مەديتسينا • 30 قىركۇيەك، 2022

22 نارەستەنىڭ ءومىرىن ساقتاپ قالدى

34 رەت كورسەتىلدى

Samruk-Kazyna Trust قورىنىڭ دەمەۋشىلىك قولداۋىمەن جۇزەگە اسىرىلىپ جاتقان «باسقارىلاتىن گيپوتەرميا» جوباسىنىڭ العاشقى ناتيجەلەرى جاريا­لاندى. 2021 جىلدىڭ مامىر ايىنان باستاپ 2022 جىلدىڭ قىركۇيەك ايىنا دەيىن اۆتوماتتى گيپوتەرميا جابدىقتارى ارقىلى 22 جاڭا تۋعان نارەستە قۇتقارىلىپ وتىر.

«سامۇرىق-قازىنا» اق كومپانيالار توبى اتىنان قازىرگى زامانعى گيپوتەرميا اپپاراتتارى مەن ەنتسەفالوگرافيا مونيتورلارىن قاراعاندى، تالدىقورعان، اقتاۋ، وسكەمەن، ورال قالالارىنداعى بەس وبلىستىق پەريناتالدىق ورتالىق جانە شىمكەنت قالاسىنىڭ قالالىق پە­ري­ناتالدىق ورتالىعى الدى. جابدىق­تار­دىڭ جالپى قۇنى 132 ملن تەڭگەنى قۇرادى.

«باسقارىلاتىن گيپوتەرميا» جوباسى باستالعان كۇننەن باستاپ 6 اپپاراتتا 22 بالانىڭ ءومىرى قۇتقارىلدى. قاراعاندى وبلىستىق كوپبەيىندى اۋرۋحانانىڭ پە­ري­نا­تالدىق ورتالىعىندا اۆتوماتتى گيپو­تەرميا اپپاراتىندا اۋىر جانە ورتاشا اۋىر اسفيكسيامەن تۋعان 16 بالا امان قالدى. گيپوتەرميا اپپاراتتارى ورناتىلعاننان كەيىن بىردەن اقتاۋدا 3 سابيگە، تالدىقورعاندا، وسكەمەندە جانە شىمكەنتتە ءبىر سابيدەن كۇتىم جاساۋعا پايدالانىلدى.

«بۇگىندە «باسقارىلاتىن گيپوتەرميا» جوباسىنىڭ جەمىسى اسەرلى بولىپ وتىر. ءبىز بەرگەن اپپاراتتار تاجىريبەلى نەوناتولوگ دارىگەرلەردىڭ قولىندا كوپ جىلدار بويى جۇمىس ىستەيتىن بولادى. دەنساۋلىق ساقتاۋ سالاسىنداعى وڭىرلىك جوبالاردى قولداۋ «سامۇرىق-قازىنا» اق ءۇشىن ماڭىزدى باسىمدىقتاردىڭ ءبىرى. بۇل ەلىمىزدەگى بالالار ءولىمىن قىسقارتۋ سىندى وتكىر الەۋمەتتىك ماسەلەنى شەشۋگە كومپانيالار توبىمىزدىڭ قوسقان ۇلەسى»، دەپ اتاپ ءوتتى Samruk-Kazyna Trust قورى باس ديرەكتورىنىڭ ورىنباسارى سەرعوجا قالياسقاروۆ.

مامانداندىرىلعان جابدىق پايدا بولعانعا دەيىن رەانيماتسيادا قولدا بار قۇرالدارمەن مەحانيكالىق گيپوتەرميا قولدانىلىپ، بۇل ارقاشان قانا­عات­تانارلىق ناتيجە بەرمەدى. قاجەتتى تەمپەراتۋرانى 72 ساعات بويى تۋرا 34 گرا­دۋستا ۇستاپ تۇرۋ، ال سودان كەيىن بالانى بىرتىندەپ جىلىتۋ وتە قيىنعا سوقتى. «سا­مۇرىق-قازىنا» اق-نىڭ AYALA قايى­رىمدىلىق قورىمەن سەرىكتەستىكتە كورسەتكەن كومەگى ارقىلى پەريناتالدىق ورتالىقتاردىڭ رەانيماتسيالارىندا بۇل ەڭبەكتى كوپ قاجەت ەتەتىن ۇدەرىس ەندى تولىق اۆتوماتتاندىرىلعان. ناتيجە – قۇت­قارىلعان بالالاردىڭ ءومىرى مەن فۋنكتسيونالدىق دەنساۋلىعى.

«كومەك سۇراعان ءوتىنىشىمىزدى Samruk-Kazyna Trust قورى مەن AYALA قايى­رىم­دىلىق قورىنىڭ جا­ۋاپ­سىز قال­دىر­ماعانىنا شەكسىز قۋا­نىش­تىمىز. جا­قىن­دا ورناتىلعان جاب­دىقتار ارقىلى اۋىر اسفيكسيا­مەن تۋعان بالانىڭ ءومىرىن ساقتاپ قالدىق. بۇل وسى جابدىققا دەگەن جوعارى سۇرانىسقا ايقىن دالەل. شىمكەنت قالاسىنىڭ بولاشاق انالارى وسى قۇندى سىيلىق ءۇشىن دەمەۋشىنىڭ اتىنا ايتىلاتىن العىسىمىزعا قوسىلا­تىنىنا سەنىمدىمىن»، دەپ اتاپ ءوتتى شىمكەنت قالاسى پەريناتالدىق ورتا­لى­عى ديرەكتورىنىڭ مىندەتىن اتقارۋشى داۋلەت ساتوۆ.

تەراپيالىق گيپوتەرميانى جاڭا تۋعان نارەستەنىڭ ءومىرىنىڭ العاشقى ساعاتتارىندا قولدانۋ قاجەت. اپپارات جاڭا تۋعان نارەستەنىڭ دەنە تەمپەراتۋراسىن اۆتوماتتى تۇردە بىرتىندەپ تو­مەندەتەدى جانە ونداعان ساعات بويى ونى قاجەتتى دەڭگەيدە ۇستايدى. بۇل بالا اعزاسىنداعى مەتابوليزمدى وزگەرتۋگە، ونىڭ باس ميىن گليۋكوزامەن قامتاماسىز ەتۋگە جانە سول ارقىلى ورتالىق جۇيكە جۇيەسىنىڭ جاسۋشا­لا­رىن قورعاۋعا جانە قالپىنا كەلتىرۋگە مۇمكىندىك بەرەدى. گيپوتەرميا اپپاراتىنا جيىنتىقتا جۇرەتىن امپليتۋدالىق ەلەكتر­ەنتسە­فا­لوگرافيا مونيتورى دارىگەرلەرگە قول­دا­نىلاتىن تەراپيانى باقىلاۋعا جانە ءتيىمدى تۇزەتۋگە كومەكتەسەدى.

«2017 جىلى ءبىزدىڭ قور دەنساۋلىق ساقتاۋ مينيسترلىگىمەن «باسقارىلاتىن گيپوتەرميا» جوباسىن قولداۋ تۋرالى مەموراندۋمعا قول قويدى. وسى ۋاقىت ىشىندە قازاقستاننىڭ 12 قالاسىندا AYALA قورى ورناتقان جابدىقتار ارقىلى 235 جاڭا تۋعان نارەستەنىڭ ءومىرى مەن دەنساۋلىعى قۇتقارىلدى. ءبىز Samruk-Kazyna Trust قورىنا قازاقستانداعى التى بالالار رەانيماتسياسىن بالالار ءولىمى مەن مۇگەدەكتىگىن ازايتۋعا كومەك­تە­سەتىن جابدىقتاۋعا كومەكتەسكەنى ءۇشىن ري­زا­شى­لىعىمىزدى بىلدىرەمىز»، دەپ اتاپ ءوتتى «AYALA» قوعامدىق قورىنىڭ پرە­زي­دەنتى ايدان سۇلەيمەنوۆا.

سوڭعى جاڭالىقتار

دوللار باعامى تومەندەدى

قارجى • بۇگىن، 16:10

ۇقساس جاڭالىقتار