«سوڭعى 3 جىلدا پاۆلوداردىڭ جالپى وڭىرلىك ءونىمى 28 پايىزعا ءوسىپ, 3,9 ميلليارد تەڭگەگە جەتتى. اۋىل شارۋاشىلىعى, قۇرىلىس, ساۋدا جانە باسقا دا سالالار قارقىندى دامىپ كەلە جاتىر. مۇنىڭ ءبارى جەرگىلىكتى جۇرتتىڭ تۇرمىسى جاقسارىپ, ءال-اۋقاتىنىڭ ارتۋىنا تىكەلەي ىقپال ەتەدى. ەلىمىز قازىر جان-جاقتى الەۋمەتتىك-ەكونوميكالىق رەفورمالار كەزەڭىنە قادام باستى. ءبىز العا قويىپ وتىرعان ستراتەگيالىق مىندەتتەردى جۇزەگە اسىرۋعا پاۆلودار وبلىسى زور ۇلەس قوسادى دەپ سەنەمىن», دەدى قاسىم-جومارت كەمەل ۇلى.
پرەزيدەنت ءوز سوزىندە ەنەرگەتيكالىق قاۋىپسىزدىك ماسەلەسى تەك ءبىزدىڭ ەلىمىز ءۇشىن عانا ەمەس, بارشا الەم ءۇشىن ماڭىزدى بولىپ وتىرعانىن اتاپ ءوتتى.
«بۇگىنگى تاڭدا ەنەرگەتيكالىق قاۋىپسىزدىك بۇكىل الەم ءۇشىن وتە وزەكتى ماسەلە بولىپ تابىلادى. مەملەكەتتەردىڭ ۇدەمەلى دامۋى, تۇراقتى يندۋستريالىق ءوسۋ ەلەكتر ەنەرگياسىنىڭ جەتكىلىكتى كولەمى بولعان جاعدايدا عانا مۇمكىن بولادى. سوندىقتان پاۆلودار قازاقستاننىڭ ەكونوميكالىق پروگرەسىندە ەرەكشە مانگە يە», دەپ قوستى مەملەكەت باسشىسى.
