يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ رەسپۋبليكالىق تاۋ-كەن ءوندىرۋشى جانە تاۋ-كەن مەتاللۋرگيالىق كاسىپورىندار قاۋىمداستىعىنىڭ اتقارۋشى ديرەكتورى نيكولاي رادوستوۆەتسپەن كەزدەسىپ, ەلىمىزدەگى كومىر ءوندىرىسىن جاڭعىرتۋدىڭ زاماناۋي تەتىكتەرىن تارازىلادى.
كەزدەسۋ بارىسىندا تاراپتار كومىر ءوندىرىسىن جاڭعىرتۋ مەن سالاعا جاڭا تەحنولوگيالار ەنگىزۋگە باعىتتالعان ماسەلەلەردى تالقىلاپ, قاتتى وتىننىڭ تاسىمالىن ۇتىمدى ۇيىمداستىرۋ مەن ونىڭ باعاسىنىڭ نەگىزسىز ءوسۋىن تەجەۋ جانە ينۆەستيتسيالار تارتۋ بويىنشا بىرلەسە جۇمىس ىستەۋگە ۋاعدالاستىق جاسالدى.
بۇگىندە ەلىمىزدە كومىر وندىرەتىن 25-كە جۋىق كاسىپورىن بار. اتالعان ءوندىرىس وشاقتارى بيىل العاشقى سەگىز ايدا 73,7 ملن توننا كومىر وندىرسە, 2022-2023 جىلدارداعى جىلىتۋ ماۋسىمىنىڭ باسىنان بەرى كوممۋنالدىق-تۇرمىستىق سەكتور مەن حالىققا ارنالعان 4,03 ملن توننا قاتتى وتىن جەتكىزىلگەن. ياعني وتكەن جىلعى كورسەتكىشپەن سالىستىرعاندا 4,6 پايىزعا ارتىق. كومىر سالاسىنداعى كومپانيالاردىڭ مالىمەتى بويىنشا, وتىننىڭ بۇل ءتۇرىنىڭ باعاسى وتكەن جىلعى دەڭگەيدە بولجانىپ وتىر. ماسەلەن, قازىرگى تاڭدا ىشكى نارىقتا كومىردىڭ ءار تونناسى 8 مىڭ مەن 21 مىڭ 600 تەڭگە ارالىعىندا ساتىلسا, ونىڭ قۇنى كەن ورنىنىڭ قاشىقتىعى مەن كومىردىڭ ماركاسىنا دا تىكەلەي بايلانىستى بولماق.
يندۋستريا جانە ينفراقۇرىلىمدىق دامۋ مينيسترلىگى كومىر باعاسىنىڭ نەگىزسىز وسۋىنە جول بەرمەۋ ماقساتىندا «قازتەمىرترانس» اق ۆاگوندار جەلىسى ارقىلى كەن ورىندارىنان تىكەلەي تاسىمالداۋدى ۇيىمداستىرۋدا. بۇدان بولەك, ۆەدومستۆو جەرگىلىكتى كومىر تيەۋ تۇيىقتارى جانە وبلىس اكىمدىكتەرىمەن بىرلەسىپ ازىرلەنگەن كومىردى ەلدەن تىس جەرلەرگە اۆتوكولىكپەن شىعارۋعا تىيىم سالۋ تۋرالى ارنايى بۇيرىق شىعارعان. بۇل شەشىمدەگى باستى ماقسات – 2022-2023 جىلدارىنداعى جىلۋ بەرۋ ماۋسىمى كەزەڭىندە كوزدەلگەن مەجەنى ورىنداۋ جانە ەلدەگى كومىر تاپشىلىعىن بولدىرماۋ.
