پرەزيدەنت • 05 قازان، 2022

مەملەكەت باسشىسى پاۆلودار وبلىسىنىڭ جۇرتشىلىعىمەن كەزدەستى

64 رەت كورسەتىلدى

پرەزيدەنتتىڭ پاۆلودار وبلىسىنا جۇمىس ساپارى ءوڭىر جۇرتشىلىعىمەن كەزدەسۋدەن باستالدى، دەپ حابارلايدى Egemen.kz اقورداعا سىلتەمە جاساپ.

مەملەكەت باسشىسى ءوز سوزىندە پاۆلودار وبلىسى قازاقستاننىڭ دامۋىندا ماڭىزدى ءرول اتقاراتىنىن اتاپ ءوتتى. سونداي-اق ەلىمىزدىڭ ەڭ كورىكتى مەكەندەرىنىڭ ءبىرى ەرتىس بويىنا ءوزىنىڭ ىقىلاسى ەرەكشە ەكەنىن ايتتى.  

– پاۆلودار وبلىسىندا «قۋاتتى وڭىرلەر – قۋاتتى ەل» قاعيداتى ايقىن كورىنىس تاپقان. بۇل ايماقتى ەكونوميكامىزدىڭ ەنەرگەتيكالىق جۇرەگى دەۋگە بولادى. جالپى، وبلىستىڭ دامۋى تۇراقتى. سوڭعى 3 جىلدا پاۆلوداردىڭ جالپى وڭىرلىك ءونىمى 28 پايىزعا ءوسىپ، 3،9 ميلليارد تەڭگەگە جەتتى.  اۋىل شارۋاشىلىعى، قۇرىلىس، ساۋدا جانە باسقا دا سالالار قارقىندى دامىپ كەلەدى. مۇنىڭ ءبارى جەرگىلىكتى جۇرتتىڭ تۇرمىسى جاقسارىپ، ءال-اۋقاتىنىڭ ارتۋىنا تىكەلەي ىقپال ەتەدى. ەلىمىز قازىر جان-جاقتى الەۋمەتتىك-ەكونوميكالىق رەفورمالار كەزەڭىنە قادام باستى. ءبىز  العا قويىپ وتىرعان ستراتەگيالىق مىندەتتەردى جۇزەگە اسىرۋعا پاۆلودار وبلىسى زور ۇلەس قوسادى دەپ سەنەمىن، – دەدى قاسىم-جومارت توقاەۆ.

وسى ورايدا پرەزيدەنت ءوڭىردىڭ باستى باسىمدىقتارىنا نازار اۋداردى.

ءبىرىنشى، ايماقتىڭ يندۋستريالىق-يننوۆاتسيالىق الەۋەتىن نىعايتۋ. قاسىم-جومارت توقاەۆ مەملەكەتتەردىڭ قارقىندى دامۋى جانە تۇراقتى يندۋستريالىق ءوسىم ەلەكتر ەنەرگياسى جەتكىلىكتى كولەمدە بولعان جاعدايدا عانا مۇمكىن ەكەنىن ايتتى. سوندىقتان ەرتىس بويىنداعى پاۆلودار قازاقستاننىڭ ەكونوميكالىق دامۋىندا ەرەكشە ءرول اتقارادى. ونىڭ ايتۋىنشا، ەلەكتر ەنەرگياسى مۇندا جاڭا جوعارى تەحنولوگيالىق باعىتتاردى دامىتۋعا مۇمكىندىك بەرەدى.

– بۇگىندە حالىقارالىق كومپانيالار وزدەرىنىڭ فيليالدارىن قازاقستانعا كوپتەپ كوشىرە باستادى. بۇل كاسىپورىندار اۋقىمدى اقپارات كوزدەرىمەن جۇمىس ىستەيدى جانە ولاردى ساقتاۋ جانە وڭدەۋ ءۇشىن ايتارلىقتاي كۇش كەرەك. وسىعان بايلانىستى تسيفرلىق دامۋ مينيسترلىگىنە جىل سوڭىنا دەيىن ەكىباستۇزدا دەرەكتەردى وڭدەۋدىڭ جاڭا ورتالىعىن سالۋ جونىندە ۇسىنىس ەنگىزۋدى تاپسىرامىن، – دەدى مەملەكەت باسشىسى.

پرەزيدەنت وبلىستىڭ ونەركاسىپتىك الەۋەتىن نىعايتۋمەن قاتار شاعىن جانە ورتا بيزنەسكە كەشەندى قولداۋ كورسەتۋ قاجەت دەپ سانايدى. ونىڭ پىكىرىنشە، ءوڭىر كاسىپكەرلەرى رەسپۋبليكالىق جانە ءتىپتى الەمدىك دەڭگەيدە سۇرانىسقا يە جوبالاردى جۇزەگە اسىرا الادى.

مەملەكەت باسشىسى ەكولوگيا ماسەلەلەرىن شەشۋدى پاۆلودار وبلىسىنداعى ەكىنشى باسىم مىندەت رەتىندە اتادى. سونداي-اق ونەركاسىپتىڭ دامۋى ەكولوگياعا ۇلكەن سالماق تۇسىرەتىنىن ايتتى. بۇگىندە ەلدە شىعارىلاتىن قالدىقتاردىڭ ۇشتەن ءبىرى وسى وبلىسقا تيەسىلى. بۇل  جىل سايىن شامامەن 700 مىڭ توننانى قۇرايدى.

– كۇندەلىكتى جۇمىسى بۇكىل ەلىمىزدىڭ يندۋستريالىق وسىمىنە ارنالعان ايماق تۇرعىندارىن تۋعان ولكەسىندەگى قورشاعان ورتانىڭ جاي-كۇيى قاتتى الاڭداتادى. ەكولوگيالىق جاعداي – ازاماتتاردىڭ تۇرمىس ساپاسىنىڭ ماڭىزدى كورسەتكىشى. سوندىقتان وندىرىستىك الەۋەتتى كۇشەيتۋ مەن ەكولوگيانى قورعاۋ اراسىنداعى تەپە-تەڭدىكتى ساقتاۋ اسا ماڭىزدى. ەستەرىڭىزگە سالا كەتەيىن، قازاقستان 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى ۇستانىمىن جاريالادى. قازىر وسى ماڭىزدى مىندەتتى شەشۋگە مۇمكىندىك بەرەتىن ۇزاق مەرزىمدى ستراتەگيا ازىرلەنىپ جاتىر. قورشاعان ورتاعا كەلتىرىلەتىن زالالدى ەداۋىر تومەندەتەتىن جاڭا تاسىلدەر مەن مودەلدەردى وندىرىسكە دايەكتى تۇردە ەنگىزۋ ماڭىزدى. ءوڭىردىڭ ءتورت كاسىپورنى وزىق تەحنولوگيالاردى پايدالانۋ ءۇشىن كەشەندى ەكولوگيالىق رۇقسات الدى. بۇل شىعارىلاتىن قالدىقتاردى 2030 جىلعا قاراي 47 مىڭ تونناعا تومەندەتەدى دەپ بولجانىپ وتىر. ۇكىمەت پەن وبلىس اكىمدىگى قالعان كاسىپورىنداردىڭ وسىنداي رۇقسات الۋىن جەدەلدەتۋى كەرەك، – دەدى قاسىم-جومارت توقاەۆ.

پرەزيدەنت ونەركاسىپتەردىڭ شىعاراتىن قالدىقتارىن قايتا وڭدەۋ ءىسىن دامىتۋدى تاپسىردى. وسى رەتتە كۇل ۇيىندىلەرى ءالى دە جەرگىلىكتى تۇرعىندار ءۇشىن زاڭسىز پايدا تابۋدىڭ كوزى بولىپ وتىرعانىن اتاپ ءوتتى. بۇدان بولەك، ۇكىمەتكە ءوڭىردى گازبەن قامتۋ جولدارىن ازىرلەۋ تاپسىرىلدى.

مەملەكەت باسشىسى جەرگىلىكتى تۇرعىنداردى الاڭداتىن تاعى ءبىر ماسەلەگە نازار اۋداردى.

– جىل سايىن ەرتىس بويىندا ورنالاسقان ەلدى مەكەندەردىڭ تۇرعىندارى شىبىن-شىركەيلەردىڭ قاپتاپ كەتۋىنەن زارداپ شەگەدى. جاندىكتەردى ۋلاۋ ءۇشىن مول قارجى بولىنەدى. بىراق بۇل جۇمىستىڭ ناتيجەلەرى، اسىرەسە اۋدانداردا بايقالمايدى. ەگەر بۇرىنعى ادىستەر ءتيىمسىز بولسا، وندا ونىڭ جاڭا جولدارىن ىزدەۋ كەرەك. ماسەلەنى كوكتەمگە قالدىرىپ، سودان كەيىن ءبارىن تابيعات جاعدايىنا بايلانىستى دەپ جابا سالۋعا بولمايدى. مامانداردى قازىر تارتا وتىرىپ، ماڭىزدى حالىقارالىق تاجىريبەنى زەرتتەگەن ءجون. شىبىن-شىركەيلەرگە قارسى كۇرەستە عىلىمي ءادىس كەرەك جانە ەڭ باستىسى، جەرگىلىكتى اتقارۋشى ورگاندار تاراپىنان ءتيىستى باقىلاۋ قاجەت، – دەدى پرەزيدەنت.

مەملەكەت باسشىسى پاۆلودارداعى ەكولوگيالىق قوزعالىس مۇشەلەرىنىڭ جاعدايعا نەمقۇرايلى قارامايتىنىن جانە ەرەكشە بەلسەندى ەكەنىن اتاپ ءوتتى. سونداي-اق پاۆلودار مەن ەكىباستۇز جاستارىنىڭ جاقىندا «EcoStudentKZ» رەسپۋبليكالىق ەكولوگيالىق چەللەندجىن قولداپ، ستۋدەنتتەردىڭ ساياباقتار مەن گۇلزارلاردى تازالاعانىنان حاباردار ەكەنىن ايتتى.

- بۇل تۇرعىدا مەن قازاقستانداعى كوپتەگەن ۆولونتەرلاردىڭ ەڭبەگىن اتاپ وتكىم كەلەدى. وزدەرىڭىزگە ءمالىم، مەن 2020 جىلدى ۆولونتەر جىلى دەپ جاريالادىم. بۇل شەشىم ءوزىن اقتادى. حالىقارالىق ۇيىمنىڭ قىزمەتكەرى رەتىندە مەن ۆولونتەرلىق قوزعالىسپەن جاھاندىق اۋقىمدا اينالىستىم. ال قازاقستاندا ۆولونتەرلىق جاستاردىڭ ىنتا-جىگەرىنە عانا نەگىزدەلگەن ماڭىزدى كۇش دەپ ەسەپتەيمىن. ءبىزدىڭ جاستارىمىزدىڭ بۇل جاسامپاز كۇشىن، ارينە، ەلىمىزدىڭ يگىلىگى ءۇشىن، حالقىمىزدىڭ يگىلىگى ءۇشىن، اتاپ ايتقاندا، تابيعاتىمىزدى تازا ۇستاپ، قورعاۋ ءۇشىن پايدالانۋ كەرەك، - دەدى قاسىم-جومارت توقاەۆ.

پرەزيدەنت وبلىستاعى سۋارمالى جەردىڭ كولەمىن ەكى ەسە ۇلعايتىپ، 300 مىڭ گەكتارعا دەيىن جەتكىزۋ كەرەك دەپ سانايدى. سونداي-اق ەرتىستىڭ سۋىن ءتيىمدى، ۇنەمدى پايدالانعان ءجون ەكەنىن جەتكىزدى.

تاعى ءبىر ماڭىزدى ماسەلە – ءوڭىردىڭ ينفراقۇرىلىمىن دامىتۋ. پرەزيدەنت ۇكىمەتكە وبلىس ورتالىعىن اينالىپ وتۋگە جول اشاتىن جاڭا كوپىر سالۋدى تاپسىردى. سونىمەن قاتار جولدى كۇتىپ ۇستاۋعا جانە قىس مەزگىلىندە جولداردى تازالاۋ جۇمىستارىنا باسا نازار اۋدارۋ قاجەت ەكەنىن ايتتى. وسى رەتتە مەملەكەت باسشىسى استانا – ەرەيمەنتاۋ – شىدەرتى» باعىتىندا قار تازالايتىن تەحنيكالاردى كوبەيتۋ ماڭىزدى ەكەنىن اتاپ ءوتتى. ۇكىمەتكە جىل سوڭىنا دەيىن «پاۆلودار – استانا» باعىتىنداعى تۇراقتى اۋە قاتىناسىن قالپىنا كەلتىرۋ جانە جەرگىلىكتى اۋەجايدىڭ ۇشۋ-قونۋ جولاعىن جوندەۋ ماسەلەسىن پىسىقتاۋ تاپسىرىلدى.

– جالپى، ءوڭىردىڭ ينفراقۇرىلىمى ەداۋىر ينۆەستيتسيا سالۋدى قاجەت ەتەدى.  مىسالى، وبلىس ورتالىعىنداعى جىلۋ جەلىسىنىڭ 80 پايىزى توزعان. سونىڭ كەسىرىنەن تۇرعىندار قىستىڭ كوزى قىراۋدا قايتا-قايتا جىلۋسىز قالادى. ەكىباستۇزداعى جىلۋ ەلەكتر ورتالىعىنىڭ جاعدايى سىن كوتەرمەيدى. قالانىڭ جىلۋ جەلىسى ابدەن ەسكىرگەن. ەلىمىزدەگى بارلىق ەلەكتر قۋاتىنىڭ تورتتەن ءبىرىن ەكىباستۇز وندىرەدى. سوعان قاراماستان قىس كەلگەن سايىن قالاعا جىلۋسىز قالۋ قاتەرى تونەدى. بۇل – ەش قيسىنعا كەلمەيتىن جاعداي. پاۆلودارداعى ءبىرىنشى جىلۋ ەلەكتر ورتالىعى مەن ەكىباستۇزداعى جىلۋ ەلەكتر ورتالىعىن كەزەڭ-كەزەڭىمەن جاڭعىرتۋ كەرەك.   ۇكىمەتكە اكتسيونەرلەرمەن بىرلەسىپ، بۇل ماسەلەگە قاتىستى ناقتى ۇسىنىستار ەنگىزۋدى تاپسىرامىن. اكىمدىك ينجەنەرلىك ينفراقۇرىلىمدى جاڭعىرتۋ جوسپارىن ۇسىنىپ وتىر. ۇكىمەت ونى قارجىلاندىرۋ مۇمكىندىكتەرىن قاراستىرۋى قاجەت، – دەدى مەملەكەت باسشىسى.

سونىمەن قاتار ۇكىمەتكە ەكىباستۇز قالاسىن دامىتۋدىڭ كەشەندى جوسپارىنا ەنگىزىلگەن جوبالارعا باسىمدىق بەرە وتىرىپ، قارجىلاندىرۋ تاپسىرىلدى. پرەزيدەنت پاۆلوداردىڭ ترامۆاي جۇيەسىن دامىتۋدى جالعاستىرۋ، پويىزداردى جاڭارتۋ جۇمىستارىن جەدەلدەتۋ جانە وبلىس ورتالىعىندا كوپفۋنكتسيونالدى مۇز سارايىن سالۋ ماسەلەسىن پىسىقتاۋ ماڭىزدى دەپ ەسەپتەيدى.

كەلەسى ءبىر باسىمدىق – كرەاتيۆتى يندۋستريا مەن ءتۋريزمدى دامىتۋ. مەملەكەت باسشىسىنىڭ پىكىرىنشە، ەلىمىزدىڭ قۋاتى ادامداردىڭ قايراتىنا، بىلىمىنە جانە پاتريوتتىعىنا بايلانىستى. سوندىقتان ادامعا باعدارلانعان قىزمەت مەملەكەتتىك ساياساتىمىزدىڭ نەگىزگى ولشەمىنە اينالدى.

– ۇلتتىق مادەنيەتتى شەتەلدە ناسيحاتتاۋعا جانە جاڭعىرتۋعا پاۆلودار وبلىسىنان شىققان قازاقستاندىق جاڭا «مادەني تولقىن» وكىلدەرى ەلەۋلى ۇلەس قوسىپ كەلەدى. كلاسسيكالىق ونەردى باعالاي بىلەتىندەر ەۋروپانىڭ ۇزدىك وپەرا ساحنالارىندا اريالار ورىندايتىن ماريا مۋدرياكتىڭ داۋىسىن بەرىلە تىڭداپ ءجۇر. «گرەممي» سىيلىعىنىڭ يەگەرى يمانبەك زەيكەنوۆتىڭ تانىمال مۋزىكاسىنا دۇنيەجۇزى جاستارى تاڭداي قاقتى. وسىنداي دارىندى جاستارىمىز مادەنيەتىمىزدىڭ شەتەلدەگى ەلشىسىنە اينالدى. ناۋم گريگورەۆيچ شافەر سەكىلدى تۋعان ولكەسىنىڭ، ەلىنىڭ ناعىز پاتريوتتارى دا ۇلتتىڭ رۋحاني بايۋىنا ۇلەس قوسىپ وتىر. ول – الەمنىڭ ءار بۇرىشىنان (27 مىڭ دانا) مۋزىكالىق كۇيتاباقتاردىڭ قۇندى جازبالارىن جيناعان وبلىستىڭ قۇرمەتتى ازاماتى، قادىرلى اقساقالى. ونىڭ جيناقتارىندا قازاقتىڭ حالىق اۋەندەرىنىڭ العاشقى جازبالارىمەن قاتار جالعىز دانا ۇلگىلەرى دە بار. مۇنداي ادامدار قوعامىمىزعا، اسىرەسە، جاستارعا ۇلگى بولۋى كەرەك. قازىرگى الەمدە شىعارماشىلىق يندۋستريا، مادەني-تانىمدىق تۋريزم كوپتەگەن ەلدىڭ ەكونوميكالىق دامۋىنىڭ ماڭىزدى قۇرامداس بولىگىنە اينالعان. بۇل باعىتتا وبلىستىڭ الەۋەتى زور، – دەدى قاسىم-جومارت توقاەۆ.

سونىمەن قاتار مەملەكەت باسشىسى ءوڭىر تۇرعىندارىن جاڭا تەحنولوگيالىق دامۋعا دايىن بولۋعا شاقىردى. پرەزيدەنتتىڭ ايتۋىنشا، بۇل ۇدەرىستەگى ەڭ ءتيىمدى جول جۇمىسشىلاردى جاڭا داعدىلارعا ۇيرەتۋ بولماق. وسى ءوڭىردىڭ مۇسا شورمانوۆ پەن ءماشھۇر ءجۇسىپ كوپەەۆ سەكىلدى ءبىرتۋار پەرزەنتتەرىن اتاپ وتكەن قاسىم-جومارت توقاەۆ ءبىلىم بەرۋ جۇيەسىن دامىتۋ تۋرالى ويىن ايتتى.

– ءبىز جاڭا ادىلەتتى قازاقستاندى قۇرامىز. ال بۇل ماقساتقا ەلىمىزدە ءبىلىم كۋلتى ءبىرجولا ورنىققان كەزدە عانا جەتەمىز. سول سەبەپتى مەن ەل-جۇرتپەن كەزدەسۋدىڭ بارىندە بۇل تۋرالى ۇنەمى ايتىپ ءجۇرمىن. جالپى، عىلىم جانە ءبىلىم سالاسى ءاردايىم مەملەكەتتىڭ نازارىندا. ءبىز بارلىق بالانىڭ ساپالى ءبىلىم الۋىنا جاعداي جاساۋىمىز كەرەك. وسىعان بايلانىستى مەن جولداۋدا «جايلى مەكتەپ» ۇلتتىق جوباسىن جۇزەگە اسىرۋدى ۇسىندىم. بۇل باستامانىڭ اياسىندا پاۆلودار وبلىسىندا الداعى 3 جىلدا 10 مەكتەپ سالىنادى. قۇرىلىستى ساپالى سالىپ، ۋاقتىلى تاپسىرۋ – باستى مىندەت.  ءبىلىم الىپ، عىلىم يگەرگەن جۇرتتىڭ مەرەيى ۇستەم بولادى، – دەدى مەملەكەت باسشىسى.

قاسىم-جومارت توقاەۆ ءتۇرلى ماماندىقتى مەڭگەرىپ، ۋاقىت تالابىنا بەيىمدەلۋدىڭ ايرىقشا ماڭىزدى ەكەنىن اتاپ ءوتتى. بۇل ەلدىڭ باسەكەگە قابىلەتتىلىگىن كورسەتەدى. سونىمەن قاتار جاستاردىڭ ۇنەمى ءبىلىمىن جەتىلدىرىپ، ءوز ەلىندە عانا ەمەس، الەمنىڭ ءار بۇرىشىندا سۇرانىسقا يە بولۋعا  ۇمتىلۋى قاجەت ەكەنىن ايتتى.

بۇدان كەيىن پرەزيدەنت ەلىمىزدەگى سايلاۋالدى ناۋقانعا توقتالدى.

– وزدەرىڭىزگە ءمالىم، مەن ەلىمىزدەگى ەڭ ءىرى AMANAT پارتياسىنىڭ توراعاسى قىزمەتىنەن باس تارتتىم. كونستيتۋتسيالىق رەفورما ناتيجەسىندە پرەزيدەنتكە ءوزىنىڭ وكىلەتتىگىن اتقارۋ كەزىندە پارتيا قاتارىندا بولۋعا تىيىم سالىندى. الداعى سايلاۋعا قانداي ۇيىمنىڭ اتىنان قاتىساتىنىما قوعام قىزىعۋشىلىق ءبىلدىرىپ وتىرعانىن بىلەمىن. اشىعىن ايتايىن، ماعان ءارتۇرلى رەسپۋبليكالىق بىرلەستىكتەر مەن پارتيالاردان وزدەرىنىڭ اتىنان ۇمىتكەر بولۋ تۋرالى ۇسىنىستار ءتۇسىپ جاتىر. اسىرەسە، جاستار جانە باسقا دا قوعامدىق ۇيىمداردىڭ باستاما كوتەرىپ جاتقانىنا قۋاندىم. وسىنىڭ بارلىعى ازاماتتاردىڭ كەيىنگى ءۇش جارىم جىلدا جۇزەگە اسىرىلىپ كەلگەن رەفورمالار مەن وزگەرىستەرگە قولداۋدىڭ ايتارلىقتاي ارتقانىن كورسەتەدى. بىراق جاساعان ۇسىنىسى مەن سەنىمى ءۇشىن، ستراتەگيالىق باعىتىما بەلسەندى قولداۋ كورسەتكەنى ءۇشىن بارلىعىنا العىس ايتامىن. مەن بەلگىلى ءبىر ۇيىمنان ەمەس، ەلىمىزدە جۇرگىزىلىپ جاتقان رەفورمالاردىڭ الەۋمەتتىك نەگىزىن قالىپتاستىراتىن قوعامدىق-ساياسي كۇشتەردىڭ ءىرى كواليتسياسىنىڭ اتىنان سايلاۋعا قاتىسقانىم دۇرىس بولادى دەپ ويلايمىن. سونداي-اق بۇل مەملەكەت باسشىسىنىڭ ءتۇرلى پارتيالارمەن، بىرلەستىكتەرمەن تەڭ اراقاشىقتىق ساقتاۋ قاعيداتىن نىعايتۋعا مۇمكىندىك بەرەدى، – دەدى پرەزيدەنت.

قاسىم-جومارت توقاەۆتىڭ ايتۋىنشا، سايلاۋ ناۋقانىن زاڭنامالاردى قاتاڭ ساقتاي وتىرىپ جۇرگىزۋدى قامتاماسىز ەتۋ ماڭىزدى. سونداي-اق مەملەكەت باسشىسى رەتىندە پرەزيدەنت سايلاۋىنىڭ ءادىل ءارى اشىق وتەتىنىنە كەپىلدىك بەردى.

كەزدەسۋ سوڭىندا پرەزيدەنت پاۆلودار وبلىسىنىڭ تۇرعىندارىنا مەملەكەتتىك ناگرادالار تابىس ەتتى.

«قانىش ساتپاەۆ اتىنداعى كانال» رمك ديرەكتورىنىڭ كەڭەسشىسى لەونيد باتالوۆ «پاراسات» وردەنىمەن، جوعارى سپورت شەبەرلىگى مەكتەبىنىڭ جاتتىقتىرۋشى – وقىتۋشى ازامات ماقاجانوۆ، ع.سۇلتانوۆ اتىنداعى پاۆلودار وبلىستىق اۋرۋحاناسىنىڭ پەريناتالدىق ورتالىعىنىڭ باس دارىگەرى ايمان وسپانوۆا «قۇرمەت» وردەنىمەن جانە «قازاقستان ءاليۋمينيى» اق ۋچاسكەسىنىڭ باستىعى ەركەبۇلان حۇسايىنوۆ ءىىى دارەجەلى «ەڭبەك داڭقى» وردەنىمەن ماراپاتتالدى. سونداي-اق «قازاقستان» رترك مەنشىكتى ءتىلشىسى بولات امانباەۆقا «ەرەن ەڭبەگى ءۇشىن» مەدالى تابىس ەتىلدى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار