ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ بايانداماسىندا بۇل زاڭ جوبالارىنىڭ نەگىزگى ماقساتى ۇلتتىق بىلىكتىلىك جۇيەسىنىڭ ەلەمەنتتەرىن جۇيەلەۋ, بىلىكتىلىك جۇيەسىن باسقارۋ مودەلىن ەنگىزۋدى قامتاماسىز ەتەتىن قۇرالدار مەن مەحانيزمدەردى قالىپتاستىرۋ ەكەنىن اتاپ ءوتتى.
ۇلتتىق بىلىكتىلىك جۇيەسىن ەنگىزۋ بويىنشا شارالاردى ەڭبەك جانە حالىقتى الەۋمەتتىك قورعاۋ مينيسترلىگى عىلىم جانە جوعارى ءبىلىم, وقۋ-اعارتۋ مينيسترلىكتەرىمەن, «اتامەكەن» ۇلتتىق پالاتاسىمەن بىرلەسىپ اتقاردى.
– زاڭ جوباسىنا سايكەس مەملەكەتتىك ورگاندار جانىنان كاسىپتىك بىلىكتىلىك جونىندەگى سالالىق كەڭەستەر قۇرىلىپ, كاسىپتىك بىلىكتىلىكتەردى راستاۋدى قاجەت ەتەتىن كاسىپتەر تىزبەسى ايقىندالادى. ول مينيسترلىكتىڭ ۇلتتىق بىلىكتىلىك جۇيەسىنىڭ تسيفرلىق پلاتفورماسىندا جۇزەگە اسىرىلادى, – دەدى و.ورداباەۆ.
زاڭ جوباسى قابىلدانسا, سۇيىكتى ءىسىن كاسىپكە اينالدىرعان ماماندارعا بىلىكتىلىگىن رەسمي تۇردە راستايتىن كۋالىك بەرىلەدى. بىلىكتىلىك جۇيەسى قىزمەتكەرلەردىڭ, جۇمىسسىز مامانداردىڭ نەعۇرلىم تەز ءارى ساپالى جۇمىسقا ورنالاسۋىنا, جوعارى تابىس تابۋىنا مۇمكىندىك بەرەدى.
ال جۇمىس بەرۋشىلەرگە ەڭبەك نارىعىنىڭ زاماناۋي تالاپتارىنا ساي بىلىكتى مامانداردى جۇمىسقا تارتۋعا, ەڭبەك ونىمدىلىگىن ارتتىرۋعا جول اشادى.
