«مەملەكەت باسشىسىنىڭ 20 قاراشاعا پرەزيدەنت سايلاۋىن تاعايىنداۋ تۋرالى جارلىعى جاڭا سايلاۋ تسيكلىن باستادى.
پرەزيدەنت سايلاۋىن وتكىزۋ باستاماسى سوڭعى ءۇش جىلداعى ساياسي قايتا قۇرۋلاردىڭ قيسىنىنا تولىق سايكەس كەلەدى. كونستيتۋتسيالىق رەفورما بيلىك تارماقتارى اراسىنداعى ءوزارا ءىس-قيمىلدىڭ جاڭا, تەڭگەرىمدى ءتارتىبىن قامتاماسىز ەتتى. ال جاڭا ۇلگىنى ىسكە قوسۋ ءۇشىن بۇكىل ساياسي جۇيەنى, سونىڭ ىشىندە پرەزيدەنت, پارلامەنت, ۇكىمەت, ءماسليحات سياقتى مەملەكەتتىڭ نەگىزگى ينستيتۋتتارىن قايتا ىسكە قوسۋ قاجەت», دەپ جازدى ە.قارين.
مەملەكەتتىك حاتشىنىڭ ايتۋى بويىنشا, الداعى سايلاۋ ناۋقانى تۋرالى پىكىرتالاستار ساياسي ورتادا كوپتەن بەرى ءجۇرىپ جاتىر. بىرقاتار ساراپشىلار كوكتەمدە كەزەكتەن تىس سايلاۋ وتكىزۋدى جاقتاعان بولاتىن.
اعىمداعى سايلاۋدىڭ ەرەكشەلىگى الداعى سايلاۋ ناۋقاندارىنىڭ بارلىق كەستەسىن الدىن الا جاريالاۋ بولدى.
«پرەزيدەنتتىك سايلاۋدى قاسىم-جومارت توقاەۆ ءتيىستى جارلىققا قول قويىلعانعا دەيىن ءبىر ايعا جۋىق ۋاقىت بۇرىن جاريالادى, ال بۇعان دەيىن بارلىق كەزەكتەن تىس سايلاۋدى وتكىزۋ كۇنى تۋرالى جارلىققا قول قويىلعان بولاتىن. بۇل ۋاقىت الداعى ناۋقاندى كەڭ قوعامدىق تالقىلاۋعا عانا ەمەس, الەۋەتتى قاتىسۋشىلاردى الدىن الا دايىنداۋعا دا جەتكىلىكتى بولدى. زاڭ بويىنشا سايلاۋ تاعايىندالعان كۇننەن باستاپ ەكى اي ىشىندە وتەدى, بىراق ءىس جۇزىندە بۇكىل ناۋقان ءۇش ايعا سوزىلادى», دەپ ءتۇسىندىردى ە.قارين.
ونىڭ ايتۋى بويىنشا, قوعامنىڭ بىرتۇتاستىعى, مەملەكەتتىڭ تۇراقتىلىعى, ەلدىڭ كەز كەلگەن ىشكى جانە سىرتقى سىن-قاتەرلەرگە لايىقتى جاۋاپ بەرۋ مۇمكىندىگى تەك بىرقالىپتى جانە تۇراقتى ساياسي جۇيە جاعدايىندا عانا قامتاماسىز ەتىلەدى. سوندىقتان گەوستراتەگيالىق تۇراقسىزدىقتىڭ كۇشەيۋى جاعدايىندا الداعى پرەزيدەنتتىك سايلاۋ ەلىمىزدى اۋقىمدى الەۋمەتتىك-ەكونوميكالىق رەفورمالاردىڭ جاڭا كەزەڭى الدىندا توپتاستىرۋدىڭ ماڭىزدى فاكتورىنا اينالۋى ءتيىس.
