قازاقستان • 24 قىركۇيەك، 2022

قازاقستان مەن مالايزيا تۇراقتى اۋە رەيستەرىن قالپىنا كەلتىرەدى

165 رەت كورسەتىلدى

قازىرگى كۇندەرى قازاقستان مەن مالايزيا جاھاندىق پاندەميا سالدارىنان ەكى جىلدان بەرى ءۇزىلىپ قالعان تۇراقتى اۋە رەيستەرىن قالپىنا كەلتىرۋ ءۇشىن كەلىسسوزدەر جۇرگىزىپ وتىر. بۇل تۋرالى قازاقستانعا ارنايى كەلگەن مالايزيا تۋريستىك اگەنتتىگىنىڭ ساۋدا ميسسياسى مالىمدەدى، دەپ حابارلايدى Egemen.kz.

الماتىدا وتكەن ءباسپاسوز ءماسليحاتىندا مالايزيا 2022 جىلى الەمنىڭ بارلىق تۇكپىرىنەن 9،2 ميلليون تۋريست قابىلداۋعا ساقاداي ساي ەكەنى ايتىلدى. 

مالايزيا ارنايى دەلەگاتسياسىنىڭ وسى ساپارىندا مەگاپوليستە «مالايزيا - ناعىز ازيا» سەمينارى اياسىندا Business-to-Business ىسكەرلىك كەزدەسۋلەرى ءوتىپ، ەكى ەلدىڭ تۋريستىك يندۋسترياسىنىڭ مۇمكىندىكتەرىن كەڭەيتۋگە قاتىستى تۇساۋكەسەرلەر ءوتتى. 

سونىمەن قاتار بيىل قازاقستان مەن مالايزيانىڭ ديپلوماتيالىق قارىم-قاتىناستارىنىڭ باستالعانىنا دا 30 جىل تولىپ وتىر. وسى ارالىقتا ەكى ەلدىڭ ساۋدا-ساتتىعى جولعا قويىلدى دەۋگە بولادى. ماسەلەن، 2021 جىلى جالپى ساۋدا اينالىمى 98،59 ميلليون اقش دوللارىن قۇراسا، بيىل، ياعني 2022 جىلدىڭ جەتى ايىندا بۇل سوما 58،82 ميلليون اقش دوللارىنا جەتكەن.

ال الماتىدا وتكەن ءىس-شارا ەكى ەلدىڭ بۇرىنعى تۋريستىك كومپانيالارىمەن ىسكەرلىك قارىم-قاتىناستاردى قالپىنا كەلتىرىپ، نارىقتان جاڭا ويىنشىلاردى تابۋدى كوزدەيدى. سوندىقتان دا مالايزيا دەلەگاتسياسىن تۋروپەراتورلار، قوناقۇيلەردىڭ يەلەرى مەن مەملەكەتتىك تۋريزم سالاسىنىڭ قىزمەتكەرلەرى، مەديتسينالىق تۋريزم يندۋسترياسىنىڭ وكىلدەرى قۇرادى. 

.

باق وكىلدەرىمەن كەزدەسۋ بارىسىندا مالايزيانىڭ قازاقستانداعى ەلشىسى داتو سايد موحاماد باكري بين سايد ابدۋل راحمان: «قازاقستان – ءبىز ءۇشىن ورتالىق ازياداعى ماڭىزدى ەل. بۇل ايماق تۋريستىك ونىمدەر مەن قىزمەتتەر تۇرعىسىنان قاراعاندا، ءبىز كۇتكەننەن دە بولەك كوپ مۇمكىندىك ۇسىنا دا، قابىلداي دا الادى. 2019 جىلى، COVID-19 پاندەمياسىنا دەيىن ءبىز قازاقستاننان مالايزياعا دەمالۋعا كەلگەن 18 138 تۋريست قابىلدادىق، بۇل وتكەن جىلمەن سالىستىرعاندا 30،9%-عا كوپ. سول سياقتى، مالايزيا حالال ءتۋريزمى بويىنشا قازاقستاننان كەلگەن تۋريستەر ءۇشىن تانىمال باعىتتاردىڭ ءبىرى بولدى. سول سياقتى ءبىزدىڭ تۋريستەر دە كورىكتى مەكەندەرگە باي قازاقستانعا قىدىرۋعا قىزىعۋشىلىق تانىتادى. سوندىقتان قازىرگى ۋاقىتتا قازاقستان مەن مالايزيا اراسىندا تۇراقتى اۋە قاتىناسىن قالپىنا كەلتىرۋ ءۇشىن كەلىسسوزدەر جۇرگىزىپ جاتىرمىز، بۇل ەكى ەلدىڭ ءتۋريزمىن دامىتۋعا ۇلكەن سەرپىن بەرە الادى»، دەدى.

ءدال قازىرگى كۇندەرى مالايزيا كارانتين نەمەسە COVID-19 تەستىلەۋ تالاپتارىنسىز تولىق ۆاكتسيناتسيالانعان ساياحاتشىلارعا، سونىڭ ىشىندە 17 جانە ودان كىشى جاستاعى بالالاردى قوسا العاندا، كىرۋ پروتسەدۋرالارىن جەڭىلدەتىپ وتىر. وعان قوسا تۋريستىك ساقتاندىرۋ دا مالايزياعا كەلەتىن شەتەلدىكتەر ءۇشىن مىندەتتى تالاپ ەمەس.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار