مەديتسينا • 28 قىركۇيەك، 2022

قاراشادا تۇماۋدىڭ ءۇش شتاممى تارالۋى مۇمكىن

78 رەت كورسەتىلدى

دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتارلىق دارىگەر ايجان ەسماعامبەتوۆا وكق بريفينگىندە قازاقستانداعى تۇماۋدىڭ شتاممدارى تۋرالى ايتتى، دەپ حابارلايدى Egemen.kz.

ايجان ەسماعامبەتوۆانىڭ ايتۋىنشا، ەلدە جىل سايىن تۇماۋ ۆيرۋسىنىڭ اينالىمى قاراشا ايىنان باستالىپ، ءساۋىر ايىنىڭ ورتاسىنا دەيىن سوزىلادى.

«ددۇ مالىمەتتەرى بويىنشا الداعى ەپيدەميالىق ماۋسىمدا ۆيرۋستىڭ ءۇش شتاممى وزەكتى بولادى، ولار A (H1N1)، A (H3N2) جانە B»، دەدى باس مەملەكەتتىك سانيتارلىق دارىگەر.

ول وتكەن جىلى جرۆي-مەن 3،9 ملن ادام اۋىرعانىن جانە 2019-2020 جىلعى ەپيدەميولوگيالىق ماۋسىممەن سالىستىرعاندا رەسپۋبليكا بويىنشا سىرقاتتانۋ 1،3 ەسە وسكەنىن ايتتى. ءوسىم قاراعاندى وبلىسىن قوسپاعاندا، بارلىق وڭىرلەردە بايقالدى. ناۋقاستاردىڭ 80%-ى بالالار مەن جاسوسپىرىمدەرگە تيەسىلى.

«سونىمەن قاتار جىل سايىن اينالىمداعى شتاممدار وزگەرىپ وتىراتىنى بايقالدى. وتكەن ماۋسىمدا تۇماۋ ۆيرۋسىنىڭ 2 شتاممى – A (H3N2) جانە B اينالىمدا بولدى، بارلىعى 915 تۇماۋ جاعدايى انىقتالدى، جۇيەلەۋ ناتيجەلەرى بويىنشا شتاممدار ۆاكتسينالىق شتاممدارعا سايكەس كەلدى»، دەپ قوستى ۆيتسە-مينيستر. 

قازاقستاندا تۇماۋدان بولەك باسقا دا ۆيرۋستار انىقتالدى. وتكەن ماۋسىمدا بارلىعى 10 مىڭنان استام ۇلگى زەرتتەلدى، ولاردىڭ ىشىندە رينوۆيرۋس، مس ۆيرۋسى، ادەنوۆيرۋستىق ينفەكتسيا، پاراگريپپ، مەتاپنەۆموۆيرۋس، بوكاۆيرۋستىق ينفەكتسيا انىقتالدى.

باس سانيتارلىق دارىگەر اۋرۋدىڭ الدىن الۋدىڭ ەڭ ءتيىمدى ءادىسى ۆاكتسيناتسيا ەكەنىن اتاپ ءوتتى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار