بۇگىندە بازارلار مەن دۇكەندەردەن نەبىر ويىنشىقتاردى قينالماي-اق تابۋعا بولادى. الايدا, بالانى ءجيى قۋانتامىن دەپ ءجۇرىپ ونى اۋرۋدىڭ تىرناعىنا ءوزىڭىز ىلىكتىرۋىڭىز عاجاپ ەمەس. ەلىمىزدە وتكەن جىلى ويىنشىقتار ساپاسىنا 18 رەت تەكسەرۋ جۇرگىزىلگەن ەكەن. انىقتالعان زاڭسىزدىقتار وتە كوپ بولىپتى.
تەكسەرۋگە ىلىككەندەردىڭ 70-80 پايىزعا جۋىعى ەشقانداي سەرتيفيكات ۇسىنا الماعان. راس, ويىنشىقتىڭ قايدان شىققانى, قانداي ماتەريالدان جاسالعانى, ول ماتەريالدىڭ قۇرامىنداعى ەلەمەنتتەردىڭ مولشەرى كورسەتىلگەن انىقتاماسى بارلارى دا كەزدەسكەن. ءتىپتى بالا دەنساۋلىعىنا تىكەلەي قاۋىپ توندىرەتىن ويىنشىقتار دا ءبىزدىڭ دۇكەن سورەلەرىندە از ەمەس كورىنەدى. ماسەلەن, شەتتەرى تەگىستەلمەگەن قولاربالارعا (كولياسكا), ءار ءتۇرلى تەحنيكاعا ۇقساتىپ جاسالعان ويىنشىقتارعا بالا قولىن وپ-وڭاي كەسىپ الۋى مۇمكىن ەكەندىگى انىقتالعان. سوسىن بوياۋلارىنىڭ ءيىسى شامادان تىس ويىنشىقتار دا كوپ كەزدەسىپتى. وسى تەكسەرۋلەر ناتيجەسىندە 300-گە جۋىق ويىنشىقتاردى ساۋدالاۋعا تىيىم سالىندى. قۇقىق بۇزۋشىلىق كودەكسىنىڭ 317-بابىنا سايكەس ونداي ويىنشىقتاردى ۇسىنعان جەكە كاسىپكەرگە 10-نان 30 ايلىق ەسەپتىك كورسەتكىش كولەمىندە ايىپپۇل سالىنعانىنان دا حاباردارمىز. نەگە دەگەنگە كەلسەك, كوپتەگەن ويىنشىقتاردىڭ بوياۋى بالا اعزاسىنا كەرى اسەرىن تيگىزىپ, ال قىزىلدى-جاسىلدى تۇستەرى كوزدى اۋىرتادى. سونىڭ سالدارىنان بالانىڭ كورۋ قابىلەتى تومەندەيدى. سونداي-اق, جاسالعان ماتەريالدارى قۇرامىندا اۋىر مەتالدار بار ەكەنى انىقتالعان. اسىرەسە, قىتايدان اكەلىنگەن ويىنشىقتاردا فورمالدەگيد ادەتتەگىسىنەن 10-15 ەسە كوپ بولعان. مۇنىڭ ءبارى بالا دەنساۋلىعىنا قاۋىپتى. ءسابي اينالانى تانۋدى اۋزىنا سالۋدان باستايدى. قولىنا تۇسكەن نارسەنىڭ ءبارىن تىسىنە باسىپ كورۋگە اۋەس. سول كەزدە بوياۋدىڭ قۇرامىنداعى زياندى زاتتار ىشكى اعزاعا تۇسەدى. اسقازان, ىشەك جولدارى جۇمىستارىنا زاقىم كەلتىرەدى. بالانىڭ يممۋنيتەتىنىڭ ءالسىز بولۋىنا, اۋرۋعا بەيىمدىلىگىن ارتتىرۋدا دا ويىنشىقتاردىڭ قوسار ۇلەسى از ەمەس. بۇل ەندى مىقتاپ ەسكەرەتىن جايت. ەگەر بالاڭىزعا العان ويىنشىعىڭىز (شىنىمەن دە) رەسەي, ۋكراينا نەمەسە بەلورۋسسيانىكى بولسا, وندا ەشتەڭەدەن قاۋىپتەنبەۋىڭىزگە بولادى. بۇل ەلدەردە وسى باعىتتا وندىرىلەتىن تاۋارلاردىڭ ساپاسىنا تالاپ قاتاڭ. نورمادان ءسال-ءپال اۋىتقۋشىلىق بايقالسا, ونداي كاسىپورىننىڭ جۇمىسىن مۇلدەم توقتاتۋعا دەيىن شارا قولدانادى. ساپاعا شالاعايلىق جاساساڭ, كاسىپورىندى ءوز قولىڭمەن قۇرتقان بولىپ شىعاسىڭ. سوندىقتان بۇل ەلدەردە (اسىرەسە رەسەي) ويىنشىقتار ساپالى جاسالادى. ال ءبىزدىڭ ەلىمىز بۇل باعىتتاعى ءوندىرىستى باياعىدا-اق توقتاتقان. كەڭەس زامانىندا قازاقستاندا “قىزىل تۋ” ويىنشىق زاۋىتى بولعان دەسەدى. نارىقتىڭ تار سوقپاعىنان وتە الماي قۇردىمعا كەتسە كەرەك. ونىڭ ورنىن باسقان “سۇڭقار” اتىنا زاتى ساي بولا المادى. ويىنشىققا كەرەك زاتتى, ەڭ اقىرى بوياۋدى دا رەسەي مەن ۋكراينادان تاسۋ كاسىپورىنعا تابىس اكەلمەدى. سودان بەرى بۇل سالاعا بەتتەۋگە ەشكىم باتا الماي وتىر. رەسپۋبليكالىق, وبلىستىق دەڭگەيدەگى ساراپتامالاردىڭ بارلىعى رەسەي ويىنشىقتارىنىڭ ساپاسى جوعارى ەكەنىن كورسەتتى. الايدا, ءبىزدىڭ وبلىسىمىزدا (ەلىمىز بويىنشا دا سولاي) ساۋدا نۇكتەلەرىنە شىعاتىن ويىنشىقتاردىڭ 80-90 پايىزى قىتايدىكى. بۇل ەلدىڭ ويىنشىقتارىنىڭ ومىرگە قاۋىپتىلىگى قانشاما رەت انىقتالسا دا, ءبارىبىر بازار بىتكەندى تولتىرىپ قويدىق. قىتاي ويىنشىقتارى بالانىڭ پسيحيكاسىنا دا از زاقىم كەلتىرمەيتىنى دە دالەلدەنگەن جايت دەسەم, كوزگە كورىنىپ تۇرعانى – ولار جاساعان بالاپاننىڭ ءتۇسى سارى ەمەس كوك, ءپىلدىڭ ءتۇسى قىزىل, ت.س.س. ءبارى كەرىسىنشە بولىپ كەلەدى. قىتايدىڭ قولتىراۋىنىمەن ويناپ وسكەن بالا ەرتەڭ ونىڭ تابيعي ءتۇسى جاسىل ەكەنىن ءبىلىپ اجەپتاۋىر ابىرجىپ قالۋى دا عاجاپ ەمەس. بۇل سايىپ كەلگەندە, بالانىڭ دۇنيەتانىمىن شاتاستىرۋ, جادىن بۇزۋعا باعىتتالعان ارەكەت. قىتاي ويىنشىقتارىنىڭ تىم اشىق ءتۇستى بولۋ سەبەبىندە دە ءبىر سىر بار. مامانداردىڭ ايتۋىنشا, مۇنداي تۇستەر بالانىڭ كوزىن شامادان ارتىق تىتىركەندىرەدى. سونىڭ سالدارىنان جۇيكەلەرىنە سالماق تۇسەدى. بالانىڭ ساناسىندا قورشاعان ورتانى تانۋ پروتسەستەرى دۇرىس جۇرمەيدى. قولدانۋعا ارنالعان تۇسىنىكتەمەسى جوق ويىنشىقتاردى ساتۋعا دا زاڭ بويىنشا تىيىم سالىنادى. سوندىقتان بالاڭىزعا ويىنشىق ساتىپ الاردا مەيلىنشە اباي بولىڭىز. نۇركەن توقاەۆ.
