قاڭتار وقيعاسىنان سوڭ ەل بيلىگىنەن ءبىراز لاۋازىمدى تۇلعالار شەتتەتىلگەنىنە كۋا بولدىق. دەي تۇرعانمەن وتاندىق ەكونوميكا ءالى دە بولسىن بۇرىنعى وليگارحتاردىڭ قولىندا. بۇلار رەسپۋبليكامىزدىڭ كليپتوكراتيالىق ەمەس, دەموكراتيالىق تۇرعىدان دامۋ ارقىلى نارىقتىق ەكونوميكاعا بەت بۇرۋىنا قارسىلىق تانىتۋدا. قاراپ وتىرساق, قازاقستاننان «فوربس» تىزىمىنە ەنگەن ميللياردەرلەردىڭ بىردە-بىرەۋى ءوز بەتىمەن جاڭا تەحنولوگيا تاۋىپ, بولماسا جاڭاشىل يدەيامەن, عىلىم نەمەسە وندىرىسكە ەنگىزگەن جاڭالىعىمەن كوزگە تۇسكەن جوق. ولاردىڭ باسىم بولىگى ەلىمىزدىڭ قازىناسىن, قازاقتىڭ جەراستى بايلىعىن پايدالانۋ ارقىلى مول داۋلەتكە يە بولدى. كەيىن قارجى ۇيىمدارىن قۇرىپ, حالىققا قىمبات نەسيەلەر تاراتىپ, بايلىعىن ودان سايىن ەسەلەدى. مىنە, وسى وليگارحتار مەن توپتار سوڭعى جىلداردا قولعا الىنعان تىڭ باستامالاردىڭ ىسكە اسۋىنا مۇددەلى بولماعانداي كورىنەدى.
قازىرگى ساياسي جاعدايدى باعامداساق, 2024 جىلى وتەتىن كەزەكتى پرەزيدەنتتىك سايلاۋدا الگى توپتار قاراجاتتارىن پايدالانىپ مەديارەسۋرستار ارقىلى ەلدەگى الەۋمەتتىك-قوعامدىق نارازىلىقتى كۇشەيتۋگە تىرىسار ەدى. توڭىرەكتەگى مەملەكەتتەردە بولىپ جاتقان كەيبىر قۇبىلىستار الداعى جىلدارى قازاقستانعا دا اسەر ەتۋ مۇمكىن. مىنە, سونداي كەزەڭدە ماڭىزدى ساياسي شارانى وتكىزۋ تىم قيىنعا سوعار ەدى. سوندىقتان قازىرگىدەي ۋاقىتتا كەزەكتەن تىس پرەزيدەنتتىك سايلاۋ جاريالانىپ, ونىڭ جىل سوڭىنا دەيىن وتكىزىلۋىن, حالىق مەملەكەت باسىنا كەلەتىن تۇلعانى بىردەن 7 جىل مەرزىمگە سايلايتىنىن ءوز باسىم قۇپتايمىن.
قازاقستاننىڭ سايلاۋ جۇيەسىن وزگە ەلدەرمەن سالىستىرۋ استە دۇرىس ەمەس. سەبەبى ءبىز مۇلدە وزگە گەوساياسي ورتادا, الپاۋىت مەملەكەتتەردىڭ اراسىندا ورنالاسقانبىز. ادىلەتتى قازاقستاننىڭ ازاماتتارى ءبولىنۋدى ەمەس, بىرىگۋدى ۇيرەنۋىمىز كەرەك.
ينفوگرافيكانى جاساعان امانگەلدى قياس, «ەQ»
ەركەعالي جانعازى,
«قاعاندىق» قوعامدىق بىرلەستىگىنىڭ توراعاسى
پاۆلودار
