ءبىلىم • 20 قىركۇيەك، 2022

قازۇۋ الەمدىك رەيتينگتە 150-ورىنعا كوتەرىلدى

94 رەت كورسەتىلدى

بيىل دا جوعارى ءبىلىمنىڭ بايىرعى قاراشاڭىراعى ءال-فارابي اتىنداعى قازاق ۇلتتىق ۋنيۆەرسيتەتى «ستۋدەنتتەر قاتارىنا قابىلداۋ» كەشىن وتكىزىپ، قازۇۋ قالاشىعىن كەرەمەت كۇيگە بولەدى. دەگەنمەن ۋنيۆەرسيتەت بيىلعى سالتاناتىنا سونى جەتىستىكتەرمەن كەلىپ وتىر، دەپ جازادى Egemen.kz.

اتالعان ۋنيۆەرسيتەت QS WUR الەمدىك رەيتينگىندە 150-ورىنعا كوتەرىلدى. وعان قوسا جاقىندا ۇكىمەت قاۋلىسىمەن قازۇۋ-عا زەرتتەۋ ۋنيۆەرسيتەتى مارتەبەسى بەرىلدى.

وسىناۋ ايتۋلى وقيعا اياسىندا الماتى قالاسىنىڭ اكىمى ەربولات دوساەۆ، بەلگىلى عالىمدار، جازۋشىلار، قازاقستاندىق ەسترادا جۇلدىزدارى، بلوگەرلەر، ۋنيۆەرسيتەت وقىتۋشىلارى مەن ستۋدەنتتەرى ورتاقتاسىپ، ەڭسەلى ء ال-فارابي ەسكەرتكىشى الدىندا توعىستى.

ءداستۇرلى مەرەكەدە ءبىرىنشى كۋرس ستۋدەنتتەرى شەرۋلەتتى. سودان كەيىن سالتاناتتى شاراعا جينالعان 5 مىڭ ادام ءانۇراندى بىرگە ورىندادى.

ءال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ ءبىرىنشى كۋرس ستۋدەنتتەرىن ومىردەگى ايتۋلى كۇنمەن قۇتتىقتاي وتىرىپ، ۋنيۆەرسيتەتتىڭ قازىرگى جەتىستىكتەرى جايلى باياندادى.

د

ايتقانداي، قازىرگى  ۋاقىتتا الەمدىك رەيتينگتەگى كوشباسشى وقۋ ورىندارىنىڭ قاتارىنا قوسىلعان ۋنيۆەرسيتەتكە پرەزيدەنت قاسىم-جومارت توقاەۆ بيىل العاش رەت كەلىپ، ءبىلىم الىپ وتىرعان جاستارمەن كەزدەسىپ، ۋنيۆەرسيتەتتى دامىتۋ جونىندە بىرقاتار تاپسىرما بەرگەنى ايان. مەملەكەت باسشىسىنىڭ قولداۋىمەن بيىل تۇركيانىڭ ىستانبۇل قالاسى مەن قىرعىز رەسپۋبليكاسىنىڭ استاناسى بىشكەكتە قازۇۋ فيليالدارى اشىلدى. سونىمەن قاتار قازۇۋ-دا  عىلىم جانە جوعارى ءبىلىم ءمينيسترى ساياسات نۇربەكتىڭ قاتىسۋىمەن رەسەيدىڭ ميفي ۇلتتىق يادرولىق زەرتتەۋ ۋنيۆەرسيتەتىنىڭ فيليالى اشىلدى.

ۋنيۆەرسيتەتتە 25 مىڭعا جۋىق ستۋدەنت وقيدى، ولاردىڭ 2،5 مىڭعا جۋىعى – الەمنىڭ 50 ەلىنەن كەلگەن شەتەلدىك ستۋدەنتتەر. جاڭا وقۋ جىلىندا قازۇۋ-عا 7 690 ستۋدەنت قابىلداندى. مەملەكەتتىك گرانتتى 5 156 تالاپكەر ۇتىپ السا، اقىلى بولىمگە 2 534 ستۋدەنت وقۋعا ءتۇستى. ولاردىڭ ىشىندە 672 التىن بەلگى يەگەرى، 619 ۇزدىك اتتەستات يەگەرى، 12 عىلىمي جوبا جەڭىمپازى، 69 حالىقارالىق جانە رەسپۋبليكالىق وليمپيادا جۇلدەگەرى بار.

جوو باسشىسى ءوز سوزىندە: «ۋنيۆەرسيتەتتەگى فاكۋلتەتتەر، كافەدرالار، عىلىمي-زەرتتەۋ ينستيتۋتتارى، يننوۆاتسيالىق زەرتحانالار مەن عىلىمي ورتالىقتاردىڭ بارلىعى سىزدەردىڭ تولىققاندى ءبىلىم الۋلارىڭىزعا قىزمەت ەتەدى. وتكەن جىلدان بەرى جاتاقحانالار مەن وقۋ كورپۋستارى كۇردەلى جوندەۋدەن ءوتتى. بۇل جۇمىستار بيىل دا جالعاسىپ جاتىر. الداعى ۋاقىتتا جاڭا جاتاقحانا سالۋ جوسپاردا بار. وسى يگىلىكتەردى دۇرىس پايدالانىڭىزدار. عىلىمدى يگەرىپ، بىلىكتى مامان بولىڭىزدار»، دەپ ستۋدەنتتەرگە ۇندەۋ تاستادى.

بيىلعى سالتاناتتى ءراسىم فورماتى ءداستۇرلى كىلت بەرۋدەن وزگەشە، جاڭا تەحنولوگيالاردى پايدالانا وتىرىپ جۇزەگە استى. ءبىرىنشى كۋرس ستۋدەنتتەرى ساحنادان دەربەس QR-كودىن سكانەرلەپ، ەرەكشە ساتكە بارشاسى اتسالىستى.

سونىمەن سالتاناتتى وقيعا كونتسەرتتىك باعدارلاماعا ۇلاسىپ، ساحنادا « ۇلىتاۋ» ەتنو-روك-توبى، تانىمال ءانشى گۇلنۇر ورازىمبەتوۆا، جاستار اندەرىن ءجيى تىڭدايتىن MALIKA YES، «مەلومەن» توبى جانە وزگە دە ەسترادا جۇلدىزدارى اننەن شاشۋ شاشتى.

مەرەكەدە قازۇۋ-دىڭ تالانتتى، كرەاتيۆتى جاستارى دا ءوز ونەرلەرىن پاش ەتتى. حيميا جانە حيميالىق تەحنولوگيالار جانە بيولوگيا جانە بيوتەحنولوگيالار فاكۋلتەتتەرىنىڭ ستۋدەنتتەرى ۋنيۆەرسيتەت عالىمدارىنىڭ عىلىمي جاڭالىقتارىنىڭ تۇساۋكەسەرىن وتكىزدى. كورەرمەندەر «قازۇۋ ستۋدەنتتەرىنىڭ سپورتتىق جەتىستىكتەرى» كومپوزيتسياسىن تاماشالاپ «چەمپيون» انىنە قۇلاق ءتۇردى. جوو سپورتشىلارىنا، حالىقارالىق جانە ۇلتتىق جارىستاردىڭ جەڭىمپازدارىنا كۋبوكتار تابىس ەتىلدى. قىزدار كۆارتەتى «قازاق، قىرعىز ءبىر تۋعان» ءانىن اۋەلەتە شىرقادى. سونداي-اق «فارابي قىزدارى»، RAIM توبى دا ساحنادا ءان شىرقاپ، كورەرمەندەردىڭ قوشەمەتىنە بولەندى.

جاستار ۇيىمدارىنىڭ كوميتەتى ءارتۇرلى فلەشموب دايىنداعان ەكەن، بۇل دا مەرەكەنىڭ ءسانىن كەلتىردى. ستۋدەنتتەر مەرەكەسى فانتاستيكالىق لازەرلىك شوۋ مەن بي كەشىنە ۇلاستى.

سوڭعى جاڭالىقتار

ۇقساس جاڭالىقتار