جيىندى عالىمنىڭ شاكىرتى, اكادەميك ديحان قامزابەك ۇلى اشىپ, ادەبيەتتانۋ ابىزىنىڭ وسى ۇيدە ون ەكى جىل تۇرعانىن, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قىزمەت ىستەپ, عىلىمعا جاستاردى باۋلىپ, الاش مۇراسى مەن قازاق ادەبيەتىنىڭ تاريحى جانە تۇعىرلى تۇلعالار تۋرالى ەڭبەكتەرىن جاريالاعانىن ايتا كەلىپ, العاشقى ءسوزدى ۇعا اكادەميگى, پارلامەنت سەناتىنىڭ دەپۋتاتى, اكادەميك باقىتجان جۇماعۇلوۆقا بەردى. قايراتكەر زەينوللا قابدولوۆ, زاكي احمەتوۆ سەكىلدى قاتارلاستارىمەن XX عاسىرداعى قازاق ادەبيەتىن, عىلىمىن, رۋحانياتىن بيىككە كوتەرگەن ءبىرتۋار ازاماتتىڭ كىسىلىگى مەن تۇلعالىق قاسيەتىنە توقتالدى.
«سەراعاڭ ءوز بۋىنىنىڭ كوشىن باستاپ, قىرىق جاسىنا جەتپەي, العاشقى بولىپ دوكتورلىعىن قورعاپ, قۇرداستارىنا جول اشتى. كەڭەس وداعى اتتەستاتسيالىق كوميسسياسىنىڭ مۇشەسى رەتىندە وزىنەن كەيىن قورعاعان بارلىق ارىپتەسىنىڭ جۇمىسىن ماسكەۋدەن بەكىتتىرىپ, قولداۋ كورسەتتى. مۇنى بۇگىن بىرەۋ بىلەدى, بىرەۋ بىلمەيدى... جانى جومارت, جۇرەگى كەڭ, كىسىلىگى وتە بيىك وسىناۋ قاسيەتىنەن سەراعاڭ كەشە دۇنيەدەن وتكەنشە ءبىر ەلى شەگىنگەن جوق. ول كىسى ۇلت ۇستازى بولدى. مىنە, جەتپىس جىل بويى كۇللى مەكتەپ وقۋشىلارى. ينستيتۋت, ۋنيۆەرسيتەت ستۋدەنتتەرى سەرىك قيراباەۆ جازعان وقۋلىقتارمەن ءبىلىم الىپ كەلەدى. سەرىك اعامىز م.اۋەزوۆ ينستيتۋتىن باسقارعان جىلدارى كۇللى الاش ارىستارىن اقتاپ, سولاردىڭ مۇراسىن جارىققا شىعارۋعا ايانباي اتسالىستى», دەپ عالىمنىڭ عيبراتتى عۇمىرىنان سىر شەرتتى.
ودان كەيىن عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ مينيستر ساياسات نۇربەكتىڭ حاتىن وقىپ بەردى. ال فيلولوگيا عىلىمدارىنىڭ دوكتورى, پروفەسسور ءادىل احمەتوۆ كورنەكتى اكادەميكتەر سەرىك قيراباەۆ پەن ءاليا بەيسەنوۆانىڭ ءومىر جولىنا وي جىبەرىپ, ءبىر وتباسىندا قوس اكادەميكتىڭ بولۋى سيرەك كەزدەسەتىنىن جانە ولاردىڭ قانىش ساتباەۆ قۇرعان ۇلتتىق عىلىم اكادەمياسىنىڭ اكادەميكتەرى ەكەنىن العا تارتىپ جوعارى باعالادى.
«قازىر سول ۇلتتىق عىلىم اكادەمياسى قايتا قالپىنا كەلسە دەپ ۇمىتتەنىپ ءجۇرمىز. ويتكەنى ول اكادەميانىڭ ساپاسى عانا ەمەس بەدەلى دە بيىك بولاتىن. بۇگىن حالقىمىزدىڭ ارداقتى پەرزەنتىنىڭ ءوزى تۇرعان ۇيىندە ەسكەرتكىش-تاقتانىڭ اشىلۋى – وتە قۇپتارلىق ءىس. ويتكەنى وتكەندى سىيلاماساق, كەلەشەك ۇرپاق ۇلاعاتتى بولىپ وسپەيدى», – دەسە, ءماجىلىس دەپۋتاتى ساۋىتبەك ابدراحمانوۆ بيىل سەرىك قيراباەۆ شىعارعان «قازاق سوۆەت ادەبيەتى» وقۋلىعىنىڭ العاشقى باسىلىمىنا تۋرا 70 جىل تولىپ وتىرعاندىعىن ءسوز ەتتى.
«بۇل دەگەن تاڭعالارلىق عاجايىپ وقيعا. سەراعاڭ 25 جاسىندا «قازاق سوۆەت ادەبيەتى» وقۋلىعىنىڭ اۆتورى اتاندى. سودان بەرى سەرىك اعامىز جازعان وقۋلىقتىڭ ونداعان باسىلىمدارى جارىق كورىپ, ونى ميلليونداعان قازاق بالالارى وقىدى. وسى جىلدار ىشىندە ول جەتكىنشەكتەر جيىرماسىنشى عاسىردا جاساعان ءسوز ونەرىنىڭ اسىلدىعىنا, قۇندىلىعىنا كوز جەتكىزىپ قانا قويعان جوق, ءجۇز مىڭداعان قازاق جاستارى قيراباەۆتىڭ وقۋلىعى ارقىلى ادەبيەتكە ىنتىعىپ, ءسوز ونەرىنىڭ قادىر-قاسيەتىن بىلە ءتۇستى. سول ارقىلى تالانتتى جاستار ادەبيەتكە تولقىن-تولقىن بولىپ كەلدى. بۇل سەراعاڭنىڭ ۇلت الدىنداعى ۇلى ەڭبەگى. شىن مانىندە, قيراباەۆ – ۇعىمعا اينالعان ادام. سەراعاڭ ادەبيەتتانۋدا عانا ەمەس, ادەبي سىندا دا ءونىمدى ەڭبەك ەتتى. ال ادەبي سىن دەگەن – دۇشپان ارتتىرۋعا تاپتىرمايتىن جانر. بىراق سەراعاڭنىڭ ادىلدىگى, بىلىكتىلىگى, بىلىمدىلىگى جانە ءبىلىپ ايتاتىن, ءتىلىپ ايتاتىن ەرەكشە قاسيەتى وعان جاۋ جيناتتىرعان جوق. ول سىناعان ادامداردىڭ ءوزى دە سىننىڭ ادىلدىگىن مويىنداپ, ودان تاعىلىم ءتۇيدى. ءسوزىنىڭ قادىرىن ساقتاعان ادام ءوزىنىڭ قادىرىن ساقتايدى. سەراعاڭ سونداي تۇلعا», – دەدى بەلگىلى قالامگەر.
عالىمنىڭ شاكىرتى, قوعام قايراتكەرى, پروفەسسور بەيبىت مامىراەۆ ۇلاعاتتى ۇستازى تۋرالى دا جىلى ەستەلىك ءوربىتتى.
تاعىلىمدى ءىس-شارانى تۇيىندەگەن سەرىك سمايىل ۇلىنىڭ جارى, اكادەميك ءاليا بەيسەنوۆا «سەراعاڭا جاساعان قۇرمەتتىڭ ءبارى – حالىققا دەگەن قۇرمەت» دەي كەلىپ: «قازاقتىڭ بارلىق سانالى ازاماتى حالىقتىڭ تاعدىرىن ويلاپ, ەلگە قىزمەت جاساعان. وسىندا جينالعان بارلىعىڭىز دا ەلگە قىزمەت جاساپ جۇرسىزدەر, ىستەرىڭىزگە بەرەكە تىلەيمىن! ەل دەگەن, جۇرت دەگەن ۇلكەن ۇعىم. ەلدىڭ قامىن ويلاڭىزدار! سول جولدا جۇرگەن جاستار امان بولسىن!» دەپ ەسكەرتكىش-تاقتانى ورناتۋدىڭ باسى-قاسىندا جۇرگەن ازاماتتار مەن جينالعان قاۋىمعا انالىق العىسىن جەتكىزدى.
سونداي-اق ءىس-شارا اياسىندا اكادەميكتىڭ رۋحىنا دۇعا باعىشتالىپ, م.اۋەزوۆ اتىنداعى ادەبيەت جانە ونەر ينستيتۋتى شىعارعان ايتۋلى عالىمنىڭ ء«ومىر بەلەستەرى» اتتى كىتابى تانىستىرىلدى.
