ت.دۇيسەنوۆا مەملەكەت باسشىسى ءوز جولداۋىندا جاستاردى جۇمىسپەن قامتۋدى قامتاماسىز ەتۋ جانە ەڭبەك رەسۋرستارىنىڭ ساپاسىن ارتتىرۋ ماسەلەلەرىنە ەرەكشە نازار اۋدارعانىن اتاپ ءوتتى.
«جىل سايىن رەسپۋبليكا بويىنشا 300 مىڭنان اسا جاس ەڭبەككە قابىلەتتى جاسقا جەتىپ, ەڭبەك نارىعىنا شىعادى. 2030 جىلعا قاراي جۇمىس كۇشىندەگى جاستار ۇلەسى 60 پايىزعا جەتەدى دەپ كۇتىلۋدە. ولاردىڭ جۇمىسپەن قامتىلۋىن قامتاماسىز ەتۋ ءۇشىن مەملەكەتتىك جانە جەكە باستامالار اياسىنداعى جوبالار بويىنشا جىل سايىن جاستار ءۇشىن مەملەكەت تاراپىنان سۋبسيديالاناتىن 100 مىڭنان اسا جۇمىس ورىندارى اشىلادى. جاستاردى جۇمىسپەن قامتۋعا جاردەمدەسۋدىڭ بەلسەندى شارالارىمەن قامتۋ كەڭەيەدى. جىل سايىن 40 مىڭ تۇلەك جاستار تاجىريبەسىنە قاتىسادى. «ديپلوممەن – اۋىلعا!» باعدارلاماسىنا قاتىسۋشىلار ءۇشىن جاستار تاجىريبەسىنىڭ بولىگى رەتىندە تولەنەتىن ءتيىستى تولەمدەرگە تەڭ بولاتىنداي قوسىمشا جاردەماقى بەلگىلەنەدى. «العاشقى جۇمىس» جوباسى ۇبت تاپسىرا الماعان نەمەسە وقۋىن جالعاستىرماعان مەكتەپ تۇلەكتەرىنە ارنالىپ, قايتا باعىتتالادى», دەدى ت.دۇيسەنوۆا.
پرەزيدەنتتىڭ تاپسىرماسى بويىنشا مينيسترلىك اگروكرەديتتىك كورپوراتسيامەن بىرلەسىپ, جاستاردىڭ كاسىپكەرلىك باستامالارىن قولداۋ ماقساتىندا جىلدىق مولشەرلەمەسى 2,5 پايىزبەن جەڭىلدەتىلگەن نەسيە بەرۋدىڭ تەتىكتەرى مەن پارامەترلەرىن ازىرلەپ جاتقانىن قوسىمشا ايتىپ ءوتتى. جىل سايىن بۇل قولداۋدى 6 مىڭعا دەيىن جاس پايدالانادى. بۇل ماقساتتارعا بيۋدجەتتە قاراستىرىلعان سوما جىل سايىن شامامەن 30 ملرد تەڭگەنى قۇرايدى. حالىقتىڭ الەۋمەتتىك وسال توپتارىنداعى جاستارعا بيزنەس-يدەيالارىن جۇزەگە اسىرۋ ءۇشىن جىل سايىن 1,2 ملن تەڭگەدەن اسا سوماعا 9 مىڭ قايتارىمسىز گرانت بەرىلەدى.
سونىمەن قاتار ەلىمىزدىڭ سولتۇستىك جانە ورتالىق وڭىرلەرىنە رەتتەلەتىن ىشكى كوشى-قوندى ۇيىمداستىرۋ تاسىلدەرى قايتا قارالدى. ءاربىر قابىلداۋشى ءوڭىر قونىس اۋدارۋدى ىنتالاندىرۋ ءۇشىن جۇمىس كۇشى تاپشىلىعىن سەزىنىپ وتىرعان ەكونوميكانىڭ باسىم سەكتورلارىن انىقتايتىن ارنايى وڭىرلىك باعدارلاما ازىرلەۋدە. ەلىمىزدىڭ باسقا وڭىرلەرىندە قۇرىلعان قولدانىستاعى بيزنەس-جوبالاردى كوشىرۋدى جانە كەڭەيتۋدى كوزدەيتىن سولتۇستىك جانە ورتالىق وڭىرلەر ءۇشىن 100 بيزنەس-جوبادان تۇراتىن كەيس قالىپتاسادى. قونىس اۋدارۋدى ىنتالاندىرۋ ءۇشىن قونىس اۋدارۋ اۋماعىنداعى تۇرعىن ءۇي قۇنىنىڭ 50%-ىنا دەيىن وتەماقى الۋعا قۇقىق بەرەتىن ۇتقىرلىق سەرتيفيكاتى ەنگىزىلەدى.
«مەملەكەت باسشىسى ايقىنداعان كەلەسى باسىمدىق – حالىقتىڭ تابىسىن ارتتىرۋ, جۇمىس ىستەيتىن ازاماتتاردىڭ قۇقىقتارىن قورعاۋ جانە حالىقتىڭ الەۋمەتتىك وسال ساناتتارىن قولداۋ شارالارىن كۇشەيتۋ. اتالعان تاپسىرمانى ورىنداۋ ماقساتىندا دۇنيەجۇزىلىك بانكپەن بىرلەسىپ, ەڭ تومەنگى جالاقىنى بەلگىلەۋ ادىستەمەسىن ازىرلەۋگە كىرىستىك. جۇمىستى كەلەسى جىلدىڭ ناۋرىز ايىندا اياقتاۋ جوسپارلانعان. ادىستەمەنى ىسكە اسىرۋ نەگىزگى الەۋمەتتىك-ەكونوميكالىق كورسەتكىشتەردى ەسكەرە وتىرىپ, ەڭ تومەنگى جالاقى مولشەرىن بەلگىلەۋگە تەڭگەرىمدى پايىمدى قامتاماسىز ەتەدى. پرەزيدەنت جاريالاعان كەلەسى جىلدىڭ 1 قاڭتارىنان باستاپ ەڭ تومەنگى جالاقىنى كوتەرۋ باستاماسى جالاقىسى ەڭ تومەنگى جالاقى دەڭگەيىندە بولعان 1 ملن 800 مىڭ قىزمەتكەرگە اسەر ەتەدى. ول سونداي-اق باسقا جۇمىس ىستەيتىن ازاماتتاردىڭ ەڭبەكاقىسىنا ساناتتارى مەن بىلىكتىلىكتەرىنىڭ ىقپالىن ەسكەرە وتىرىپ, ولاردىڭ تابىسىن ارتتىرادى. سونىمەن قاتار جىل باسىنان بەرى جۇرگىزىلگەن كەلىسسوزدەر ناتيجەسىندە 1,8 مىڭعا جۋىق جۇمىس بەرۋشى 1,2 ملن-نان اسا جۇمىسكەر جالاقىسىن ورتاشا ەسەپپەن 5-تەن 50 پايىزعا دەيىن ءوسىردى», دەدى ت.دۇيسەنوۆا.
2023 جىلدان باستاپ جۇمىسىنان ايىرىلعانى ءۇشىن تولەنەتىن الەۋمەتتىك تولەمدەردىڭ مولشەرى دە جۇمىسپەن قامتىلعان ازاماتتار تابىسىنىڭ 45%-ىنا دەيىن ۇلعايتىلادى. ۆەدومستۆو باسشىسى بالالى وتباسىلاردى قولداۋ ۇلتتىق ساياساتتىڭ باسىمدىعى بولىپ قالا بەرەتىنىن باسا ايتتى. ۇكىمەت پەن ۇلتتىق بانك مەملەكەت باسشىسىنىڭ 2024 جىلدان باستاپ «بالالارعا ارنالعان ۇلتتىق قور» جوباسىن ىسكە قوسۋ تۋرالى باستاماسىن ىسكە اسىرۋ تەتىگىن ازىرلەۋدە. بالا كۇتىمى بويىنشا تولەم مەرزىمىن 1 جاستان 1,5 جاسقا دەيىن ۇزارتۋ جۇمىس ىستەيتىن اتا-انالارعا دا, جۇمىس ىستەمەيتىن اتا-اناعا دا قاتىستى بولادى.
