بيىل ۇلتتىق پارك قىزمەتكەرلەرى ورماندى ورتتەن ساقتاۋعا ەرەكشە كوڭىل ءبولدى. وسى ورايدا Smart-Burabay جۇيەسى ينسپەكتورلاردىڭ جۇمىسىن جەڭىلدەتىپ, نۋ ورمانداردى ءتىلسىز جاۋدان قورعاۋعا زور سەپتىگىن تيگىزگەن.
مۇنداعى «اقىلدى» جۇيە بيىك مۇنارانىڭ باسىنداعى كامەرامەن ورماننىڭ اۋماعىن باقىلايدى. وبەكتيۆتىڭ «نازارىنا» ءتۇتىن نەمەسە باسقا دا كۇدىكتى كادر ىلىنسە, تسيفرلى جۇيە ونى قىزىل كونتۋرمەن بەلگىلەپ, ۇلتتىق پاركتىڭ تاۋلىك بويى جۇمىس ىستەيتىن جەدەل باسقارۋ ورتالىعىنا جىبەرەدى. ال ورتالىقتىڭ كەزەكشى ديسپەتچەرلەرى توتەنشە قىزمەتكە حابار جەتكىزەدى.
ايتا كەتسەك, 129 مىڭ گەكتاردان استام جەردى الىپ جاتقان ۇلتتىق پارك اۋماعىندا وسىنداي 13 مۇنارا بار. تسيفرلى جۇيەنىڭ كومەگىمەن اقىلباي (4 رەت), بۋراباي (5 رەت), جالايىر (1 رەت) سياقتى بارلىعى 9 ورمان شارۋاشىلىعىندا تۇتانعان ءورت تەز ارادا ءسوندىرىلىپ, جالىن بار بولعانى 0,5 گەكتار جەردى شارپىدى.
بۇدان بولەك, 8 اي ىشىندە تابيعات قورعاۋ زاڭناماسىنا قايشى 51 وقيعا تىركەلىپ, ۇلتتىق پارك اۋماعىندا ساقتالاتىن ەرەجە 46 مارتە بۇزىلعانى انىقتالدى. ءتارتىپ بۇزعۋشىلاردىڭ جەكە باستارى انىقتالىپ, 440 مىڭ تەڭگەدەن استام اكىمشىلىك ايىپپۇل تولەدى.
سونداي-اق ءتارتىپ ساقشىلارى زاڭسىز اعاش وتاۋ (3), بالىق اۋلاۋ (1) جانە براكونەرلىكپەن اينالىسۋ (1) فاكتىلەرى بويىنشا 5 قىلمىستىق ءىس قوزعالدى.
