ۇزدىك وندىققا كىرەتىن بانكتەر ىشىندە تەك ۇشەۋى عانا كەشىكتىرىلگەن تولەم كولەمىن ءبىر جىلدا ازايتا العان. تولەنبەي قالاتىن قارىزدارمەن كۇرەس بويىنشا ەڭ ۇزدىك كورسەتكىش Bank RBK-عا تيەسىلى: ءبىر جىلدا ناشار قارىزدار دەڭگەيىن 48 پايىزعا, 34,8 ملرد تەڭگەگە دەيىن ازايتقان. ال ءبىر اي ىشىندە قارجى ينستيتۋتى «ناشار» كورسەتكىشتى 6,8 پايىزعا قىسقارتقان. ەكىنشى ورىنداعى «بانك تسەنتركرەديتتە» كەشىكتىرىلگەن زايم كولەمى 4,8 پايىزعا, 93 ملرد تەڭگەگە دەيىن قىسقارعان. بۇل – بانكتىڭ قارىز پورتفەلىنىڭ 5,5 پايىزى. ۇشتىكتى ForteBank تۇيىندەيدى: مينۋس 3,2 پايىز, 80,5 ملرد تەڭگەگە دەيىن. كەشىكتىرىلىپ جاتقان زايمدار قارىز پورتفەلىنىڭ 7,4 پايىزىن ەنشىلەيدى دەيدى Ranking ءوز زەرتتەۋىندە.
قالعان 7 بانكتە كەشىكتىرىلگەن تولەمگە يە زايم كولەمى ءوسىپ كەتكەن. تولەمدەر بويىنشا ەڭ قاۋىپتى كەشىكتىرۋ بولىپ سانالاتىن – تولەنبەي تۇرعانىنا 90 كۇننەن اسقان (NPL 90+) ۋلى زايمدار ۇلەسى ءبىر جىلدا 1,1 پايىزعا ءوستى. بۇل – 828 ملرد تەڭگە.
جىلدىق ديناميكادا ءىرى بانكتەر اراسىنان تەك 4 بانك ءوز كورسەتكىشتەرىن جاقسارتا العان. NPL 90+ كورسەتكىشىن قىسقارتۋ بويىنشا تاعى دا Bank RBK كوش باسىندا: بۇل بانك 12 ايدا قاۋىپتى قارىز كولەمىن 66,2 پايىزعا, 17,8 ملرد تەڭگەگە دەيىن ازايتقان. ال جالپى قارىز پورتفەلىنىڭ كولەمى – 778,2 ملرد تەڭگە. ەكىنشى ورىندا – «قازاقستان حالىق بانكى» قارجى ينستيتۋتى ءبىر جىل ىشىندە NPL 90+ كورسەتكىشىن 21,3 پايىزعا قىسقارتسا, ءۇشىنشى ورىنداعى «بانك تسەنتركرەديت» 20,4 پايىزعا دەيىن تومەندەتە العان. ForteBank كورسەتكىشى الدىڭعى ءۇش ينستيتۋتتاي جوعارى ەمەس, تەك 2 پايىزعا ازايتىپتى. ال وزگە بانكتەردىڭ بارلىعى دەرلىك ۋلى زايمدار ۇلەسىن ازايتا الماعان.
«ەسكە سالىپ وتەيىك, Bank RBK مەن Halyk Bank پورتفەل ساپاسى بويىنشا ۇزدىك بانكتەردىڭ ۇشتىگىنە كىرەدى. Bank RBK-دا NPL 90+ بۇكىل زايم كولەمىنىڭ 2,3 پايىزىن قۇراسا, بۇل كورسەتكىش Halyk Bank-تە – 2,1 پايىز. سەكتورداعى پورتفەل ساپاسى ءتاۋىر ءۇشىنشى بانك – مەملەكەتتىك «وتباسى بانكى». ولارداعى NPL 90+ پورتفەلدىڭ 0,1 پايىزىن الادى», دەپ مالىمدەيدى ساراپشىلار.
جالپى العاندا, تولەمنىڭ كەشىكتىرىلۋىنە قاراماستان جالپى قارىز پورتفەلىندەگى كەشىكتىرىلگەن زايم ۇلەسى سەكتور بويىنشا 7,1 پايىزعا تومەندەگەن (بىلتىر 7,5 پايىز بولعان). بەس جىل بۇرىنعىمەن سالىستىرعاندا – 18,9, پايىزعا, ون جىل بۇرىنعىمەن سالىستىرعاندا 35,3 پايىزعا ازايىپتى.
ەلدەگى بۇكىل ەكىنشى دەڭگەيلى بانكتەردەگى جيىنتىق قارىز پورتفەلىنىڭ كولەمى 21,55 ترلن تەڭگەگە جەتتى. بۇل – 2021 جىلعى جيىنتىق پورتفەل سوماسىنان 26,3 پايىزعا جوعارى كورسەتكىش.
