالارىن ورتاعا سالدى. ايتالىق, جاڭادان جىلۋ ەلەكتر ورتالىعى مەن زامان تالابىنا ساي كوپىر سالۋ, ابدەن توزىعى جەتكەن ينجەنەرلىك ينفراقۇرىلىمدى جاڭارتۋ – سەمەيدە ۇزاق جىلدان بەرى لايىقتى شەشىمىن تابا الماي جۇرگەن وزەكتى ماسەلەلەردىڭ ءبىرى.
عالىم بولعاندىقتان, اسىرەسە عىلىم مەن بىلىمگە بايلانىستى ايتقان باستامالارى كوڭىلگە ۇلكەن ءۇمىت ۇيالاتىپ وتىر. ونىڭ ىشىندە شەتەلدىك ىرگەلى ۋنيۆەرسيتەتتەردىڭ بولىمشەلەرىن قالامىزدا اشۋ جونىندەگى باستاما قۇپتارلىقتاي. عىلىمعا جاستاردى كوپتەپ تارتۋ بويىنشا پرەزيدەنت بىرقاتار تاپسىرما جۇكتەدى. بۇل باعىتتا ءبىزدىڭ ۋنيۆەرسيتەت جۇمىستى باستاپ كەتكەنىن ايتا كەتكەن ورىندى. سونداي-اق مەملەكەت باسشىسى سەمەيدە IT-مەكتەپتەردى اشۋدىڭ ماڭىزدىلىعىنا توقتالدى. جاڭا ونەركاسىپ ورىندارى مەن زامان تالابىنا ساي مەديتسينالىق ورتالىقتاردى اشۋعا بايلانىستى جاقسى جاڭالىقتار دا ايتىلدى.
بۇدان بولەك, قازىر الەمدە قالىپتاسقان كۇردەلى گەوساياسي احۋالعا دا توقتالىپ, مەملەكەت باسشىسى ورتاق شاڭىراعىمىز بىرلىگى مەن ىنتىماعى جاراسقان – قازاقستانداعى بەيبىت ءومىر مەن تۇراقتىلىقتى ساقتاۋدىڭ قانشالىقتى ماڭىزدى ەكەنىنە نازار اۋداردى. راسىمەن دە, پاندەميادان ەندى ايىعىپ كەلە جاتقاندا جاھانداعى جاعداي الاڭداتارلىقتاي. الىسقا بارماي-اق, كورشىلەس رەسەي مەن ۋكراينانىڭ اراسىنداعى, سونداي-اق ازەربايجان مەن ارمەنيانىڭ اراسىنداعى جانە باۋىرلاس قىرعىزستان مەن تاجىكستان اراسىنداعى داعدارىس الەمنىڭ قانشالىقتى نازىك ەكەنىن بايقاتىپ وتىر. سوندىقتان ەلىمىزدەگى بەرەكە-بىرلىكتى ساقتاۋ قازىر اسا ماڭىزدى.
سونداي-اق پرەزيدەنت مۇحتار اۋەزوۆ پەن قايىم مۇحامەدحانوۆقا ارنالعان «ۇستاز بەن شاكىرت» ەسكەرتكىشىن اشتى. بۇنى تەك مۇحتار مەن قايىمعا عانا ارنالعان كوركەم كومپوزيتسيا دەپ قابىلداماعان ءجون. بۇل تۇتاستاي ءبىلىم بەرۋ سالاسىندا قىزمەت ەتىپ كەلە جاتقان ۇستازدار مەن شاكىرتتەرگە كورسەتىلگەن قۇرمەت دەپ قابىلدادىق. مەملەكەت باسشىسىنىڭ وڭىرگە ساپارى جەمىستى بولدى دەپ ويلايمىن. الداعى ۋاقىتتا قاسىم-جومارت توقاەۆ ايتقان نۇسقاۋلىقتار ءتيىمدى جۇزەگە اسىرىلسا, وندا اباي وبلىسى گۇلدەنىپ, وركەندەي تۇسەدى دەگەن سەنىمىمىز مول.
اراپ ەسپەنبەتوۆ,
فيلولوگيا عىلىمدارىنىڭ دوكتورى, پروفەسسور,
اباي وبلىسى
