ەندى ەسكى قازاقستاننان ەستى قازاقستانعا بەت بۇراتىن ۋاقىت كەلىپ جەتتى. سول جولدا ءبىز بىرلىگىمىزدى كورسەتە ءبىلۋىمىز كەرەك. ويتكەنى قاي كەزدە دە بىرلىك قىمبات. ءدال قازىر جەر-جاھاندى مەكەن ەتكەن مەملەكەتتەردىڭ مازاسى كەتىپ تۇر. شيەلەنىسكە تولى گەوساياسي جاعداي الەم ەلدەرىن ابىگەرگە سالعان وسى ءبىر بەيمازا شاقتا ءبىرتۇتاس ەل ەكەنىمىزدى كورسەتۋىمىز قاجەت. مەنىڭ تۇسىنىگىمدە پرەزيدەنت ايتقان ادىلەتتى قازاقستان يدەياسى – ومىرشەڭ. وتكەنگە زەر سالا وتىرىپ, بولاشاقتى باعدارلايتىن ۋاقىت تۋدى. پرەزيدەنتتىڭ تىكەلەي باسشىلىعىمەن جۇرگىزىلىپ جاتقان ىشكى جانە سىرتقى ساياساتىمىز – ەل تىنىشتىعىنىڭ كەپىلى. سول باعىتتا اۋقىمدى جۇمىس اتقارىلىپ جاتىر.
قاسىم-جومارت توقاەۆ پرەزيدەنت سايلاۋىن 7 جىلدىق مەرزىمدى قامتيتىن ءبىر مەرزىمگە قىسقارتقانى – قۇپتارلىق قادام. وسى ورايدا 20 قاراشا كۇنى كەزەكتەن تىس پرەزيدەنت سايلاۋى وتەتىن بولىپ بەكىدى.
الەمدە بولىپ جاتقان وزگەرىستەردىڭ ءبىر پاراسى ءبىزدىڭ ەلدى سىرت اينالىپ وتپەسى راس. سوعىس ادامزاتتى توزدىرادى. ەلدى وركەنيەت كوشىنەن 100 جىلعا كەرى ىعىستىرادى. قاي كەزدە دە بايبالامعا سالماي, سىندارلى ديالوگكە بەت بۇرعان ەلدىڭ, ماسەلەنى ديپلوماتيالىق جولمەن ىڭعايلاستىرۋعا داعدىلانعان مەملەكەتتىڭ مەرەيى ۇستەم بولادى. ول جاعىنان ەشكىمنەن شەت قالىپ جاتقان جوقپىز. قايتا تالاي ەلگە ۇلگى بولارلىق قادامدارىمىز جەتىپ-ارتىلادى.
بۇگىندە ءبىز ءۇشىن تاتۋلىقتان اسقان بايلىق تا, باقىت تا جوق. ال ادىلەتتى قازاقستان يدەياسىن ىسكە اسىرۋ ءۇشىن قازاقستاندىقتار جۇدىرىقتاي جۇمىلا ءبىلۋى كەرەك. ەل مۇراتى سىنعا تۇسەتىن كەزەڭدە سامارقاۋلىق تانىتۋعا بولمايدى.
ءابدىمومىن جەلدىباەۆ,
قازاقستاننىڭ ەڭبەك سىڭىرگەن مادەنيەت قايراتكەرى
جامبىل وبلىسى
