قوعامدى دەموكراتيالاندىرۋعا باعىتتالعان اۋقىمدى ءىس-شارالاردىڭ ىقپالىن قازاقستاندىقتار قازىردىڭ وزىندە ايقىن اڭعارىپ وتىر. ساياسي پارتيالاردى تىركەۋدىڭ وڭتايلانۋى, پارتيالىق تىزىممەن قوسا ماجوريتارلىق نەگىزدە جەكەلەگەن ادامداردىڭ ءوزىن-ءوزى ۇسىنۋ مۇمكىندىگى, سايلاۋدىڭ ادىلەتتى ءوتۋى سانانى سەرپىلتەتىن باستى قادام بولسا كەرەك.
قوعامداعى «پرەزيدەنت سايلاۋىنا دايىندىققا از ۋاقىت بەرىلىپ وتىر. ساياسي پارتيالار ۇگىت-ناسيحات جۇمىستارىن جولعا قويىپ ۇلگەرمەيدى» دەگەن سىني پىكىرلەر نەگىزدى دەي المايمىز. الەمدىك تاجىريبەگە سۇيەنەر بولساق, ەكى اي بۇل ناۋقان ءۇشىن جەتكىلىكتى كەزەڭ ەكەنىن كورەمىز. قازىردىڭ وزىندە جاڭا پارتيالاردىڭ تىركەلۋىنە, ءوز كانديداتتارىن تاڭداۋىنا جاعداي تۋعىزىلدى. ۇمىتكەرلەردىڭ قاتارىندا جەكە تۇلعالار دا بارشىلىق.
پرەزيدەنت سايلاۋىنا بايلانىستى قاسىم-جومارت كەمەل ۇلى قازاقستان حالقىنا ۇندەۋ جاريالاپ, جاعدايدى تولىقتاي ءتۇسىندىرىپ بەردى. كەزەكتەن تىس سايلاۋ – جەكەلەگەن توپتىڭ نەمەسە ادامنىڭ مۇددەسى ءۇشىن ەمەس, ەلىمىزدەگى باستالعان وڭ وزگەرىستەر مەن ادىلەتتى قازاقستاندى قۇرۋ ءۇشىن اسا قاجەتتى شەشىم دەۋىمىز دە سوندىقتان. ەندەشە, ەلىمىزدىڭ جارقىن بولاشاعى ءۇشىن وسى باستامالارعا قولداۋ كورسەتىپ, رەفورمالاردىڭ جۇيەلى جۇزەگە اسۋىنا ۇلەسىمىزدى قوسايىق.
جانبولات جورگەنباەۆ,
سەنات دەپۋتاتى
