قازاقستان • 23 قىركۇيەك، 2022

سەناتور رەسەي مەملەكەتتىك دۋماسى دەپۋتاتىنىڭ مالىمدەمەسىنە قاتىستى پىكىر ءبىلدىردى

98 رەت كورسەتىلدى

قازاقستان رەسپۋبليكاسى پارلامەنتىنىڭ سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد رەسەي مەملەكەتتىك دۋماسى دەپۋتاتىنىڭ داۋلى مالىمدەمەسىنە قاتىستى پىكىر ءبىلدىردى، دەپ حابارلايدى Egemen.kz.

جاقىندا رەسەي فەدەراتسياسى مەملەكەتتىك دۋماسىنىڭ دەپۋتاتى، تمد ىستەرى، ەۋرازيالىق ينتەگراتسيا جانە وتانداستارمەن بايلانىس جونىندەگى كوميتەت توراعاسىنىڭ ءبىرىنشى ورىنباسارى كونستانتين زاتۋلين «قازاقستاننىڭ رەسەيمەن قارىم-قاتىناستاعى تايعاق جولى» تۋرالى مالىمدەپ، «رەسەي فەدەراتسياسىمەن ەڭ ۇزىن قۇرلىق شەكاراسى بار ەل رەتىندە باسىن قاتەرگە تىگىپ وتىر» دەگەن ەدى.

مۇحتار قۇل-مۇحاممەد وسىعان بايلانىستى ءوز پىكىر ءبىلدىردى.

«دەپۋتات زاتۋلين ءوزىنىڭ رەيتينگى تومەندەپ، تانىمالدىعى باسەڭدەي باستاعاندا دەرەۋ وسىلاي ەلدى ارانداتاتىن مالىمدەمەلەر جاساي باستايدى. مۇنداي جاعداي بۇعان دەيىن دە بولعان جانە ءبىر رەت قانا ەمەس. قازاقستاندىق بانكتەر «مير» بانك كارتاسىنا قاتىستى وتە دۇرىس ارەكەت جاسادى. بىرىنشىدەن، ءبىزدىڭ ەلىمىزدە ەكىنشى دەڭگەيلى بانكتەردىڭ ءبارى جەكە بانكتەر. سوندىقتان ولار قانداي بانك كارتاسىمەن جۇمىس ىستەۋ پايدالى جانە ىڭعايلى ەكەنىن وزدەرى انىقتايدى. ەكىنشىدەن، سوڭعى ۋاقىتتا «مير» كارتاسىنا قاتىستى داۋ-داماي كوبەيىپ كەتكەنى بەلگىلى. ال، اقشا، ادەتتە، تىنىشتىقتى جاقسى كورەدى. سوندىقتان دەپۋتات «الاڭداۋشىلىعى» مەن «نارازىلىعىن» ءوزى سياقتىلاردىڭ كەسىرىنەن قيىن جاعدايعا تاپ بولعان وزدەرىنىڭ بانك جۇيەسىنە ءبىلدىرسىن. ءتىپتى بىزگە اقىل ايتپاس بۇرىن، سانكتسيالار تىزىمىنەن قالاي شىعاتىنىن ويلانىپ السىن. «قازاقستاننىڭ تايعاق جولى» دەگەننىڭ ءوزى باياعىدا-اق سول جولمەن ءجۇرىپ كەلە جاتقانىن ءبارى بىلەدى.

بۇل دەپۋتات جازدا دا ءبىزدىڭ ەلگە قاتىستى سويلەپ، ء«بارى ۋكرايناداعىداي بولۋى مۇمكىن» دەپ قورقىتپاق بولعان. ال، ۋكراينادا نە بولعانىن رەسەيدە جاريالانعان موبيليزاتسيادان-اق كورىپ وتىرمىز. سوندىقتان رەسەيلىك دەپۋتاتقا الدىمەن ءوزىنىڭ نەگىزسىز ويلارى مەن بەيبەرەكەت سوزدەرىن تۇزەپ العانى دۇرىس»، دەدى سەناتور مۇحتار قۇل-مۇحاممەد.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار