ۇلتتىق انيماتسيا اتاسىنىڭ ومىرىندەگى ەڭ جارقىن ساتتەرگە نەگىزدەلگەن فيلم «امەن اعانىڭ عاجايىپ اعاشى» جۇمىس اتاۋىمەن قىسقامەترلى انيماتسيالىق تۋىندىلاردىڭ قاتارىن تولىقتىرماق. اتالعان كارتينا ش.ايمانوۆ اتىنداعى اق «قازاقفيلم» كينوستۋدياسىندا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلۋدە. انيماتسيالىق ءفيلمنىڭ ستسەناريىن امەن قايداروۆتىڭ شاكىرتى تامارا مۇقانوۆا مەن قازاق ميفولوگياسىن زەرتتەۋشى, جازۋشى, كينوستسەناريست زيرا ناۋرىزباەۆا جازعان.
«فيلم جەلىسى امەن اعانىڭ «قارلىعاشتىڭ قۇيرىعى نەگە ايىر؟» فيلمىندە جۇمىس ىستەگەن جىلدارىمەن تىكەلەي بايلانىستى ءوربيدى. شىعارماشىلىعىن بالالار الەمىمەن بايلانىستىرعان امەن اعاعا شابىت قالاي كەلدى, ول انيماتسيا ونەرىمەن قالاي اينالىسا باستادى, ءتۇسىرىلىم كەزىندەگى باسقا دا باستان كەشكەن قيىندىقتارى مەن قىزىقتارىن بۇگىنگى كورەرمەن بىلۋگە ءتيىس دەپ ويلايمىن. نەگىزگى مالىمەتتەر مەن ادەبي دەرەكتەر مارقۇم ب.نوگەربەكوۆتىڭ «كوگدا وجيۆاەت سكازكي» كىتابىنان الىندى. فيلم تارماقتى ءتاجى اسپانعا جەتكەن ەرەكشە الما اعاشىنىڭ اق-قارا سىزباسىنان باستالادى, جەلمەن بىرگە سىبدىرلاعان ۇلكەن جاپىراقتارى مەن جەردىڭ قالىڭ قاتپارىنا ءسىڭىپ, قۇنارلانا تۇسكەن تامىرلارى ۇلتتىق انيماتسيانىڭ سيمۆوليكالىق بەينەسى ىسپەتتى. امەن اعا اعاشىنىڭ ەرەكشەلىگى دە سول. مۇقيات زەرتتەگەندە, المالار دوڭگەلەك قاڭىلتىر جاشىكتەر بولىپ شىعادى (ول كەزدەگى فيلمدەر دوڭگەلەك قاڭىلتىر جاشىكتەردە ساقتالعان)», – دەدى ءفيلمنىڭ قويۋشى رەجيسسەرى ءجانادىل بايداربەكوۆ.
«جالپى, 10 مينۋتتىق فيلم جاساۋعا كەمىندە جارتى جىل ۋاقىت كەتەدى. قازىر بىزدە تەحنيكالىق تۇرعىدان ءبىراز قيىندىقتار بار. سەبەبى سۋرەتتە تەك مۋلتفيلم جاساۋشىلاردى عانا ەمەس, امەن اعانىڭ جانىندا جۇمىس ىستەگەن نۇرعيسا تىلەنديەۆ, ولجاس سۇلەيمەنوۆ سىندى مادەنيەتىمىزدىڭ كورنەكتى قايراتكەرلەرىنىڭ, وزگە دە بەلگىلى تۇلعالاردىڭ وبرازىن, ءتۇر الپەتىن بارىنشا ۇقساتىپ جاساۋ ۇلكەن جاۋاپكەرشىلىكتى جۇكتەپ وتىر»,– دەيدى جاس رەجيسسەر.
«امەن اعانىڭ عاجايىپ اعاشى» جۇمىس اتاۋىمەن قولعا العان انيماتسيالىق ءفيلمىن جاساۋعا ون شاقتى مامان جۇمىلدىرىلعان. جوسپار بويىنشا جىل سوڭىنا دەيىن تۋىندىنى اياقتاۋ مىندەتى تۇر. قازاقستاندىق كورەرمەنگە الداعى جىلدىڭ كوكتەم ايىندا امەن قايداروۆتىڭ 100 جىلدىق مەرەيتويى قارساڭىندا جول تارتادى.
الماتى
