بايىرقاپ قاراساق, قازاقتىڭ كورپەسى ءارى قالىڭ, ءارى جىلى. ءبىزدىڭ كورپەمىزدى جامىلماعان حالىق جوق شىعار, قيىن كۇندەردىڭ بارىندە كورپەمىز باسقالارعا پانا بولدى. كورپەمىزدى قوسىلا جامىلعانداردىڭ ءبارى ايتۋلى كۇنى قانداي جاقسى ءسوز, جاعىمدى جاڭالىق ەستىر ەكەنبىز دەپ كورپە استىنان مويىندارىن قىلتيتىپ, قۇلاقتارىن ءتۇرىپ ءجۇردى.
جولداۋدا جاقسى ءسوز كوپ, مۇنىڭ ءبارى – بولاشاقتىڭ باستاۋى. ۇلتتىق قوردى حالىق نەسىبەسى دەپ قاراپ, ەل يگىلىگىنە جاراتۋ دەگەن قۇلاققا جاعىمدى ءارى جۇرەكتى دۇرسىلدەتەتىن-اق ءسوز. تەك اقىرى قايىرلى بولسىن. جولاي باتىراش-قوتىراشتاردىڭ كەس-كەستەۋىنەن ساقتاسىن. قاڭتار قىرعىنىنا قاتىسقاندارعا جەڭىلدىك جاساۋ دا ەل مۇڭى مەن ارمانى ەدى. ول دا ورىندالاتىن بولدى. جولداۋدى كوگىلدىر ەكراننان كورىپ, تىڭداپ, جاقىن ماڭداعى ساياباققا جۇرەك ءدۇرسىلىمىزدى باسايىن دەپ شىعا بەرىپ ەدىم, كۇندە كورىپ جۇرگەن كوك كوز, سارى شاشتى جولاي دوس تارپا باس سالدى. «انە, پرەزيدەنتتىڭ ءوزى ايتتى, قازاق جانە ورىس تىلدەرىن قاتار مەڭگەرۋ كەرەك دەپ. سەندەر مەملەكەتتىك ءتىل دەپ ءسوزدى شىعىنداي بەرەسىڭدەر» دەپ القىمنان الدى. ءتىلىمدى تىستەپ قالدىم. سول جەرگە «قازاقستاندى مەكەندەۋشى ءاربىر ۇلتتىڭ وكىلى مەملەكەتتىك ءتىلدى بىلۋگە ءتيىس» دەگەن ءبىر سويلەم كەرەك-اق ەدى. ۇيدەن شىققان بەتتە كورپەمىزدى ءبولىپ جامىلعانداردىڭ كوزىمىزدى شۇقىپ تۇرعانىن قاراشى.
قازاق – كەڭ ءپىشىلىپ, قۇدايىنا قاراعان حالىق. ءتىلىمىزدى دە, جەرىمىزدى دە بىرەۋگە بەرىپ قويىپ, ەندى قاڭباق ءسوزدى قۋالاپ ءجۇرمىز. ءابىش كەكىلبايدىڭ «تاسباقانىڭ ءشوبى» دەگەن اڭگىمەسى ء«ساتى تۇسەيىن دەسە, ءبارى وڭىنان ورالا كەتەدى ەكەن» دەپ باستالادى. ءساتى ءتۇسىپ-اق تۇر, بىراق تاسباقا اياڭمەن اۋزىمىزداعى ءشوبىمىزدى ءالى الىپ كەلە جاتىرمىز. تاسباقا كورگەن جولاۋشىنىڭ جولى بولادى دەۋشى ەدى, قايران ابەكەڭ ونى الدەقاشان كورىپ, ومىردەن ءوتىپ كەتكەن جوق پا؟ بىزگە تاسباقا اياڭ ەمەس, قاسقىردىڭ جۇيتكۋى كەرەك. ايتپەسە قاناعاتشىل تاسباقانىڭ ءشوبىن جولدا الدەكىمدەر قاقشىپ كەتۋى كادىك. كەڭ كورپەمىزدى ءبىر جەلپىپ تاستايتىن كەز كەلدى. سوندا ءيىس-قوڭىستان ارىلار ەدىك. ىق جاقتان دا ىزعار سوعىپ تۇر. ساياباقتا دا جوندەپ سەرۋەندەي المايسىڭ. الدەكىمنەن ءسوز ەستىپ قالام با دەپ ءوز جەرىڭدە ءوزىڭ قۋىستانىپ جۇرەسىڭ...
جولداۋ – جاڭا ءومىردىڭ جارشىسى. جاڭعىرعان قازاقستاندا جاقسى ىستەرىمىز مول بولعاي!
قۋاندىق تۇمەنباي,
جازۋشى
