دالىرەك ايتساق, 2019-2022 جىلدارى پرەزيدەنتتىڭ ساياسي باستامالارىنىڭ وتە ۇلكەن پاكەتى زاڭنامالىق دەڭگەيدە ىسكە استى. ەندى قازىر سايلاۋ ارقىلى اتالعان رەفورمالاردى ناقتى ورىنداۋ, ونى بەكىتۋ كەزەڭى باستالدى.
ءبىرىنشى كەزەڭدە ءبىز كونستيتۋتسيالىق رەفورما وتكىزدىك, رەفەرەندۋمدا اتا زاڭ 30 پايىزعا جاڭاردى. وسىنداي ۇلكەن وزگەرىستەردەن كەيىن پرەزيدەنت, پارلامەنت جانە بارلىق دەڭگەيدەگى ءماسليحاتتاردى سايلاۋ ماڭىزدى. وسىلايشا, پرەزيدەنت جانە پارلامەنت سايلاۋىن كەزەڭ-كەزەڭىمەن وتكىزۋ ارقىلى ءبىز ەڭ الدىمەن, ەلىمىزدىڭ ساياسي جۇيەسىن قايتا جاڭارتامىز.
كەزەكتەن تىس پرەزيدەنت سايلاۋى 20 قاراشادا وتەتىن بولدى. كەلەسى جىلى پارلامەنت سايلاۋى بولادى. قوعام بولعان سوڭ ءتۇرلى پىكىردىڭ ايتىلۋى زاڭدىلىق. وسى ورايدا, «قازىرگىدەي الماعايىپ كەزەڭدە كەزەكتەن تىس سايلاۋ وتكىزۋدىڭ قاجەتى قانشا» دەگەن پىكىردى دە اراگىدىك ەستىپ قالامىز. مەنىڭشە, ءۇش جىلدا اتقارىلعان اۋقىمدى جۇمىستار مەن جۇرگىزىلگەن ءتۇرلى رەفورمالاردان كەيىن سايلاۋ وتكىزىپ, ەلدىڭ الداعى باعىت-باعدارىن تاعى ءبىر ايقىنداپ الاتىن ۋاقىت جەتتى. سول سەبەپتى ەل تۇرعىندارى الداعى ساياسي شاراعا ءبىر ادامداي جۇمىلا اتسالىسۋى كەرەك.
ءوز تاريحىندا «بىرلىك كەرەك» دەگەن ءسوزدى قازاقتان كوپ ايتقان ۇلت جوق شىعار. ءدال وسى ءسوزدى قازىر دە ايتۋعا ءتيىسپىز. ويتكەنى مەملەكەت ءۇشىن بىرلىك بىزگە اۋاداي قاجەت. الداعى سايلاۋ حالىقتى بىرىكتىرۋگە باعىتتالعان. بۇگىنگى الەمدە قالىپتاسقان جاعدايدى قاپەرگە الا وتىرىپ, ازاماتتارىمىز بولاشاقتاعى باعىتىمىز بەن ناقتى جوسپارىمىزدى انىق ءتۇسىنۋى قاجەت. سايلاۋ كونستيتۋتسيالىق رەفورمالاردىڭ قورىتىندىلارىن بەكىتىپ قانا قويمايدى, سونداي-اق باسقا سالالارداعى رەفورمالاردى جالعاستىرىپ, نىعايتۋ ءۇشىن قاجەتتى ۋاقىت پەن سەنىم مانداتىن بەرەدى. ال الداعى رەفورمالار ەڭ الدىمەن الەۋمەتتىك جانە ەكونوميكالىق باعىتتى قامتيتىنى داۋسىز.
جاستاردىڭ وكىلى بولعاندىقتان, ءوز قاتارلاستارىمدى الداعى سايلاۋدا بەلسەندى بولۋعا شاقىرامىن.
داۋرەن عازيز,
س.تورايعىروۆ ۋنيۆەرسيتەتى, ساياساتتانۋ عىلىمدارىنىڭ ماگيسترانتى
پاۆلودار
