– عۇمىرىن مۇعالىم ماماندىعىنا ارناعاندار ەل ىشىندە قاشاندا ابىرويلى. ويتكەنى ادام ومىردە قانداي جەتىستىككە جەتسە دە ونىڭ تۇلعا رەتىندە قالىپتاسۋىندا ۇستازدىڭ ورنى ەرەكشە. سونىمەن بىرگە جاس مۇعالىمدەرگە ماماندىققا ادالدىقتى كورسەتىپ, تالماي ەڭبەك ەتىپ كەلە جاتقان ءبىلىم سالاسىنىڭ ارداگەرلەرىنە ريزاشىلىق بىلدىرەمىز. سىزدەردىڭ ەرەن ەڭبەكتەرىڭىز بەن ماماندىققا ادالدىقتارىڭىزعا العىسىمىز شەكسىز. مۇعالىم مارتەبەسىنە قاتىستى مەملەكەت تاراپىنان جاسالعان ىلكىمدى ىستەر از ەمەس. كەيىنگى ءۇش جىلدا مۇعالىمدەردىڭ جالاقىسى 75 پايىزعا ءوستى. ساناتىنا بايلانىستى تولەنەتىن قوسىمشا 50 پايىزعا دەيىنگى تولەمدى ايماقتا مۇعالىمدەر قاۋىمىنىڭ 60 پايىزى الادى, – دەدى وبلىس اكىمى جەڭىس قاسىمبەك.
اۋىلدىق جەردەگى ءبىلىم بەرۋ ساپاسى دا نازاردا. سوڭعى ەكى جىلدا وبلىستا 126 جاس مامانعا باسپانا بەرىلدى. بۇعان قوسا جۇمىسقا ورنالاسۋ كەزىندە 100 ايلىق ەسەپتىك كورسەتكىش كولەمىندە كوتەرمە قاراجات بەرىلىپ كەلەدى.
ال «قاراعاندى وبلىسى ءبىلىم بەرۋ سالاسىنىڭ قۇرمەتتى پەداگوگى» اتانعانداردىڭ ارقايسىسى ءوڭىر ءبىلىمىن دامىتۋعا ولشەۋسىز ۇلەس قوسقان ۇستاز ساناتىنان, ەڭبەك وتىلدەرى 30 جىلعا جۋىق.
قاراعاندى وبلىسى ءبىلىم بەرۋ سالاسىنىڭ قۇرمەتتى پەداگوگى قاتارىندا قاراعاندى قالاسى №61 جالپى ءبىلىم بەرەتىن مەكتەبىنىڭ قازاق ءتىلى مەن ادەبيەتى ءپانى مۇعالىمى ديدار تورەكەلدينا بار. 27 جىلدان بەرى بالالاردى ءبىلىم نارىمەن سۋسىنداتىپ كەلەدى. مۇعالىمدىك جولىن 18 جاسىندا باستاپتى.
– مەكتەپتەن كەيىن ۋنيۆەرسيتەتتىڭ فيلولوگيا فاكۋلتەتىنىڭ سىرتتاي بولىمىنە ءتۇستىم. سول جىلدارى مۇعالىمدەر تاپشى ەدى. ۋنيۆەرسيتەتتە وقيتىنىم تۋرالى انىقتامامەن جۇمىسقا العان-تىن. سودان بەرى مەنىڭ ءومىرىم بالالارمەن تىعىز بايلانىستى. وسى جىلداردا 20-دان استام وقۋشىم جۇلدەلى ورىن يەلەنىپ, ءتۇرلى رەسپۋبليكالىق بايقاۋدا جەڭىسكە جەتتى. بۇگىنگى سىيلىعىمدى سول وقۋشىلارىما ارنايمىن. بۇل – ءبىزدىڭ ورتاق جەڭىسىمىز. ۇستاز ەڭبەگىنىڭ دالەلى – شاكىرتىنىڭ جەتىستىگى, – دەيدى د.تورەكەلدينا.
شاحتينسك قالاسىنداعى ءاليحان بوكەيحان اتىنداعى مەكتەپ-ليتسەي ديرەكتورى ارارات بەسماعانبەتوۆ تە 26 جىلدان بەرى ۇستازدىق دەگەن ۇلى قىزمەتتە.
– 21 جاسىمنان ۇستازدىق جولىندامىن. مۇعالىمدىك – مەنىڭ سانالى تاڭداۋىم. جۇمىس وڭاي ەمەس, ارينە. دەگەنمەن مۇعالىمدىكتى تاڭداعانىما وكىنگەن ەمەسپىن. قازىرگى تاڭدا ليتسەيىمىزدىڭ وقۋشىلارى ءتۇرلى بايقاۋلار مەن وليمپيادالاردا جۇلدە يەلەنىپ ءجۇر. سوندىقتان بۇل ماراپات – بۇكىل ۇجىم ەڭبەگىنىڭ ناتيجەسى, – دەيدى ا.بەسماعانبەتوۆ.
مۇعالىمدەر ماراپاتى مۇنىمەن شەكتەلمەيدى. وبلىستىڭ 10 مۇعالىمى ءبىلىم سالاسىنداعى ۇزدىك كورسەتىشى ءۇشىن وبلىس اكىمىنىڭ قۇرمەت گراموتاسىمەن ماراپاتتالدى. التى پەداگوگ «ىبىراي التىنسارين», بەس مۇعالىم «ەڭبەك ارداگەرى» جانە ءتورت پەداگوگ ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىنە لايىق دەپ تانىلدى.
قاراعاندى وبلىسى
