پرەزيدەنت • 05 قازان، 2022

پرەزيدەنت 85 جىل بۇرىن ىرگەسى قالانعان گيمنازياعا باردى

58 رەت كورسەتىلدى

پرەزيدەنت پاۆلودار وبلىسىنا جۇمىس ساپارى اياسىندا 85 جىل بۇرىن ىرگەسى قالانعان اباي اتىنداعى دارىندى بالالارعا ارنالعان گيمنازياعا باردى، دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.

مەكتەپ ديرەكتورى سالتانات شاباجانوۆا قاسىم-جومارت توقاەۆقا وقۋ ورنىنىڭ تەرەڭ تاريحى تۋرالى اقپارات بەرىپ، گيمنازيانىڭ جاڭارتىلعان كابينەتتەرىن كورسەتتى.

وقۋشىلار مەكتەپ كىتاپحاناسىندا مەملەكەت باسشىسىنا رامازان توقتاروۆتىڭ شىعارماشىلىعى بويىنشا «وقۋعا قۇشتار مەكتەپ» جوباسىن تانىستىرىپ، جازۋشىنىڭ «ەرتىس مۇحيتقا قۇيادى» اتتى كىتابىن سىيعا تارتتى.

سودان كەيىن پرەزيدەنت رەسپۋبليكالىق جانە حالىقارالىق ءپان وليپيادالارىنىڭ جەڭىمپازدارى مەن جۇلدەگەرلەرىن دايىنداعان پاۆلودار وبلىسىنىڭ پەداگوگتارىمەن اڭگىمەلەستى.

قاسىم-جومارت توقاەۆ ولاردى دۇنيەجۇزىلىك ۇستاز كۇنىمەن جانە قازاقستاندىق پەداگوگتاردىڭ وتكەن كاسىبي مەرەكەسىمەن، ال گيمنازيا ۇجىمىن مەرەيتويىمەن قۇتتىقتادى.

– مۇعالىم بولۋ – ەڭ ابىرويلى ەڭبەك. سونىمەن بىرگە بۇل – وتە جاۋاپتى جۇمىس. ۇستازدىق – قاسيەتتى قىزمەت دەسەك تە ارتىق ەمەس. سەبەبى ءار شاكىرتتىڭ تۇلعا بولىپ قالىپتاسۋىندا ۇستازدىڭ ورنى ەرەكشە، – دەدى مەملەكەت باسشىسى.

قاسىم-جومارت توقاەۆ پاۆلودار وبلىسى ۇلتتىڭ قايتا ورلەۋ ورتالىقتارىنىڭ ءبىرى ەكەنىن اتاپ ءوتتى. ونىڭ ايتۋىنشا، قازاقستاندىق كوپتەگەن تانىمال عالىم وسى وڭىردە وسكەن جانە قازىرگى پەداگوگتار اعا باۋىننىڭ ءىزىن جالعاپ كەلەدى.

– جاستارىمىزدىڭ وتانشىل، ءادىل، ادال جانە ەڭبەكقور بولىپ وسۋىنە ۇستازدىڭ قوساتىن ۇلەسى وراسان زور. ءبىز جاستاردىڭ ەڭبەككە قۇلشىنىسىن ارتتىرۋىمىز قاجەت. ادىلەتتى قازاقستاندا ەڭبەك ادامى ەڭ ءبىرىنشى ورىندا تۇرادى. سەبەبى وتانشىلدىق، ەڭ الدىمەن، تۋعان ەلىڭىڭ يگىلىگى ءۇشىن قىزمەت ەتۋ دەگەن ءسوز. ول ءۇشىن، ارينە، ەڭبەكقور، ىسكەر بولۋ كەرەك. اركىم ءوز بولاشاعىنا ءوزى جاۋاپتى ەكەنىن جاستار بالا كەزدەن تەرەڭ ۇعىنىپ وسۋگە ءتيىس. بۇل يدەيالاردىڭ ءبارىن بالالاردىڭ ساناسىنا مىندەتتى تۇردە ءسىڭىرۋ كەرەك. ۇلى اباي ايتقان «تولىق ادام» ۇعىمى – بولمىسى كەمەل، كوزقاراسى تەرەڭ، كوكىرەگى وياۋ، ەڭبەكقور ادام دەگەندى بىلدىرەدى. حالقىمىز «ۇستازى جاقسىنىڭ – ۇستامى جاقسى» بەكەر ايتپاعان، – دەدى قاسىم-جومارت توقاەۆ.

مەملەكەت باسشىسى چەرچيللدىڭ «مۇعالىمدەردە مەملەكەت باسشىلارى ارماندايتىن بيلىك بار» دەگەن ءسوزىن تىلگە تيەك ەتىپ، مەكتەپتەردە جەكە ادامنىڭ دا، تۇتاس مەملەكەتتەردىڭ دە شىنايى باسەكەلەستىك نەگىزى قالاناتىنىن اتاپ ءوتتى.

قاسىم-جومارت توقاەۆ قوعامدىق جانە جەكە قۇندىلىقتار جۇيەسىن قايتا جاڭعىرتۋ كەرەك ەكەنىن ايتتى. پرەزيدەنتتىڭ ايتۋىنشا، ءبىز ۇلتتىق داستۇرلەرىمىزدى ساقتاي وتىرىپ، قوعامدا پروگرەسسيۆتى ۇعىمداردى بەلسەندى دارىپتەۋىمىز قاجەت. بۇل – ەڭبەكقورلىق، ءبىلىم كۋلتى، ءوزارا سىيلاستىق، ىنتىماقتاستىق، سەنىم، ىسكەرلىك، ۇقىپتىلىق، سىني ويلاۋ سىندى قاسيەتتەر.

پرەزيدەنت ۇلتتىڭ جاڭا قارىم-قابىلەتتەرىن قالىپتاستىرۋدا جانە ادىلەتتى قازاقستاندى قۇرۋدا مۇعالىمدەر شەشۋشى ءرول اتقاراتىنىنا سەنىم ءبىلدىردى.

پاۆلودار وبلىسىنىڭ پەداگوگتار قاۋىمىنىڭ اتىنان №8 ورتا مەكتەپ-ليتسەيىنىڭ ورىس ءتىلى مەن ادەبيەتى ءپانىنىڭ مۇعالىمى يرينا شەۆچەنكو جانە مۇزافار الىمباەۆ اتىنداعى ورتا مەكتەپتىڭ مۋزىكا ءپانىنىڭ مۇعالىمى باقىتحان ورازبەك ءسوز سويلەدى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار