رەسەيدىڭ بەس گۋبەرنياسىمەن شەكتەسىپ جاتقان باتىس قازاقستان وبلىسىندا 6 شەكارالىق كەدەن بەكەتى ورنالاسقان. قىركۇيەكتىڭ 21-ىنەن باستاپ وسى بەكەتتەردىڭ بارىندە دە ءبىزدىڭ ەلىمىزگە كەلۋشى رەسەيلىكتەردىڭ سانى ارتقان.
سوڭعى ستاتيستيكالىق مالىمەتتەر بويىنشا, رەسەي فەدەراتسياسىنان 21 قىركۇيەكتە – 186 ادام, 22 قىركۇيەكتە – 532 ادام, 23 قىركۇيەكتە – 362 ادام, 24 قىركۇيەكتە – 410 ادام, 25 قىركۇيەكتە – 302 ادام ءتيىستى تىركەۋدەن وتكەن.
«قازىرگى تاڭدا باتىس قازاقستان وبلىسى اۋماعىندا رەسەي فەدەراتسياسىنىڭ 12 265 ازاماتى تىركەلگەن. سونىڭ ىشىندە 1307 ادام وسى قىركۇيەك ايىندا كەلدى. وتكەن 2021 جىلى وسى كەزەڭدە 5882 رەسەيلىك ازامات بولعان», دەپ حابارلادى باتىس قازاقستان پوليتسيا دەپارتامەنتىنىڭ ءباسپاسوز قىزمەتى.
ەلىمىزگە, سونىڭ ىشىندە ورال قالاسىنا كەلگەن رەسەيلىكتەردى قارسى الۋ, ورنالاستىرۋ, قۇقىقتىق جانە تۇرمىستىق كومەك كورسەتۋ ءۇشىن وڭىردەگى ەرىكتىلەر ىسكە كىرىسكەن. ولار رەسەيلىكتەردى شەكارا بەكەتىنەن ورال قالاسىنا دەيىن تاسىمالداۋ, تۇنەمەلىك ورىندار تاۋىپ بەرۋ, قازاقستاندىق ۇيالى بايلانىس كارتالارىن قوسۋ, كوشى-قون بولىمدەرىنە تىركەۋ ت.ب. ماسەلەلەردە قولعابىس بەردى. ورال قالاسىنىڭ بىرنەشە جەرىندە كەلۋشىلەرگە كومەك ورىندارى ۇيىمداستىرىلدى. ول جەرگە ءتۇرلى سۋسىن, ىستىق تاماق تاراتىلعان.
سوڭعى كۇندەرى ورال قالاسىندا ءبىر تاۋلىككە جالعا بەرىلەتىن پاتەرلەردىڭ باعاسى 1,5-2 ەسەگە كوتەرىلىپ كەتكەنى تۋرالى ايتقان ەدىك. جەرگىلىكتى تۇرعىنداردىڭ, كاسىپكەرلەر مەن ەرىكتىلەردىڭ كومەگىمەن رەسەيلىكتەر تۇنەپ شىعۋى ءۇشىن كينوتەاترلاردا, بالالاردىڭ جازعى دەمالىس لاگەرلەرىندە ارزان نەمەسە تەگىن جايلار ۇيىمداستىرىلىپ جاتىر.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باتىس قازاقستان وبلىسى بويىنشا فيليالى ورال قالالىق حالىققا قىزمەت كورسەتۋ بولىمدەرىنە جۇگىنۋشىلەر قاتارى شامادان تىس ارتۋىنا بايلانىستى رەسەي فەدەراتسياسى ازاماتتارىن بولەك قابىلداۋ ءۇشىن ورال قالالىق №1 حقو ءبولىمىن بەكىتىپ قويدى. جاعداي قالىپقا تۇسكەنگە دەيىن جەرگىلىكتى ازاماتتار قۇجاتتارىن رەتتەۋ ءۇشىن ورال قالاسىنداعى №2 بولىمگە كەلەتىن بولدى.
ء«بىزدىڭ «اتامەكەن» بالالار مەن جاسوسپىرىمدەر ءتۋريزمى جانە ەكولوگيا ورتالىعى دا سوڭعى كۇندەرى رەسەيدەن كەلۋشى ميگرانتتاردى قابىلداي باستادى. ولار پروكۋراتۋرانىڭ, كوشى-قون پوليتسياسىنىڭ نازارىندا. قۇجاتتارىنىڭ كوشىرمەسى الىنىپ, ءتيىستى تىركەۋدەن وتۋدە. كەشە 70 ازامات كەلدى. بىزدە سالىستىرمالى تۇردە قونۋ اقىسى ارزان, كۇنىنە 2 مىڭ تەڭگە», دەدى ورتالىق ديرەكتورى ايبولات قۇرىمباەۆ.
ارينە, سىرتتان كەلۋشىلەردىڭ كۇرت كوبەيۋىنە الاڭداپ جاتقاندار دا از ەمەس. بىراق حالىقتىڭ كوپشىلىگى سىن ساتتە ادامشىلىقتان اينىماي, مۇقتاج جاندارعا قول ۇشىن سوزايىق دەگەن پىكىردە.
باتىس قازاقستان وبلىسىنىڭ كوشى-قون قىزمەتى وڭىردەگى احۋالدى قاتاڭ قاداعالاپ, شەتەلدىكتەردىڭ ەل اۋماعىندا ءجۇرۋىن زاڭعا سايكەس باقىلاۋدا ۇستايتىنىن ايتۋدا.
«سوڭعى 8 اي ىشىندە سوت شەشىمىمەن 165 شەتەلدىك ەل اۋماعىنان شىعارىلدى. سوت شەشىمىن ءوز ەركىمەن ورىنداۋ ءۇشىن شەتەلدىكتەرگە 10 كۇن مۇرسات بەرىلەدى. الايدا وزبەكستان رەسپۋبليكاسىنىڭ 15 ازاماتى بەلگىلەنگەن ۋاقىتتا قازاقستان اۋماعىنان شىقپاي, سوت شەشىمىن ورىنداماي, جاسىرىنىپ قالماق بولعان. ول ازاماتتار ماڭعىستاۋ وبلىسى بەينەۋ اۋدانىنداعى تاجەن بەكەتىنە كۇزەتپەن جەتكىزىلىپ, شەكارادان ەرىكسىز شىعارىلدى. بۇدان بولەك, ەش قۇجاتسىز ەلىنە ورالا الماي جۇرگەن 4 وزبەكستان ازاماتىن دا اقتاۋ قالاسىنداعى وزبەك كونسۋلدىعىنا جەتكىزىپ, ەلىنە جونەلتتىك. باتىس قازاقستان وبلىسى اۋماعىندا شەتەلدىك ازاماتتاردىڭ زاڭ مەن ءتارتىپ بۇزباي ءجۇرۋى قاتاڭ قاداعالانادى», دەدى پوليتسيا دەپارتامەنتى.
باتىس قازاقستان
