قىركۇيەكتىڭ ميزامىندا وبلىستىق ونەر مۋزەيىنىڭ مۇرىندىق بولۋىمەن, شىعىستىڭ ءبىر توپ سۋرەتشىلەرى اساي-مۇسەيلەرىن اسىنىپ, پلەنەرگە شىققان. راس, ءوڭىردىڭ قاي بۇرىشى بولماسىن, تابيعاتى قۇلپىرىپ تۇر. ءتىپتى جازدىڭ كۇنى مۇنشالىقتى سۇلۋ بولار ما ەدى؟!
ءداستۇرلى پلەنەردە قىلقالام شەبەرلەرى ءبىر جىلى باتىس التايدى بەينەلەسە, ەندى بىردە كاتونقاراعاي اسىپ كەتەدى. بيىلعى ساپار ۇلان اۋدانىنا ءتۇستى. وسكەمەننەن تىم قاشىق ەمەس, باياش وتەپوۆ اۋىلىنا جەتىپ توقتاعان. بۇل مەكەننىڭ تاۋ-تاسى, ورمان-توعايى وزگە جەرگە ۇقسامايدى. تاۋ باسى تاقىرلاۋ بولىپ كەلگەنىمەن, ەتەگىنەن سىزىلىپ وزەن اعادى. وزەن بويى تۇتاسقان ورمان.
قۇداش نۇرسادىقوۆ, ۆيكتور كالينين, ەرجان تۇرعانباەۆ سىندى كاسىبي سۋرەتشىلەر اۆتوبۋستان تۇسە سالا, ءار جەرگە ورنىعىپ الىپ, ەتيۋد جازۋعا كىرىسىپ كەتتى. ال «جۇلدىز» ونەر مەكتەبىنىڭ بەينەلەۋ ونەرى ءپانى مۇعالىمدەرى ەلەنا ماشكينا, وكسانا ارتەمەنكولار الدىڭعى تولقىن اعالارىنان اقىل-كەڭەس الىپ, شەبەرلىكتەرىن شىڭدادى.
ءداستۇرلى پلەنەردە «جاڭعىرۋ» شىعارماشىلىق بىرلەستىگىنىڭ مۇشەلەرى ءمادي قايىرحان مەن دانيار الدابەرگەنوۆ تاڭداي قاقتىرار ەتيۋدتەر جازىپ, ۇستازدارى تاراپىنان جىلى لەبىزدەر ەستىدى.
– تابيعات اياسىنداعى ەتيۋد شىنايى ءارى قۇندى. جاندى كارتينا دەۋگە بولادى. بيىل كەزەكتى كۇزگى پلەنەرگە شىقتىق. وسى ساپاردى ۇيىمداستىرعان ونەر مۋزەيى قىزمەتكەرلەرىنە ريزامىز. سونداي-اق ءبىزدىڭ بويىمىزداعى ازداعان ونەردى بايقاپ, جەتەلەپ جۇرگەن ۇستازدارىما العىس ايتامىن, – دەيدى جاس سۋرەتشى ءمادي قايىرحان.
بۇگىنگى پلەنەردىڭ ەرەكشەلىگى, كارتينا جازعاندى قويىپ, قولعا قىلقالام ۇستاپ كورمەگەن مۋزەي قىزمەتكەرلەرى دە كەنەپ بەتىنە بوياۋ ءتۇسىردى. كاسىبي سۋرەتشىلەردىڭ باعىت-باعدارىنا قۇلاق اسا وتىرىپ جازىلعان پولوتنولارعا قاراپ, ناعىز شەبەرلەردىڭ جۇمىسى دەرسىز.
كۇنى بويى تىنباي ەتيۋد جازىلدى, كەشكىلىك كورمە ۇيىمداستىرىلدى. ۇزدىك كارتينا اۆتورلارى ونەر مۋزەيىنىڭ اتىنان سەرتيفيكاتتار مەن كادەسىيلار تابىستالدى.
شىعىس قازاقستان وبلىسى
