اگلومەراتسيالىق تسەح اقسۋ فەرروقورىتپا زاۋىتىنىڭ «ەڭ جاس» بولىمشەسى بولىپ سانالادى. سونداي-اق بارىنشا قالدىقسىز وندىرىسكە كوشۋگە باعىتتالعان ERG-ءدىڭ ەڭ اۋقىمدى ينۆەستيتسيالىق جوبالارىنىڭ ءبىرى.
2010 جىلى ىسكە قوسىلعان تسەح بۇرىننان قوردالانعان قالدىقتاردى وڭدەي باستاعان. ۇساق فراكتسيالى شيكىزات بالقىتۋ پەشتەرىنە جارامسىز سانالدى ءارى ونى بۇرىن ءۇيىندى رەتىندە ساقتاي بەرگەن. ال قازىر اگلومەراتسيالىق ماشينا ۇساق كەندى ءبىر-بىرىنە بىرىكتىرىپ, بالقىتۋ پەشتەرىنە ارنالعان دايىن ءونىم – اگلومەرات شىعارۋدا. وسى جەردە اقسۋ جانە اقتوبە فەرروقورىتپا زاۋىتتارىنىڭ گاز تازالاۋ قۇرىلعىلارى قارماپ العان شاڭدار دا وندىرىسكە قايتا باعىتتالاتىنىن اتاپ وتكەن ءجون.
– اقسۋ فەرروقورىتپا زاۋىتىندا الەمدىك ەكولوگيالىق ستاندارتتارعا ۇمتىلا وتىرىپ, قالدىقسىز ءوندىرىس تەحنولوگيالارى ءساتتى قولدانىلىپ كەلەدى. بۇل جەردە قوجدى قايتا وڭدەۋ تسەحى مەن اگلومەراتسيالىق تسەحتىڭ سەپتىگى زور. سوڭعىسىن «ەكولوگيالىق ەڭ تازا بولىمشە» دەپ اتاۋعا بولادى. سەبەبى اگلومەرات وندىرىسىنە بۇرىن پايداسىز بولعان ۇساق-تۇيەكتى باعىتتاپ قانا قويماي, تەك جاعىلىپ, اۋاعا ۇشقان فەرروقورىتپا گازى دا پايداعا اسا باستادى, – دەيدى كاسىپورىن ديرەكتورى ۆالەنتين چيحيچين.
«قازحروم» ترانسۇلتتىق كومپانياسىندا اگلومەراتسيالىق تسەحتىڭ ونىمدىلىگىن ارتتىرۋ ءۇشىن قايتا قۇرۋ باعدارلاماسى ازىرلەندى. الدىن الا ەسەپتەۋلەر بويىنشا ونى جۇزەگە اسىرۋعا 2 ملرد تەڭگەدەن استام قاراجات جۇمسالادى ەكەن. الايدا وسى ماڭىزدى بولىمشەنىڭ تيىمدىلىگىن ارتتىرۋعا قىزمەتكەرلەردىڭ يدەيالارىنىڭ سەپتىگى تيگەن. ولار ERG-ءدىڭ عىلىمي-زەرتتەۋ ينجينيرينگ ورتالىعىمەن بىرلەسىپ, ءوندىرىس تەحنولوگياسىنا دا, جابدىققا دا بىرقاتار وزگەرىس ەنگىزىپتى. اتاپ ايتقاندا, كونۆەيەرلىك تاسپانى ىستىققا ءتوزىمدى تاسپاعا اۋىستىرۋ جانە دايىن اگلومەرات جەلىسىن جەتىلدىرۋ ناتيجەسىندە اگلومەراتسيا ماشيناسىنىڭ جىلدامدىعى ارتقان. ال شيكىزات قۇرامىنا جاڭا كومپونەنتتى قوسۋ ناتيجەسىندە بىرىگۋ جىلدامدىعى ۇلعايعان.
– بىرلەسە ارەكەت جاساپ, ءبىز اگلوتسەحتىڭ ونىمدىلىگىن جىلىنا 50 مىڭ تونناعا دەيىن ارتتىرا الدىق. بىراق شەگىنە ءالى جەتكەن جوقپىز. بۇل – جوبا كومانداسىنىڭ العاشقى ۇلكەن جەڭىسى. الدىن الا باعالاۋ بويىنشا ءۇش باستامانى ەنگىزۋدىڭ پايداسى شامامەن 5,6 ملرد تەڭگە بولماق. الايدا يدەيالارىمىز مۇنىمەن تاۋسىلمايدى. وسى باعىتتاعى جۇمىستى ودان ءارى جالعاستىرامىز, – دەيدى اگلومەراتسيالىق تسەحتىڭ باسشىسى دميتري پولياكوۆ.
ەسكە سالا كەتەيىك, بۇگىنگى تاڭدا اقسۋ فەرروقورىتپا زاۋىتىنىڭ اگلومەراتسيالىق تسەحى – حروم جانە مارگانەتس اگلومەراتىن شىعاراتىن الەمدەگى جالعىز ءوندىرىس وشاعى.
