مەملەكەتىمىزدەگى ساياسي رەفورمالاردىڭ زاڭدى جالعاسى ىسپەتتەس 2022 جىلدىڭ 20 قاراشاسىنا بەلگىلەنگەن ەل پرەزيدەنتىن كەزەكتەن تىس سايلاۋ – الەمدىك سىن-قاتەرلەر اياسىنداعى جاڭا تاريحىمىز بەن تاعدىرىمىزدىڭ قايناۋىنان تۋىنداعان شەشىم دەپ سەنىممەن ايتا الامىز.
بۇل ساياسي جۇيەنى تولىق سەرپىلتۋگە باعىتتالعان قادام بولماق. ەلدىڭ باسشىسى – القالاعان الەۋمەت مۇددەسىن ورىنداۋشى. سوندىقتان مەملەكەتتىڭ سىن ساعاتىندا جاۋاپكەرشىلىكتى ءوز موينىنا الىپ, ەلدىڭ بۇرىنعى-كەيىنگى قوردالانعان وزەكتى دە وتكىر ماسەلەلەرىن وڭتايلى شەشۋگە جۇمىلۋى – ماڭىزدى باعدار دەپ بىلەمىز.
قازاقستاننىڭ سوڭعى اي مەن اپتاداعى ساياسي جاڭالىقتارىنان حاباردار قاۋىم جاھان ورىسىنە سەبەپشى ءۇش الىپ ەلمەن اراداعى بايلانىسىمىزدىڭ جاڭا كەزەڭىن اڭعارسا كەرەك. قىتاي باسشىسى سي تسزينپين قازاق ەلىنە رەسمي ساپارى قارساڭىندا جاريالاعان ماقالاسىندا شەكارالاس ەكى مەملەكەت اراسىنداعى قارىم-قاتىناستىڭ تاريحي تامىرىن, بۇگىنگى جەتىستىگىن ايتا كەلىپ, جاڭعىرۋىمىز بەن قاۋىپسىزدىگىمىزدى بارىنشا قولدايتىنىن جەتكىزدى. مۇنى قۇدايى كورشى اقىسى عانا ەمەس, حالىقارالىق ساياسي تاۋەلسىز باعا دەۋگە نەگىز بار.
جاھاندىق كۇردەلى تەكەتىرەستىڭ جۋان ورتاسىندا جۇرگەن رەسەي پرەزيدەنتى ۆلاديمير پۋتين دە قازاقستانداعى ساياسي رەفورمالار مەن جاڭاشىل ىزدەنىستەر تمد, شىۇ اياسىندا وڭ ناتيجە بەرگەنىنە ەلەۋلى دالەل كەلتىردى.
بايىرعى اتا سوزىمىزدە «تار تالاسىپ توزار, كەڭ كەڭەسىپ وزار» دەگەن دانالىق بار. الەمدە قىرعي-قاباق ارەكەت قايتا جاندانعاندا, ەۋرازيا وتىندەگى تاريحى تولعامالى قازاقستاننىڭ اشىقتىق پەن دوستىق ۇستانىمىنان ۇتىلعان الىس-جاقىن كورشىنى كورمەدىك. ۇلى دالانىڭ بۇل اماناتى ءالى تالاي ۋاقىت جانىمىزعا جالاۋ, ورەمىزگە ءورىس بولارى ءسوزسىز.
مەملەكەت باسشىسى بۇۇ باس اسسامبلەياسىنا بارعان ساپارى كەزىندە اقش-تىڭ Politico گازەتىنە بەرگەن سۇحباتىندا: «ۇلتتىق وي-سانامىز كەيىنگى جىلدارى باستان وتكەرگەن تەرەڭ الەۋمەتتىك وزگەرىستەردەن, ەكونوميكالىق جانە قاۋىپسىزدىك داعدارىسىنان تۋىنداعان, بارىنەن دە گورى ءبىز الدەقايدا ادىلەتتى, ءاربىر ازاماتقا قىزمەت ەتەتىن ەل قۇرۋىمىز كەرەك ەكەنىن ايقىنداعان تۇبەگەيلى وزگەرىس دەڭگەيىنە كوتەرىلدى دەپ سانايمىن», دەپ اتاپ كورسەتتى.
ال بۇۇ 77-سەسسياسىنىڭ پىكىر الماسۋ الاڭىنداعى: «قازاقستان پرەزيدەنتى رەتىندەگى ۇستانىمىم – ءاربىر ازامات تەڭ مۇمكىندىكتەرگە يە ءارى قۇقىعى قورعالعان ادىلەتتى قازاقستاندى قۇرۋ. مەنىڭ ەلىمدە ادىلدىك سالتانات قۇرۋى كەرەك. زاڭ مەن ءتارتىپ قوعامىمىزدىڭ نەگىزى بولادى. بۇل جولدىڭ ەڭ ماڭىزدى بولىگى – ترانسفورماتسيالىق ساياسي رەفورمالار. الداعى ايلاردا قازاقستاندا پرەزيدەنت جانە پارلامەنت سايلاۋى وتەدى. مەن پرەزيدەنت وكىلەتتىگىن جەتى جىلدىق ءبىر مەرزىممەن شەكتەۋدى ۇسىندىم. بۇل – قازاقستاندا دەموكراتيانى دامىتۋداعى ناعىز سەرپىلىس», دەگەن ءسوزى امەريكا مەن الەمنىڭ جەتەكشى مەملەكەتتەرىنە ەل ۇستانىمىن تانىتۋدىڭ وركەنيەتتى جولى ەدى.
تاياۋداعى الەمدىك جانە ءداستۇرلى ءدىن كوشباسشىلارىنىڭ 7-سەزىنە قاتىسقان ءىرى رۋحاني تۇلعالار دا قازاقستانداعى بەرەكە-بىرلىكتىڭ, ساياسي ترانسفورماتسيانىڭ جاڭا كەزەڭىنە كوزى جەتىپ, كوڭىلى سەندى. بۇل – ەلىمىزدىڭ زور ابىرويى.
ءيا, قازىر قوعامىمىز جاڭارۋ ۇدەرىسىن باستان كەشىپ وتىر. بيلىك پەن الەۋمەت ۇدەمەلى, ساپالى ساياسي قارىم-قاتىناس دەڭگەيىنە بەت تۇزەدى. مۇنىڭ قوس تاراپقا دا سىن ءھام سىناق ەكەنى تۇسىنىكتى. ءبىز بۇرىنعى نەگىزگى ۇستانىمنان كىندىگىمىزدى ۇزدىك. مۇنىڭ تاۋەكەلمەن بىرگە قايىرى بار ەكەنىن سەزىنە بىلگەنىمىز ابزال. ول قايىردىڭ اتاۋى – ادىلەتتى مەملەكەت, ءبىرتۇتاس ۇلت, بەرەكەلى قوعام.
قاراپايىم جۇرتشىلىق, زيالى قاۋىم قازاقستان جاڭارۋىنىڭ اقيقاتىنا سەنە باستادى. «يگىلىك باسى – ىنتىماق» دەپ وسىندايدا ايتسا كەرەك.
پرەزيدەنتتىڭ ءبىر رەتتىك جانە جەتى جىلدىق وكىلەتتىگى – قاناعات پەن ءىس ناتيجەسىن كورسەتەتىن شاما. الەم تاجىريبەسى مەن قازاقستاننىڭ قاۋىپ-قاتەردى ەسكەرىپ بارىپ ۇسىنعان جولى – ءبىرىن-ءبىرى تەرىستەمەيدى, قايتا جاڭا ىزدەنىسپەن تولىقتىرادى. حالىق ىشىندە ايتىلىپ قالاتىن «اتا زاڭعا بىتپەيتىن تۇزەتۋ» سىنىنا بۇل وزگەرىس, بۇل جاڭا تاجىريبە شىداس بەرەدى دەپ سانايمىز. ويتكەنى وعان كەپىل – حالىق سەنىمىن الاتىن, دۇرىسى ەل اماناتىن ارقالايتىن پرەزيدەنتتىڭ ءوزى بولماق. ءبىز نەگىزگى زاڭدىق-قۇقىقتىق قۇجاتتارىمىزدا «سۋپەرپرەزيدەنتتىككە جول بەرىلمەيتىنىن» شەگەلەپ كورسەتتىك. بيىك مىنبەردەن ونىڭ ورىندالۋ تەتىگىن دە ايتتىق.
ۇلت ۇستازى احمەت بايتۇرسىن ۇلى: «وتكەندى قۋعاندى قويىپ, وسى كۇيىڭدى جوندەۋگە ءجون ىزدەۋ كەرەك», دەپ جازىپ ەدى. ءدال بۇگىن ءبىز سەنىمسىزدىك پەن كۇدىككە جول بەرگەن ۋاقىتتى ارتقا تاستاپ, سەنىم مەن ادىلەتكە يەك ارتۋىمىز قاجەت. ادامنىڭ ادال نيەتىنە قۇت قونادى, قوعامنىڭ بايىپتى بايلامىنا باق تۇراقتايدى.
