قازاقستان • 23 قىركۇيەك، 2022

مينيسترلىك رەسەي ازاماتتارىنىڭ قازاقستانعا كىرۋ ماسەلەسىنە تۇسىنىكتەمە بەردى

128 رەت كورسەتىلدى

قر ءسىم ءباسپاسوز قىزمەتى رەسەي ازاماتتارىنىڭ قازاقستانعا كىرۋ جانە بولۋ ءتارتىبى تۋرالى ماسەلەسىنە تۇسىنىكتەمە جاريالادى، دەپ حابارلايدى Egemen.kz اتالعان ۆەدومستۆوعا سىلتەمە جاساپ. 

«شەتەل ازاماتتارىنىڭ قر-عا كىرۋ جانە بولۋ ءتارتىبى بار، ولاردى باقىلاۋدى قر ۇقك شەكارا قىزمەتى جانە تيىسىنشە قر ءىىم جۇزەگە اسىرادى. قازىرگى تاڭدا بارلىق مەملەكەتتىك ورگاندار شتاتتىق رەجيمدە جۇمىس ىستەۋدە جانە جاعدايدى تۇراقتى باقىلاۋدى قامتاماسىز ەتۋدە. بۇل رەتتە، كەز كەلگەن ەلدىڭ شەتەلدىك ازاماتتارىنىڭ قر اۋماعىندا مەرزىمسىز بولۋعا قۇقىعى جوق، ولار ەلىمىزدىڭ كوشى-قون زاڭناماسىنىڭ تالاپتارىن ساقتاۋى قاجەت»، دەلىنگەن حابارلامادا.

مينيسترلىك وكىلدەرى قازاقستاندىقتار قۇقىقتىق مەملەكەتتە ءومىر ءسۇرىپ جاتقانىن جانە ءار ازاماتتىڭ ءىس-ارەكەتتەرى وسى قاعيداتتاردان تۋىنداۋى ءتيىس ەكەنىن اتاپ ءوتتى.

«قولدانىستاعى شارتتار ساقتالۋى ءتيىس جانە ىقتيمال قۇقىق بۇزۋشىلىقتاردى اكىمشىلىك تارتىپپەن توقتاتۋ كەرەك. مەملەكەتتە ۇلتتىق مۇددەلەردى قورعاۋدىڭ تەتىكتەرى جەتكىلىكتى، بۇل ورايدا، ۇلتتىق مۇددە بارىنەن دە جوعارى. اينالامىزدا بولىپ جاتقان كەز كەلگەن كۇردەلى گەوساياسي جاعدايدا ءبىز ۇلتتىق قاۋىپسىزدىكتىڭ باسىمدىعىنا سۇيەنەتىن بولامىز. الەمدە ورىن العان قۇبىلمالى احۋال ءبىزدىڭ مەملەكەتىمىزدىڭ تۇراقتىلىعى ءۇشىن سىناق بولىپ وتىر. سونىمەن بىرگە، حالقىمىزعا ءتان ادامگەرشىلىك قاسيەتتەر بەلگىلى ءبىر مورالدىق ەرەجەلەردى ساقتاۋدى تالاپ ەتەدى. ازاماتتارىمىز وزىندىك دانالىعىن كورسەتىپ، قوناقجايلىلىق داستۇرىنە بەرىك بولادى دەپ سەنەمىز»، دەلىنگەن تۇسىنىكتەمەدە.

سونداي-اق ۆەدومستۆو قازىرگى قيىن كەزەڭدە كەز كەلگەن وتكىر مالىمدەمە نەمەسە ارەكەت جاعىمسىز اسەر تۋدىرۋى مۇمكىن ەكەنىن ەسكە سالدى.

«بۇگىنگى تاڭدا قازاقستاننىڭ ينفراقۇرىلىمى كوشى-قوننىڭ قازىرگى جاعدايىنان سالىستىرمالى تۇردە اۋىرتپالىقسىز وتۋگە مۇمكىندىك بەرەدى. قىزمەت كورسەتۋ جانە سەرۆيس وبەكتىلەرى دە ءوز قۋاتتارى اياسىندا جۇمىس ىستەيدى. ءبىز اعىمداعى احۋالعا مۇقيات مونيتورينگ جۇرگىزىپ وتىرمىز جانە ەلەۋلى ءبىر قاتەرلەر تۋىنداعان كەزدە حالىقارالىق قۇقىق پەن ۇلتتىق زاڭنامانى ەسكەرە وتىرىپ، ءتيىستى شارالار قابىلداناتىن بولادى. ءبىز مەملەكەتتىك ورگانداردىڭ رەسمي جانە وبەكتيۆتى اقپاراتىنا سەنۋ ماڭىزدى دەپ سانايمىز، بۇل قاجەتسىز الاڭداۋشىلىقتىڭ الدىن الۋعا كومەكتەسەدى»، دەلىنگەن ءسىم حابارلاماسىندا.

سوڭعى جاڭالىقتار

ۇقساس جاڭالىقتار