سىردا دا ۇلى ءانشىنى ۇلىقتاۋ بىلتىردان باستاۋ العان. قازالىداعى بارلىق مادەني ءىس-شارا كىرىسپەسى باعلانوۆامەن بايلانىستىرىلا باستالىپ, جاس انشىلەر اراسىنداعى «ىڭكارىم-اي» كونكۋرسى قولعا الىندى. ال بۇرىن اۋداندا ءوتىپ, تالاي ءانشىنى تانىتقان «اقماڭدايلىم» بايقاۋى بيىل وبلىس ورتالىعىندا ۇيىمداستىرىلىپ, كوكتەمدە باعلانوۆا بولمىسىن كورسەتەتىن اسقاق ەسكەرتكىش تۇعىرعا قوندى. وسىلايشا, سىر ساندۋعاشى ءوزىن ەركەلەتكەن ەلىنە ەسكەرتكىش بولىپ ورالدى.
«سەنىكى, مەنىكى» دەپ بولمەي جاقسى ءىستىڭ باسىنا جۇمىلا كەتەتىن قازالى جۇرتى وسى جولى دا ۇيىمشىلدىق تانىتتى. جۇزجىلدىققا ارنالعان شارالار لەگى Qazaly marathon-2022 اتتى مارافوننان باستاۋ الدى. وسى كۇنى باعلانوۆا شىرقاعان اندەر كەنت كوشەسىن كەرنەپ تۇردى. توعىز شاقىرىمعا جۇگىرگەن 14-28 جاس ارالىعىنداعى جاستار وبلىستىڭ ءار تۇكپىرىنەن جيىلعان جەلاقتار. اۋداندىق جاستار رەسۋرستىق ورتالىعىنىڭ ۇيىمداستىرۋىمەن وتكەن جارىستىڭ جەڭىمپازى الدىنا قارا سالماي كەلگەن ارالدىق تۇرسىن كەرىمبەرديەۆ بولدى. ەكىنشى ورىندى قارماقشىلىق دانيار ءابىلاحاتوۆ يەلەنسە, قولا جۇلدە قىزىلوردا قالاسىنان كەلگەن كۇمىسبەك قوڭقاباەۆقا بۇيىردى. جەڭىمپازدار مەن جۇلدەگەرلەردى اۋدان اكىمى مۇحتار ورازباەۆ قۇتتىقتاپ, قارجىلاي سىي تابىس ەتتى.
ءبىر ايتا كەتەرلىگى, جەلاياقتار جۇلدەسى اۋدان ورتالىعىندا جاڭادان اشىلىپ جاتقان جاستار ءۇيىنىڭ الدىندا تابىستالدى. شىعىس جاستارىنىڭ كوسەمى اتانعان عاني مۇراتباەۆتىڭ ءىزباسارلارى ايماقتىڭ ءوسىپ-وركەندەۋى ءۇشىن ايانباي ەڭبەك ەتىپ كەلەدى. جاڭا نىسان جاستاردىڭ باسىن بىرىكتىرىپ, ەرىكتىلەر قىزمەتىن وركەندەتۋگە ءورىس اشادى.
جاستار ءۇيىنىڭ اشىلۋ سالتاناتىندا اۋدان اكىمى مۇحتار ورازباەۆ جاستارعا جىلى لەبىزىن جەتكىزدى.
– اۋدانىمىزدىڭ مەرەيىن اسقاقتاتىپ, وزدەرىنىڭ ءبىلىمى, شىعارماشىلىق جۇمىستارى جانە سپورتتاعى جەتىستىكتەرىمەن وبلىس, رەسپۋبليكا, قالا بەردى حالىقارالىق دەڭگەيدە تانىلىپ جۇرگەن جاستارىمىز جەتەرلىك. ءبىزدىڭ تاراپىمىزدان تالانتتى جاستارعا ءاردايىم قولداۋ كورسەتىلىپ كەلەدى. ەلدىڭ ەرتەڭى بولاتىن تاۋەلسىز مەملەكەتىمىزدىڭ تىزگىنىن ۇستار كەيىنگى بۋىن وكىلدەرىنە جاسالعان قامقورلىق جالعاسا بەرەدى. بىلتىر قازالىدا جاستار رەسۋرستىق ورتالىعى اشىلسا, بيىل قالا جاستارى جاڭا عيماراتقا كوشتى. ءبىزدىڭ مىندەت – تالاپتى جاستىڭ تاۋانىن جىقپاي, تالابىن ۇشتاۋ. سوندىقتان دا وقيتىن جاسقا باعىت بەرىپ, جوعارى ءبىلىم الا الماي قالعانداردى قاتاردان قالدىرماي جۇمىسقا ورنالاستىرۋعا نەمەسە كاسىپ اشۋعا كومەك كورسەتىلۋى قاجەت, – دەدى اۋدان اكىمى مۇحتار ورازباەۆ.
جاستار ءۇيىنىڭ اشىلۋىندا اۋداننىڭ قۇرمەتتى ازاماتى بولاتبەك پۇسىرمانوۆ دا قۇتتىقتاۋ ءسوز سويلەپ, كەيىنگى تولقىن وكىلدەرىنە تىلەگىن جەتكىزدى.
اۋدان ورتالىعىندا وتكەن ء«ان الەمىنىڭ پاديشاسى» اتتى رەسپۋبليكالىق تانىمدىق كونفەرەنتسياعا قاتىسۋشىلار وسى كۇنى ءجالاڭتوس باتىر مەن ايتەكە بي ەسكەرتكىشتەرىنە تاعزىم ەتىپ, گۇل شوقتارىن قويدى, جانقوجا باتىر كەسەنەسىندە بولدى. سىر بۇلب ۇلىنىڭ ەسىمىن يەلەنگەن اۋداندىق مادەنيەت ورتالىعى اۋلاسىنداعى ءبيۋستىن گۇلمەن كومكەرىپ, ءانشى رۋحىنا قۇرمەت تانىتتى.
مادەنيەت ورتالىعىندا وتكەن كونفەرەنتسيادا اۋدان اكىمى مۇحتار ورازباەۆ روزا تاجىبايقىزىنىڭ ونەرى قازاق ءان الەمىنىڭ تۇتاس ءبىر داۋىرىنە اينالعانىن اتاپ ءوتتى. كونفەرەنتسيادا تاريح عىلىمىنىڭ كانديداتى, وبلىستىق ءابدىلدا تاجىباەۆ اتىنداعى امبەباپ عىلىمي كىتاپحاناسىنىڭ ديرەكتورى نۇرلىبەك مىڭجاس «باعلانوۆا بولمىسىنىڭ ەرەكشەلىگى» تاقىرىبىندا بايانداما جاسادى. قوعام قايراتكەرى ءناجمادين مۇساباەۆ, قازاقستاننىڭ قۇرمەتتى ءجۋرناليسى ەرمەك زاڭگىروۆ, قازالى اۋدانىنىڭ قۇرمەتتى ازاماتى قۋانىش تولەباەۆ, «الاش» ادەبي سىيلىعىنىڭ لاۋرەاتى قارشىعا ەسىمسەيىتوۆا جانە قازالى اۋدانىنىڭ قۇرمەتتى ازاماتى بەرىك بيسەمباەۆ, قازاقستاننىڭ ەڭبەك سىڭىرگەن قايراتكەرى مۇرات سىدىقوۆ تالانت يەسى جايلى تەبىرەنىسكە تولى ەستەلىكتەر ايتتى.
تانىمدىق كونفەرەنتسيادا اۋدان اكىمى مۇحتار ورازباەۆ, اۋداندىق ارداگەرلەر كەڭەسىنىڭ توراعاسى ورازعالي بەكبانوۆ, قازالى اۋدانىنىڭ قۇرمەتتى ازاماتى, ەكونوميكا عىلىمىنىڭ دوكتورى, پروفەسسور وراق اليەۆ, ارداگەر بيبايشا تىلەۋبەرگەنوۆا ءانشى مەرەيتويىنا وراي باسپا ءجۇزىن كورىپ جاتقان ء«ان الەمىنىڭ پاديشاسى» اتتى كىتاپتىڭ تۇساۋىن كەسىپ, جاڭا تۋىندى وقىرماندارعا جول تارتتى.
بۇلبۇل ءانشىنىڭ 100 جىلدىعىنا وراي ۇيىمداستىرىلعان تولىمدى شارالاردىڭ ءبىرى «شىعىستىڭ بۇلب ۇلى» اتتى رەسپۋبليكالىق اقىندار ايتىسى بولدى. ە.بوزعۇلوۆ اتىنداعى №249 مەكتەپ-ليتسەيدە وتكەن ايتىسقا پاۆلودار, شىمكەنت, قىزىلوردا قالاسى, تۇركىستان, اقتوبە وبلىسى جانە قازالى, ارال, قارماقشى اۋداندارىنىڭ اقىندارى قاتىستى.
ايتىستى اۋدان اكىمى مۇحتار ورازباەۆ قۇتتىقتاۋ سوزبەن اشىپ, اقىندارعا ساتتىلىك تىلەدى. اقىندار الامانىن «التىن دومبىرانىڭ» ءۇش دۇركىن جەڭىمپازى مۇحتار نيازوۆ جۇرگىزىپ, ءسوز سايىسىنا شىققانداردى كوپشىلىككە تانىستىردى.
عاسىرلىق تويى ءوتىپ جاتقان باعلانوۆانىڭ قازاقتىڭ ءان ونەرىندەگى بيىگىن, بۇگىنگى قوعامداعى ءتۇرلى قۇبىلىستاردى جىرلاعان اقىندار اراسىنان قازىلار القاسىنىڭ شەشىمىمەن باس جۇلدە ارالدىق ەرجەڭىس ابديەۆكە بۇيىرىپ, اقىنعا 700 مىڭ تەڭگە تابىستالدى.
ءبىرىنشى ورىنعا شىمكەنتتىك ءبىرجان بايتۋوۆ لايىق دەپ تانىلسا, اتىراۋ قالاسىنان كەلگەن فاريزا جەتپىسباي مەن قازالىلىق اقىن ەلنۇر نۇرقاسىم ەكىنشى ورىندى, پاۆلودارلىق راۋان قايداروۆ پەن تۇركىستان وبلىسىنان كەلگەن اقىن داۋرەن اقساقال ءۇشىنشى ورىندى يەلەندى. وزگە اقىندارعا ىنتالاندىرۋ سىيلىقتارى تابىستالدى.
جەڭىمپاز بەن جۇلدەگەرلەردى اۋدان اكىمى مۇحتار ورازباەۆ, قازىلار القاسىنىڭ توراعاسى ابىلقايىر سىزدىقوۆ, حالىقارالىق «الاش» ادەبي سىيلىعىنىڭ لاۋرەاتى قارشىعا ەسىمسەيىتوۆا, ايتىسكەر اقىن نۇرمات مانسۇروۆ ماراپاتتادى.
مەرەيتويلىق شارالاردى روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ «قازاق دەگەن حالىقتىڭ ەركەسىمىن» اتتى كونتسەرتتىك باعدارلاماسى تۇيىندەدى.
وسىدان ءبىر كۇن بۇرىن عانا ونەر ۇجىمى قىزىلوردا قالاسىندا بولىپ, ن.بەكەجانوۆ اتىنداعى دراما تەاترىندا كونتسەرت قويعان بولاتىن. سول كەشتە ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى رايىمقۇلوۆا سىر ساندۋعاشىنىڭ عاسىرلىق مەرەيتويىنا ارنالعان گاسترولدىك ساپار سولتۇستىك قازاقستان وبلىسىنان باستاۋ الىپ, پاۆلودار, اقمولا, قاراعاندى, ۇلىتاۋ, اباي, جەتىسۋ وبلىستارىندا جالعاسقانىن ايتقان بولاتىن. سىرعا جەتكەن ونەر كەرۋەنىنىڭ قازالىداعى كونتسەرتىندە اۋدان باسشىسى انشىلەرگە العىسىن جەتكىزدى.
– «قازاقكونتسەرت» ءوزىنىڭ بايىرعى گاسترولدىك ساپارلارىن جاڭعىرتىپ, ەلدى مەكەندەردى ارالاۋى ونەرگە سۋسىنداعان ەلدى سەرپىلتكەنىن ايتا كەتكەن ابزال. اۋدان حالقىن رۋحاني جىگەرلەندىرگەن ونەر ۇجىمىنا قازالىلىقتاردىڭ اتىنان العىسىمدى ايتامىن, – دەدى ول.
وسى كەشتە ماقپال ءجۇنىسوۆا, باعدات سامەدينوۆا, ايجان نۇرماعانبەتوۆا, قۇرماش ماحان مەن «ازيا» توبى جانە باسقا دا انشىلەر ونەر كورسەتىپ, قازالى اسپانىن انگە بولەدى.
قىزىلوردا
