بۇل ورايدا پرەزيدەنتىمىز ەلىمىزدەگى ەلەۋلى وزگەرىستەر تۋرالى, تىڭ رەفورمالار مەن مەملەكەتىمىزدىڭ يدەولوگيالىق باعىتتارى تۋرالى ناقتى ءارى بۇكپەسىز ويلارىن جەتكىزدى.
وسىنداي توڭىرەگىمىز تۇگەل شىتىناپ تۇرعاندا شىن مانىندە ەلىمىز ءۇشىن ەڭ ماڭىزدىسى – بەرەكە-بىرلىگىمىز. بۇل – قازىرگى سىن-قاتەرلەرگە توتەپ بەرە الاتىن جالعىز قۇندىلىعىمىز.
«جەرىمىزدىڭ بۇتىندىگى جانە ەلىمىزدىڭ اماندىعى – ءبىز ءۇشىن بارىنەن ماڭىزدى. مەملەكەتتەردىڭ تەرريتوريالىق تۇتاستىعى مىندەتتى تۇردە ساقتالۋى كەرەك. بۇل – نەگىزگى قاعيدات. مەن مۇنى حالىقارالىق ارەنادا ۇنەمى اشىق جانە انىق ايتىپ ءجۇرمىن. جاقىندا بىرىككەن ۇلتتار ۇيىمىنا بارىپ, ەڭ بيىك مىنبەردەن بۇل تۋرالى تاعى دا مالىمدەدىم. مۇنىڭ ءبارى بەكەر ەمەس. اينالامىزدا اۋقىمدى سوعىس بولىپ جاتىر. ءبىز وسىنى ەسكەرە وتىرىپ, ەڭ الدىمەن, ەلىمىزدىڭ قاۋىپسىزدىگىن ويلاۋىمىز كەرەك. شەكارامىز ءبۇتىن بولسا, سىرتتان شابۋىل جاسالماسا, ءتورت قۇبىلامىز تۇگەل بولادى. بۇل – مەملەكەتىمىز ءۇشىن, مەن ءۇشىن اسا ماڭىزدى مىندەت ءارى باستى ماقسات», دەدى پرەزيدەنت.
مەملەكەت باسشىسى سونىمەن قاتار ەلدەگى رەفورمالارعا دا كەڭىنەن توقتالدى. وسى ورايدا ەل كونستيتۋتسياسىنا ەنگەن وزگەرىستەر تۋرالى, ونىڭ ىشىندە 7 جىلدىق ءبىر عانا مەرزىمگە سايلاۋعا ءتۇسۋ قۇقىعى تۋرالى دا ايتتى.
ءيا, بۇل ساپاردىڭ ساياسي تۇرعىدان بولەك رۋحاني ولشەمى دە ءبىر توبە. كيەلى توپىراققا بارىپ, مەدەت قىلۋ – جاقسىلىقتىڭ, ءيىسى قازاقىلىقتىڭ ايقىن بەلگىسى دەپ بىلەمىن. مەملەكەتىمىز ۇلكەن وزگەرىستىڭ الدىندا تۇر. بۇل ورايدا ءبىز رەفورمالاردىڭ ءبىر ساعاتتىق نە بولماسا ءبىر كۇندىك دۇنيە ەمەس ەكەندىگىن ەسكەرۋىمىز كەرەك.
ەلىمىز امان, جۇرتىمىز تىنىش بولسىن!
ناريمان تورەعالي ۇلى,
سەنات دەپۋتاتى
