سۋرەتتى تۇسىرگەن – جۇماباي مۇسابەك
بىلتىر وڭىردە 412,8 مىڭ شارشى مەتر تۇرعىن ءۇي پايدالانۋعا بەرىلگەن. بۇل 2024 جىلمەن سالىستىرعاندا 11%-عا ارتىق. بيىل اۋداندا 60 پاتەردەن تۇراتىن ەكى كوپقاباتتى تۇرعىن ءۇي قولدانىسقا بەرىلدى.
جاڭا ۇيلەر سارقان اۋدانىنا قاراستى سارقان قالاسىنىڭ جاڭادان بوي كوتەرىپ كەلە جاتقان شاعىن اۋدانىندا ورنالاسقان. بەس قاباتتى تۇرعىن ۇيلەر زاماناۋي تالاپتارعا ساي سالىنىپ, تۇرعىنداردىڭ جايلى ءومىر سۇرۋىنە قاجەتتى بارلىق جاعداي قاراستىرىلعان. ۇيلەردە ءبىر, ەكى بولمەلى 30 پاتەر, سونداي-اق ءۇش بولمەلى, كەڭ ءارى جارىق 60 پاتەر بار. باسپانالار حالىقتىڭ الەۋمەتتىك وسال توپتارى ساناتىنا جاتاتىن ازاماتتارعا بەرىلدى. سالتاناتتى ءىس-شارا بارىسىندا جاڭا پاتەر يەلەرىنىڭ قۋانىشى مەن ريزاشىلىعى ەرەكشە سەزىلدى.
جالپى, سارقان اۋدانىندا تۇرعىن ءۇي قۇرىلىسى مۇنىمەن توقتاپ قالمايدى. اتالعان ەكى كوپقاباتتى ۇيدەن بولەك, اۋداننىڭ اۋىلدىق ەلدى مەكەندەرىندە 62 جەكە تۇرعىن ءۇي پايدالانۋعا بەرۋگە تولىق دايىن. بۇل باستامالار وڭىردە حالىقتىڭ ءومىر ءسۇرۋ ساپاسىن ارتتىرۋعا, الەۋمەتتىك تۇراقتىلىقتى قامتاماسىز ەتۋگە باعىتتالعان جۇمىستىڭ جۇيەلى تۇردە جۇرگىزىلىپ جاتقانىن كورسەتەدى.
وبلىس اكىمى ءباسپاسوز قىزمەتىنىڭ مالىمەتىنشە, وتكەن جىلى كەزەكتە تۇرعان 2166 ازاماتقا بەرىلۋگە ءتيىس تۇرعىن ۇيلەردىڭ قۇرىلىسى تىڭعىلىقتى جۇرگىزىلدى. سونىڭ 1002-ءسى بۇگىندە جاڭا قونىسقا كىرىپ تە ۇلگەردى. تۇرعىن ءۇيدى ءبولۋ ءراسىمى «وتباسى بانك» ارقىلى جۇزەگە استى.
سونداي-اق كەربۇلاق اۋدانىنىڭ سارىوزەك اۋىلىندا «سامۇرىق-قازىنا» ينۆەستيتسيالىق حولدينگىنىڭ قاراجاتى ەسەبىنەن سالىنعان 5 قاباتتى 60 پاتەرلى تۇرعىن ءۇي پايدالانۋعا بەرىلدى. قونىس يەلەرى قاتارىندا كوپبالالى, تولىق ەمەس وتباسىلار, مۇگەدەك بالالارى بار نەمەسە ولاردى تاربيەلەپ وتىرعان جانۇيالار, جەتىم بالالار مەن اتا-اناسىنىڭ قامقورلىعىنسىز قالعان جاستار, سونداي-اق مۇمكىندىگى شەكتەۋلى ازاماتتار بار. بۇل – مەملەكەت تاراپىنان كورسەتىلىپ وتىرعان ناقتى الەۋمەتتىك قولداۋدىڭ ايقىن كورىنىسى.
وسىلايشا, جەتىسۋ وبلىسىندا تۇرعىنداردى باسپانامەن قامتۋ باعىتىنداعى جۇيەلى جۇمىس ناقتى ناتيجەسىن بەرىپ كەلەدى. الەۋمەتتىك وسال ساناتتاعى ازاماتتارعا قولجەتىمدى ءارى جايلى تۇرعىن ءۇي ۇسىنۋ – ءوڭىردىڭ الەۋمەتتىك ساياساتىنىڭ باستى باسىمدىقتارىنىڭ ءبىرى.
جەتىسۋ وبلىسى
