ءبىر اي بۇرىن جۇمىسىن باستاعان ونەر مەكتەبىندە ءۇمىتىن ۇكىلەگەن 100-دەن استام تالاپتى بالا بار. دومبىرا, فلەيتا, قوبىز, جەتىگەن, سۋرەت, ۆوكال مەن اكتەرلىك شەبەرلىك سىندى بىرقاتار ۇيىرمەدە كىشكەنتاي قاراعاندىلىقتار ونەردەگى تالانتتارىن ۇشتاپ, قاناتتارىن قاتايتادى. ۇيىرمەدە 6 جانە 16 جاس ارالىعىنداعى بالالار ءدارىس الىپ ءجۇر. بۇگىندە ونەر مەكتەبى تاراز, الماتى, قىزىلوردا مەن شىمكەنت قالاسىندا بار بولسا, كەلەشەكتە فيليالدى ءار قالادان اشۋ جوسپاردا بار.
– كيەلى سارىارقا ەلىنەن «سەن تۇر, مەن اتايىن» دەيتىن نەبىر جۇيرىكتەر شىققان. كۇمىسكومەي انشىلەر, جەزتاڭداي جىرشىلارىمىز جەتەرلىك. ءار ەلدىڭ, ۇلتتىڭ ءتىلى, ءدىنى, ءدىلى, ءوز سالت-ءداستۇرى بار. ونسىز ۇلت بولۋ مۇمكىن ەمەس. سوناۋ جىلدارى الماتىدا ۇلكەن تۇرعىن ءۇي كەشەنىندە تۇردىم. سوندا ءتۇرلى بالالاردى كوردىم. قازاقىلىعىمىزعا, داستۇرىمىزگە جات دۇنيەلەردى كوردىم. جۇرەگىم سىزدادى. ولارعا توقپاقپەن ۇيرەتە المايتىنىمىزعا كوزىم جەتتى. تەك ۇرپاقتى ۇلتتىق ونەرگە باۋلۋ ارقىلى جەڭەتىنىمىزدى ءتۇيسىندىم دە وسى مەكتەپتى اشۋدى ۇيعاردىم, – دەيدى ساكەن مايعازيەۆ.
مەكتەپتەگى ۇيىرمەلەر قۇنى قاراپايىم تۇرعىنداردىڭ قالتاسىنا جەڭىل, ويعا دا قونىمدى.
– قاراعاندى وڭىرىندە بۇل – جاڭالىق. ءاننىڭ ەستىسىن ايتاتىن, ساحنا ونەرىنىڭ مادەنيەتىن تانىتاتىن, ونەردىڭ بيىكتىگىن كورسەتەتىن قازاقتىڭ, الاشتىڭ ءبىر ۇلى – ساكەن مايعازيەۆ. ساكەن مەكتەبى – ءداستۇرلى اندەردى ناسيحاتتايتىن مەكتەپ بولارىنا كامىل سەنىمدىمىن, – دەيدى كەنشىلەر مادەنيەت سارايىنىڭ باسشىسى جاروللا اقىشەۆ.
قىزعالداق ايتجانوۆا,
«Egemen Qazaqstan»
قاراعاندى
