سۋرەتتى تۇسىرگەن ەرلان ومار, «ەQ»
ەڭ اۋەلى سەزد حاتشىلىعىنىڭ باسشىسى ماۋلەن اشىمباەۆ قۇرمەتتى مەيماندارعا مونۋمەنتتىڭ ماڭىزدىلىعىن ايتىپ بەردى. ءاربىر ءدىن كوشباسشىسى ەككەن اعاش الەمدىك رۋحانياتقا ەگىلگەن ءبىر تال شىبىق بولىپ سانالماق. ەرەكشە ساياباق الداعى ۋاقىتتا تۋريستەر قىزىعا كەلەتىن دەمالىس ورنىنا اينالادى دەپ كۇتىلۋدە.
بۇگىندە كۇمبەز تۇرىندەگى ەسكەرتكىشتىڭ قاڭقاسى دايىن ەكەن. ونىڭ ورتاسىنا جاپىراقتى اعاش, ەمەن وتىرعىزىلعان. اعاش سپيرالمەن جانە ۇيلەسىمدى سۋبۇرقاقپەن قورشالماق. اۆتور يدەياسىنا سايكەس, عاسىرلار بويى تامىرى تەرەڭدە جاتقان سۋ مەن ءومىر اعاشى جەر بەتىندەگى تىرشىلىكتىڭ ناقتى بەينەسىن ايشىقتايدى. وسىلايشا, ينستاللياتسيا بارلىق كونفەسسيالاردىڭ كەلىسىمگە, بەيبىتشىلىك پەن دوستىققا شاقىرۋىن بىلدىرەدى. كۇمبەز ءوز كەزەگىندە ءبىر اسپان استىنداعى الەمدى بەينەلەيدى. وندا 4 نەگىزگى نۇكتەنى – وڭتۇستىك, سولتۇستىك, باتىس, شىعىستى بىلدىرەتىن 4 كىرۋ ايماعى بولماق.
كۇمبەز قابىرعالارىندا دۇنيەنىڭ جاراتىلۋىن, قازاقستان تاريحىنداعى وقيعالاردى كورسەتەتىن بەينەلەر, سونداي-اق قازىرگى زامانعا ۇندەۋ رەتىندە ەلىمىزدىڭ اۋماعىندا تابىلعان ايگىلى ەجەلگى جارتاس سۋرەتتەرى – پەتروگليفتەر سالىنادى. اعاشتىڭ اينالاسىنداعى سپيرال اسپاندى (كۇمبەزدى) جانە جەردى (سۋ بەتىن) بايلانىستىرادى, وسىلايشا الەمنىڭ نازىكتىگى تۋرالى يدەيانى جەتكىزەدى.
الەمدىك جانە ءداستۇرلى دىندەر ليدەرلەرىنىڭ VII سەزى دەلەگاتتارى اعاش ەگۋگە بەلسەندى اتسالىسىپ, ءوز ويلارىن ورتاعا سالدى.
– سەزد وتە جوعارى دەڭگەيدە ءوتتى. دۇنيە جۇزىندەگى ءتۇرلى ءدىن وكىلدەرىنىڭ باسىن بىرىكتىرگەن ءىس-شارانىڭ تاتۋلىققا ۇندەيتىنى بەلگىلى. سەزد شەڭبەرىندە اعاش ەگۋ يدەياسىنىڭ نازارعا الىنعانى قۋانتادى. سەبەبى بۇل – بەيبىتشىلىكتىڭ ءرامىزى. سۇيىكتى پايعامبارىمىزدىڭ (سالااللاھۋ əلəيھي ۋə سəللام): «كىمدە-كىم ءبىر اعاش وتىرعىزسا نەمەسە ءبىر نارسە ەكسە جانە ودان ءبىر قۇس, ءبىر ادام نەمەسە جانۋار جەسە, ول ادام ءۇشىن ساداقا بولىپ ەسەپتەلەدى», دەگەن ءحاديسى كوپ نارسەنى اڭعارتقانداي. الەمدە بەيبىتشىلىك بولسىن! – دەدى قىرعىزستان مۇسىلماندارى ءدىني باسقارماسىنىڭ توراعاسى زامير راكيەۆ.
