اتالعان ءىس-شارانى ۇيىمداستىرۋشى ۇلتتىق ارحيۆ ديرەكتورى ساعيلا نۇرلانوۆا حانىمنىڭ ايتۋىنشا, مادەنيەت جانە سپورت مينيسترلىگى ارحيۆ ىستەرى جانە قۇجاتتامانى باسقارۋ كوميتەتى باستاماشى بولىپ وتكىزىپ وتىرعان بۇل رەتكى اشىق ەسىك جوباسى ەڭ اۋەلى ءوسىپ كەلە جاتقان جاس بۋىندى ارحيۆ ىستەرىمەن تانىستىرۋ جانە وسى ارقىلى ارحيۆتە ساقتالىپ جاتقان قۇندى قۇجاتتارعا ولاردىڭ قىزىعۋشىلىعىن وياتۋ ەكەن.
«جوبانىڭ نەگىزگى ماقساتى – وسكەلەڭ ۇرپاقتى تاريحتى, سالت-ءداستۇردى زەردەلەۋگە باۋلۋ, وتانعا دەگەن پاتريوتتىق سەزىمىن وياتۋ, ۇرپاقتار ساباقتاستىعىن ساقتاۋ, سونداي-اق ارحيۆ قۇجاتتارىن ناسيحاتتاۋ جانە ارحيۆ سالاسىنىڭ ءيميدجىن ارتتىرۋ», دەيدى ۇيىمداستىرۋشىلار.
ورايى كەلگەندە ايتىپ وتەيىك, ەلىمىز ارحيۆتەرىندە مەملەكەتتىك ساقتاۋدا 26 ملن قۇجاتتىق كوز جيناقتالسا, ولاردىڭ ىشىندە مەملەكەتىمىزدىڭ تاريحي فاكتىلەرى مەن وقيعالارىن كۋالاندىراتىن اسا قۇندى قۇجاتتار بار. اتاپ ايتقاندا, وتكەن عاسىردىڭ 20-30-جىلدارىنداعى ساياسي قۋعىن-سۇرگىن, اشارشىلىق قۇرباندارى جايلى دەرەكتەر, قازاقستان رەسپۋبليكاسى تاۋەلسىزدىگىنىڭ قالىپتاسۋ كەزەڭىنە قاتىستى قۇجاتتار, ت.ب.
اشىق ەسىك شاراسىنا 500-دەن استام ورتا مەكتەپ وقۋشىسى, جوعارى وقۋ ورىندارى مەن كوللەدج ستۋدەنتتەرى كەلىپ قاتىسىپ, كورمە سورەسىنە قويىلعان قۇجاتتىق جادىگەرلەرمەن تانىستى.
ءىس-شارا بارىسىندا جينالعان كوپشىلىككە ارحيۆ قىزمەتىنىڭ باسىم باعىتتارى تانىستىرىلىپ, ەكسكۋرسيالار, تاقىرىپتىق فوتوقۇجاتتىق ەكسپوزيتسيالار مەن كورمەلەرگە شولۋ جاسالدى. ونىڭ سىرتىندا قازاقستان تاريحى, ۇلتتىق سالت-داستۇرلەردى بىلۋگە ارنالعان كونكۋرستار مەن ۆيكتورينالار وتكىزىلدى. وقۋشىلاردى ەرەكشە قىزىقتىرعان دۇنيە ورتا عاسىردا ءومىر سۇرگەن اراب ساياحاتشىسى مۇحامەد ءال-ءيدريسيدىڭ كارتاسى بولدى.
