ايماقتار • 28 قىركۇيەك، 2022

قازاقستاننىڭ قوعامدىق ۇيىمدارى كونترافاكتىلىك ونىمدەرمەن كۇرەستى باستادى

54 رەت كورسەتىلدى

ەلىمىزدەگى «ادام دەنساۋلىعىنا قاۋىپ فاكتورلارىنىڭ زياندىلىعىن ازايتۋ جونىندەگى ۇلتتىق قاۋىمداستىعى – «دەنساۋلىق» زتب كونترافاكتىلىك تاۋارلاردىڭ كىرۋىنە قارسىلىق ءبىلدىرىپ، قوعامدىق-كوممۋنيكاتسيالىق اكتسياعا مۇرىندىق بولىپ وتىر، دەپ حابارلايدى Egemen.kz.

بۇل باستاماعا «قازاقستان تۇتىنۋشىلار ليگاسى» قاۋىمداستىعى» زتب مەن BMF Analytics، Bisam اگەنتتىگى دە قوسىلدى.

ەندى وسى جوبانىڭ اياسىندا قازاقستاننىڭ 10 قالاسىندا حالىقتىڭ دەنساۋلىعى مەن قاۋىپسىزدىگىنە قاۋىپ توندىرەتىن زاڭسىز، كونترافاكتىلىك جانە رەتتەلىنبەگەن ونىمدەردىڭ اينالىمىنا جول بەرمەۋ ماقساتىندا زەرتتەۋلەر مەن مونيتورينگتەر جۇرگىزىلمەك.

«قازاقستان تۇتىنۋشىلار ليگاسى» قاۋىمداستىعى» زتب مالىمەتتەرىنە سۇيەنسەك، الدىن الا بولجامدارعا سايكەس، كونترافاكتىلىك ونىمدەر تەك ءبىر عانا الماتى قالاسىنىڭ وزىندە 20-30%-عا وسكەن. سول سياقتى 2022 جىلدىڭ قىركۇيەگىندە قارجى مونيتورينگى اگەنتتىگىنىڭ اقمولا وبلىستىق  دەپارتامەنتى مەملەكەتتىك كىرىستەر دەپارتامەنتىمەن بىرلەسىپ، اقمولا جانە سولتۇستىك قازاقستان اۋماعىندا وتكىزۋ ماقساتىندا قوماقتى كولەمدە الكوگول ءونىمىن تاسىمالداۋ جانە ساقتاۋ  زاڭسىز ارەكەتتەرىنىڭ جولىن كەسكەن. ال كوكشەتاۋ جانە پەتروپاۆل قالالارىندا جالپى سوماسى 18،5 ميلليون تەڭگەدەن اساتىن جالپى كولەمى 9،5 توننا ءسپيرتى بار سۇيىقتىق تابىلىپ، تاركىلەندى.

وكىنىشكە قاراي، قازىرگى ۋاقىتتا كوتەرمە جانە بولشەك ساۋدا بازارلارى، الەۋمەتتىك جەلىلەر مەن ينتەرنەت-دۇكەندەر كونترافاكتىلىك ونىمدەردى ساتۋدىڭ باستى ارناسى بولىپ تۇر. زاڭسىز ونىمدەرگە دەگەن سۇرانىستى حالىق تابىسىنىڭ تومەندەگى مەن كونترافاكتىلىك تاۋارلاردىڭ ارزاندىعىنان تۋىنداپ جاتقانىن جوققا شىعارماۋ قاجەت.

جاڭا باستاما تۋرالى «ادام دەنساۋلىعىنا قاۋىپ فاكتورلارىنىڭ زياندىلىعىن ازايتۋ جونىندەگى ۇلتتىق قاۋىمداستىعى – «دەنساۋلىق» باسشىسى زتب باقىت تۇمەنوۆا: «ساپالى جانە دەنساۋلىققا پايدالى ونىمدەردى تاڭداۋدا حالىقتى اقپاراتتاندىرۋ ماڭىزدى ءرول اتقارادى. مۇنداي جاعدايدا بۇقارالىق اقپارات قۇرالدارى مەن زاماناۋي كوممۋنيكاتسيا قۇرالدارى ماڭىزدى ءرول اتقارا الادى. سوندىقتان وتكەن جىلدىڭ سوڭىندا زاڭسىز جانە رەتتەلمەيتىن ونىمدەرمەن كۇرەسۋگە مۇددەلى سەرىكتەستەردى تالقىلاۋعا قاتىسۋعا شاقىرۋ ماقساتىندا ءبىزدىڭ قاۋىمداستىقتىڭ بازاسىندا اشىق الاڭ قۇرۋدى ۇسىندىق. ءبىزدىڭ ۇسىنىسىمىزعا ۇزدىك قازاقستاندىق ساراپشىلار ءۇن قاتقاندىقتان، بۇگىندە ءبىز قازاقستان نارىعىن جايلاعان كونترافاكتىلىك ونىمدەرمەن كۇرەسۋ جونىندەگى قوعامدىق-كوممۋنيكاتسيالىق كومپانيانىڭ باستالعانى تۋرالى قۋانا حابارلايمىز. وسى ماسەلەگە مەملەكەتتىك ورگاندار مەن جۇرتشىلىقتىڭ نازارىن اۋدارۋ ماقساتىندا كونترافاكتىلىك تاۋارلار نارىعىنا زەرتتەۋلەر مەن مونيتورينگتەر جاساي وتىرىپ، حالىق اراسىندا ساۋالناما جۇرگىزۋ، ءباسپاسوز شارالارىن، دوڭگەلەك ۇستەلدەر مەن بريفينگتەر وتكىزۋدى جوسپارلاپ وتىرمىز»، دەگەن مالىمدەمە جاسادى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار