وسىدان بىرەر كۇن بۇرىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن حالىقارالىق شايبالى حوككەي فەدەراتسياسىنىڭ باسشىسى ليۋك تارديف اراسىنداعى كەزدەسۋ بارىسىندا وسى تاقىرىپتا كەڭىنەن اڭگىمە قوزعالعان ەدى. سول كەزدە مەملەكەت باسشىسى ءبىزدىڭ ەلدە سپورتتىڭ وسى تۇرىمەن 14 مىڭنان اسا ادام اينالىساتىنىن تىلگە تيەك ەتە كەلە, جەر-جاھاننىڭ ەڭ مىقتى كوماندالارى باس قوساتىن باسەكەنى اسا جوعارى دەڭگەيدە وتكىزە الاتىنىمىز جايىندا مالىمدەدى. قازاقستاننان بولەك, بۇل جارىستى قابىلداۋعا گەرمانيا مەن نورۆەگيا دا نيەت ءبىلدىرىپ وتىر.
وتكەنگە زەر سالساق, الەمدىك دودا سوناۋ 1920 جىلدان بەرى ۇيىمداستىرىلىپ كەلەدى. 85 مارتە جالاۋى جەلبىرەگەن جارىستىڭ دەنى ەۋروپا ەلدەرىندە وتكەنى بەلگىلى. ودان بولەك, اقش-تا ءۇش جانە كانادادا ءبىر رەت شىمىلدىعى ءتۇرىلدى. ەگەر تاڭداۋ قازاقستانعا تۇسسە, وندا شايبالى حوككەيدەن وسىنداي ءباسى جوعارى باسەكە ازيا قۇرلىعىندا العاش رەت ۇيىمداستىرىلماق.
قازاقستان قۇراماسى الەم چەمپيوناتتارىندا 10 رەت باق سىنادى. العاش رەت 1998 جىلى شۆەتسيادا بوي كورسەتسەك, سوڭعى رەت بيىل فينليانديادا باق سىنادىق. ەڭ ۇزدىك كورسەتكىشكە 2021 جىلى لاتۆيادا قول جەتكىزدىك. بالتىق جاعالاۋىنداعى جارىستا 10-ورىنعا تابان تىرەدىك. سول چەمپيونات بارىسىندا نەبىر ازۋلى كوماندالارمەن تەرەزەسى تەڭ ونەر كورسەتكەنىمىز جانكۇيەرلەردىڭ جادىندا.
ەستەرىڭىزگە سالا كەتەيىك, كەلەسى الەم چەمپيوناتى 2023 جىلى فينليانديانىڭ تامپەرە مەن لاتۆيانىڭ ريگا قالارىندا وتەدى. 2024 جىلعى جارىستى چەحيانىڭ پراگاسى مەن وستراۆاسى قابىلدايدى. 2025 جىلعى ءدۇبىرلى دودانىڭ جالاۋى شۆەتسيانىڭ ستوكگولمى مەن دانيانىڭ حەرنينگىندە جەلبىرەيدى. ال 2026 جىلعى بىرىنشىلىك شۆەيتساريانىڭ تسيۋريحى مەن فريبۋرىندا ۇيىمداستىرىلادى.
