وسىدان كەيىن عانا مانتۋدىڭ ورنىنا بالالارعا تۋبەركۋلەزگە قارسى بتسج ەكپەسىن سالىپ جىبەرگەنى بەلگىلى بولعان. قاتەلىك جاساعان قىزمەتكەرلەر بالالاردىڭ اتا-انالارىنا شۋ كوتەرمەۋدى سۇراپ, ىرىڭدەگەن قولدارىن تاڭىپ بەرگەن. سوعان قاراماستان اتا-انالار وبلىستىق دەنساۋلىق ساقتاۋ باسقارماسىنا شاعىمداندى. وبلىستىق پروكۋراتۋرا قىلمىستىق ءىس قوزعادى.
اقتوبە وبلىسىندا بولعان جاعداي بويىنشا وبلىستىق دەنساۋلىق ساقتاۋ باسقارماسى تۇسىنىك بەردى. باسقارما باسشىسى رۇستەم يساەۆتىڭ حابارلاۋىنشا, قازىر وسى ورەسكەل قاتەلىك بويىنشا قۇرامىنا سانيتارلىق-ەپيدەميولوگيالىق قىزمەت, پەدياتر, يممۋنولوگ دارىگەرلەر كىرەتىن كوميسسيا قۇرىلدى. ودان وزگە وبلىستىق ءبىلىم باسقارماسى مەديتسينالىق قىزمەتتى باقىلاۋ كوميتەتىنە شاعىم ءتۇسىردى. بۇل جاقتان دا تاۋەلسىز ساراپشىلار مەن اتا-انالار كوميسسيامەن بىرگە جۇمىسىن باستادى.
«13 قىركۇيەكتە №74 مەكتەپتىڭ 1-سىنىبىندا وقيتىن 61 بالاعا جوسپارعا سايكەس مانتۋ جاسالۋى كەرەك ەدى. مانتۋ – دياگنوستيكا, بتسج رەۆاكتسيناسى سالىنباس بۇرىن بالا اعزاسىندا تۋبەركۋلەز تاياقشاسىنىڭ بار-جوعىن انىقتايدى. بۇل جولى سول سىنىپتاعى 11 بالانىڭ اتا-اناسى ەكپەگە رۇقساتىن بەرمەيدى, بالالار دارىگەرى 8 وقۋشىنى تاعى بوساتادى. الايدا مەدبيكە پروتسەدۋرالىق بولمەدە مانتۋ مەن بتسج قۇتىلارىن شاتاستىرىپ العان. مانتۋدىڭ قۇتىسى كىشكەنتاي, ىشىندە سۇيىقتىعى بار, ال بتسج ۇنتاق تۇرىندە بولادى دا, ونى ەگۋ الدىندا ارالاستىرادى. مانتۋدىڭ ورنىنا بتسج سالعانى بالالاردىڭ قولدارى ءىسىپ كەتكەننەن كەيىن 15 كۇندە بەلگىلى بولدى», دەدى وبلىستىق دەنساۋلىق ساقتاۋ باسقارماسىنىڭ باسشىسى رۇستەم يساەۆ.
قالاداعى №74 مەكتەپ وقۋشىلارىنا مەديتسينالىق قىزمەت كورسەتۋدى «مەديكۋس-تسەنتر» ورتالىعى جۇزەگە اسىرادى. وسى مەكەمە 2022 جىلعا جەرگىلىكتى بيۋدجەتتەن 600 ملن تەڭگە مەملەكەتتىك تاپسىرىس العان. مانتۋدىڭ ورنىنا تۋبەركۋلەزگە قارسى ەكپە سالىنعان بالالاردىڭ جاعدايىن قازىر دارىگەرلەر ءجىتى باقىلاپ وتىر. ءبىر جارىم ايدان سوڭ جاعدايى قالىپقا تۇسەدى دەيدى. ء«السىز تۋبەركۋلەز شتامىنان جاسالاتىن بتسج ەكپەسى وكپە دەرتىن قوزعامايدى, كەرىسىنشە تۋبەركۋلەزگە يممۋنيتەت قالىپتاستىرادى. ءوز جۇمىسىنا سالعىرت قاراعان بالالار دارىگەرى مەن مەكتەپ مەدبيكەسى جۇمىستارىنان بوساتىلدى», دەدى دەنساۋلىق ساقتاۋ باسقارماسىنىڭ باسشىسى.
ورەسكەل قاتەلىك جىبەرگەن بالا دارىگەرىنىڭ 34 جىل ەڭبەك ءوتىلى بولسا, قۇتىلاردى شاتاستىرعان مەدبيكە 10 جىلدان استام ءوز سالاسىندا ەڭبەك ەتىپ كەلگەن, وسى مەكتەپكە كەلگەنىنە ءۇش جىل بولعان. قازىر زارداپ شەككەن وقۋشىلار قۇنارلى تاماقپەن قامتاماسىز ەتىلىپ, دارۋمەندەر بەرىلدى. 42 بالانىڭ اعزاسى ءبىر جارىم ايدان سوڭ قالىپقا كەلەدى دەپ بولجام جاساپ وتىر دارىگەرلەر. وسى جىلدىڭ سوڭىندا №74 مەكتەپ «مەديكۋس-تسەنتر» جەكە ەمحاناسىنىڭ قاراۋىنان الىنىپ, قارعالى قالالىق اۋرۋحاناسىنىڭ قاراماعىنا كوشىرىلەدى.
اقتوبە وبلىسى
