پرەزيدەنت • 05 قازان، 2022

مەملەكەت باسشىسى پاۆلودار اليۋميني زاۋىتىنا باردى

88 رەت كورسەتىلدى

پرەزيدەنت پاۆلودار اليۋميني زاۋىتىنىڭ قىزمەتىمەن تانىستى، دەپ حابارلايدى Egemen.kz.

كاسىپورىن جەتەكشىسى رومان رومانوۆ مەملەكەت باسشىسىنا وبلىستىڭ مەتاللۋرگيالىق كلاستەرىندەگى كاسىپورىندار شىعارعان دايىن ونىمدەردى تانىستىردى. بۇل جەردە باستاپقى اليۋمينيدەن باستاپ اليۋميني رادياتورلارىنا جانە اۆتوموبيل ديسكىلەرىنە دەيىنگى ءتۇرلى ءونىم قامتىلعان. «قازاقستان ءاليۋمينيى» اق 8 مىڭعا جۋىق ادامدى جانە ولاردىڭ وتباسىن تۇراقتى جۇمىسپەن قامتاماسىز ەتىپ، ولاردىڭ الەۋمەتتىك جاعدايىنا كوڭىل ءبولىپ وتىر.

بۇدان كەيىن ەۋرازيالىق توپتىڭ باسقارما توراعاسى سەرىك شاحاجانوۆ قاسىم-جومارت توقاەۆقا ERG ونەركاسىپتىك كاسىپورىندارىنىڭ شىعاراتىن قالدىقتارىن كەزەڭ-كەزەڭمەن قىسقارتۋدى كوزدەيتىن ەكولوگيالىق ستراتەگيانىڭ جۇزەگە اسىرىلۋى جونىندە ايتتى. 2030 جىلعا دەيىن قاتتى قالدىقتاردىڭ كولەمىن 50 مىڭ تونناعا (57 پايىزعا) ازايتۋ جوسپارلانىپ وتىر. زاۋىتتار مەن جىلۋ ەلەكتر ستانسالارىنداعى سۇزگىلەر اۋىستىرىلادى، كۇل جينايتىن قوندىرعىلار سالىنادى جانە كومىرتەگىنەن ارىلتۋ جوبالارى جۇزەگە اسىرىلادى. سونداي-اق ەۋرازيالىق توپ الداعى 3 جىلدا 420 مىڭ اعاش ەگۋدى جوسپارلاپ وتىر. ونىڭ جارتىسىنان كوبى پاۆلودار وبلىسىندا ەگىلەدى. سونىمەن قاتار كومپانيا قوستاناي وبلىسىندا بولعان ورتتەن كەيىنگى ورمان القابىن قالپىنا كەلتىرۋگە قوسىمشا 1 ميلليارد تەڭگە ءبولدى.

سونىمەن قاتار پرەزيدەنتكە كومپانيانىڭ الەۋمەتتىك مىندەتتەمەلەرىن ورىنداۋ بارىسى، ونىڭ وڭىرلەردەگى «حالىقتىڭ بيۋدجەتكە ارالاسۋى» باستاماسى، جەرگىلىكتى تۇرعىنداردىڭ الەۋمەتتىك تۇسىنىگى مەن پرواكتيۆتىلىگىن ارتتىرۋ، يننوۆاتسيالىق قىزمەت ءۇشىن جاعداي جاساۋ جانە بيزنەستىڭ الەۋمەتتىك جاۋاپكەرشىلىگى جونىندەگى باسقا دا جوبالار تۋرالى باياندالدى.

بۇدان كەيىن «قازاقستان ءاليۋمينيى» اق ەڭبەك ۇجىمىمەن ەمەن-جارقىن اڭگىمەلەسكەن قاسىم-جومارت توقاەۆ اكتسيونەرلەردىڭ بارلىق الەۋمەتتىك مىندەتتەمەسىن ورىنداۋىنىڭ ماڭىزدى ەكەنىن اتاپ ءوتتى.

– سىزدەر قازاقستان رەسپۋبليكاسى يندۋسترياسىنىڭ فلاگمانى سانالاتىن وتە ماڭىزدى كاسىپورىندا جۇمىس ىستەيسىزدەر. مەن جاڭا عانا پرەزەنتاتسيالاردى كوردىم. كاسىپورىننىڭ قىزمەتىمەن تانىسپىن. مۇندا ادامداردىڭ قالاي جۇمىس ىستەيتىنىن جانە قانداي ونىمدەر شىعاراتىنىن بىلەمىن. ولار قازاقستان رەسپۋبليكاسىنا قاجەت جانە شەتەلدە ۇلكەن سۇرانىسقا يە. ERG توبى كاسىپورىندارىنىڭ باسشىلىعى الەۋمەتتىك ماسەلەلەردى شەشۋگە، الەۋمەتتىك باعدارلامالاردى ىسكە اسىرۋعا جانە ءتيىستى نىسانداردىڭ قۇرىلىسىنا ەرەكشە نازار اۋدارادى. وسى ورايدا ءبىز ارقاشان قولدايمىز. سىزدەرگە ساتتىلىك تىلەيمىن! – دەدى پرەزيدەنت.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار