قازىر وڭىردەگى اۋا رايى «تۇسكە دەيىن كيىز, تۇستەن كەيىن ءمۇيىز» دەگەنگە كەلىپ تۇرعانداي. ال ءتۇن سۋىدى. جەكەلەگەن ۇيلەر وت جاعىپ, جىلىنۋعا كىرىسكەن. وسىنداي قاۋىرت تىرلىك وبلىس ورتالىعى قوناەۆ قالاسىندا دا باستالدى. قالالىق تۇرعىن ءۇي-كوم-
مۋنالدىق شارۋاشىلىعى ءبولىمىنىڭ ماماندارىنىڭ مالىمەتىنشە, قىستان قىسىلماي شىعۋ ءۇشىن 29 مىڭ توننا كومىر قاجەت ەكەن. بۇگىندە تۇرعىندارعا قاجەتتى كومىردىڭ دەنى قالا اۋماعىنداعى ارنايى وتىن قويمالارىندا بار كورىنەدى.
– تۇرعىندارعا بيىلعى قىسقا 29 مىڭ توننا قاتتى وتىن قاجەت. قوناەۆ قالاسىندا 3 كومىر تۇيىعى بار, بۇگىندە وندا جالپى قورى 3 758 توننا ساقتاۋلى تۇر. س.سەيفۋللين كوشەسىندەگى №58 كومىر تۇيىعىندا «قاراجىرا» كومىرى ساتىلۋدا, ونىڭ ءار تونناسىنا قويىلعان باعا – 16 مىڭ تەڭگە. ال يندۋستريالنايا كوشەسىندەگى №9 كومىر تۇيىعىندا «شۇباركول» كومىرى بار, ونىڭ تونناسىن 15 500 تەڭگەدەن ساۋدالاپ جاتىر. سونداي-اق زارەچنوە اۋىلىندا «شۇباركول» كومىرىنىڭ ءار تونناسىن 14 550 تەڭگەدەن ساتىپ الۋعا بولادى. ال قالا بويىنشا جىلۋ تاراتاتىن كاسىپورىنداعى مازۋت قورى – 4 377,5 توننا. جوسپار بويىنشا جىلىتۋ كەزەڭىنە 4 727,5 توننا وتىن قاجەت. بۇگىنگە دەيىن Petrosun سەرىكتەستىگى قالاعا 350 توننا وتىن جەتكىزىپ بەردى. سەرىكتەستىكپەن ەكىجاقتى كەلىسىمشارتقا قول قويىلدى, – دەيدى قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ باسشىسى دارحان قاراعونىسوۆ.
قىسقا دايىندىق بارىسىندا قوناەۆ قالاسىنداعى جىلۋ جۇيەسىنىڭ 890 مەترىنە جەڭىل, 2 580 مەترىنە كۇردەلى جوندەۋ جاسالعان ەكەن. قازىر قالاداعى 1, 3, 4, 5, 18 شاعىن اۋداندارىنداعى قۇبىرلاردىڭ بارلىعى جاڭارعان. ال قالا بويىنشا بارلىعى 781 642 شارشى مەتر اۋماقتاعى تۇرعىن ءۇي مەن عيماراتتار ورتالىقتاندىرىلعان جىلۋ جۇيەسىنە قوسىلعان.
الماتى وبلىسى
