كەزدەسۋ بارىسىندا قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى جوعارى ارىپتەستىكتىڭ ماڭىزى, سونداي-اق 30 جىلدىق ءوزارا قارىم-قاتىناستاردىڭ تابىستى ناتيجەلەرى اتاپ ءوتىلدى.
سەنات توراعاسىنىڭ ورىنباسارى ددۇ وكىلىنە ەلىمىزدىڭ دەنساۋلىق ساقتاۋ سالاسىن دامىتۋ ماقساتىندا اتقارىلىپ جاتقان جۇمىستار تۋرالى اقپارات بەردى.
«مەملەكەت باسشىسى قاسىم-جومارت توقاەۆتىڭ ايتۋىنشا, الداعى كەزەڭدەگى ەڭ ماڭىزدى مىندەتتەردىڭ ءبىرى – ۇلت دەنساۋلىعىن قامتاماسىز ەتۋ. سوندىقتان ەلىمىزدەگى مەديتسينالىق ينفراقۇرىلىمدى جاقسارتۋعا ەرەكشە نازار اۋدارىلىپ كەلەدى. كەلەسى جىلدان باستاپ اۋىل تۇرعىندارىنىڭ ساۋلىعىنا باعىتتالعان ۇلتتىق جوبانى ىسكە اسىرۋ باستالادى, ونىڭ اياسىندا 32 اۋداندىق اۋرۋحانا جاڭعىرتىلادى, اۋدانارالىق كوپ سالالىق مەكەمەلەر بولىپ قايتا قۇرىلادى دەگەن جوسپار بار. ال ەكى جىل ىشىندە 650 اۋىلدا مەديتسينالىق جانە فەلدشەرلىك-اكۋشەرلىك پۋنكتتەر سالىنىپ, تولىق جابدىقتالادى», دەپ اتاپ ءوتتى توراعا ورىنباسارى.
اڭگىمە بارىسىندا تاراپتار حالىقارالىق ۇيىمداردىڭ قاتىسۋىمەن وڭىرارالىق دەڭگەيدە بىرلەسكەن كۇش-جىگەردى تالاپ ەتەتىن ارال تەڭىزىنىڭ پروبلەمالىق ماسەلەلەرىن دە ورتاعا سالدى.
توراعا ورىنباسارى بۇۇ باس اسسامبلەياسىنىڭ 77-ءشى سەسسياسىندا سويلەگەن سوزىندە مەملەكەت باسشىسى قاسىم-جومارت توقاەۆ قاتىسۋشىلاردىڭ نازارىن ارال تەڭىزى ماسەلەلەرىنە اۋدارعانىن جانە بارلىق مۇددەلى تاراپتاردى ەكولوگيا جانە كليمات پروبلەمالارىن شەشۋ جۇمىستارىن جالعاستىرۋعا شاقىرعانىن ايتتى.
ەقىۇ پا شىلدە سەسسياسى بارىسىندا قازاقستان مەن وزبەكستان ارال تەڭىزىن قۇتقارۋعا بايلانىستى جوبالاردى ىسكە اسىرۋدا دونور بولۋعا شاقىرا وتىرىپ, ۇيىمعا مۇشە مەملەكەتتەرگە بىرلەسكەن ۇندەۋ جولدادى.
«كەلەسى جىلى قر پارلامەنتى سەناتىنىڭ شاقىرۋىمەن ەقىۇ پا دەپۋتاتتارى اپات اۋقىمىنا كوز جەتكىزۋ جانە ىنتىماقتاستىقتىڭ بۇدان بىلايعى باعىتتارىن بەلگىلەۋ ءۇشىن ارال وڭىرىنە بارادى. قازاقستان ەۋروپالىق ايماقتىق بيۋرونىڭ كومەگىمەن ددۇ ەلدىك كەڭسەلەرىنىڭ ارال ءوڭىرى حالقىنىڭ دەنساۋلىعىنا اسەر ەتەتىن فاكتورلاردى زەرتتەۋگە بىرىڭعاي ءتاسىلدى ازىرلەۋ ءۇشىن كۇش-جىگەر مەن رەسۋرستاردى بىرىكتىرۋگە كومەك كورسەتۋدى سۇرايدى», دەدى ولگا پەرەپەچينا.
ددۇ ەۋروپالىق وڭىرلىك بيۋروسىنىڭ ديرەكتورى حانس كلۋگە ورنىقتى دامۋدىڭ سالاۋاتتى ءومىر سالتى جانە كەز كەلگەن جاستاعى بارلىق ادامداردىڭ ءال-اۋقاتىنا جاردەمدەسۋ جونىندەگى جاھاندىق ماقساتىنا قول جەتكىزۋدى قامتاماسىز ەتۋ جونىندەگى قر پارلامەنتى سەناتىنىڭ جۇمىستى قالىپتاستىرۋ جانە ۇيلەستىرۋ بولىگىندەگى قىزمەتىنە جوعارى باعا بەردى.
