– بۇل – پاندەميادان كەيىن ءسىزدىڭ شەتەلگە العاشقى ساپارىڭىز. سوندىقتان وسى ساپارىڭىزدىڭ تاريحي ماعىناعا يە. مەن مۇنى جوعارى دەڭگەيدەگى ءوزارا سەنىم مەن ىنتىماقتاستىقتىڭ كورىنىسى دەپ باعالايمىن. بيىلعى 5 اقپاندا XXIV قىسقى وليمپيادا ويىندارىنىڭ اشىلۋ سالتاناتىنا قاتىسقانىمدى بىلەسىز. سول كەزدە بەيجىڭدە وتكەن كەزدەسۋىمىزدى ىقىلاسپەن ەسكە الامىن, – دەدى مەملەكەت باسشىسى.
كەزدەسۋدە قاسىم-جومارت توقاەۆ قازاقستان مەن قىتاي اراسىندا ديپلوماتيالىق قاتىناس ورناعانىنا 30 جىل تولعانىن اتاپ ءوتتى.
– ءسىزدىڭ ساپارىڭىز وسى مەرەيلى بەلەسكە تۇسپا-تۇس كەلىپ وتىر. قىسقا مەرزىم ىشىندە ءبىز تۇراقتى مەملەكەتارالىق قاتىناس ورناتتىق. ءسىز قازاقستان ەكونوميكاسىن دامىتۋعا جانە ءبىزدىڭ حالىقارالىق باستامالارىمىزعا ۇدايى قولداۋ كورسەتىپ كەلەسىز. سول ءۇشىن وزىڭىزگە زور العىس ايتامىن, – دەدى پرەزيدەنت.
قاسىم-جومارت توقاەۆتىڭ ايتۋىنشا, 2019 جىلعى قىركۇيەكتەگى بەيجىڭگە مەملەكەتتىك ساپارى كەزىندە قول جەتكىزىلگەن جان-جاقتى ماڭگىلىك ستراتەگيالىق سەرىكتەستىك جونىندەگى ۋاعدالاستىق ءساتتى جۇزەگە اسىرىلىپ جاتىر. بۇگىنگى بىرلەسكەن مالىمدەمە قارىم-قاتىناستاردىڭ جاڭا «التىن 30 جىلدىعىنىڭ» باستالعانىن بىلدىرەدى. سوندىقتان قىتاي توراعاسىنىڭ بۇل ساپارى اسا ماڭىزدى.
قحر توراعاسى اراعا جىل سالىپ قازاقستانعا قايتا كەلگەنىنە قۋانىشتى ەكەنىن ايتىپ, قازاق حالقىنىڭ قوناقجايلىعى مەن مەملەكەتتىك ساپارمەن كەلۋگە شاقىرعانى ءۇشىن پرەزيدەنتكە ريزاشىلىعىن ءبىلدىردى. سي تسزينپين قازاق-قىتاي قارىم-قاتىناستارىنىڭ دامۋىن جوعارى باعالاپ, بۇگىنگى ساپارىنىڭ ەكىجاقتى بايلانىستاردى ودان ءارى ىلگەرىلەتۋگە تىڭ سەرپىن بەرەتىنىن اتاپ ءوتتى. ونىڭ ايتۋىنشا, قىتاي وڭىرلىك جانە حالىقارالىق كۇن تارتىبىندەگى ماسەلەلەرگە قاتىستى قازاقستاننىڭ ۇستانىمدارىن قولدايدى.
– قازاقستان حالقى ءسىزدىڭ باسشىلىعىڭىزبەن مەملەكەتتىك قۇرىلىس پەن ۇلتتىق جاڭعىرۋ ىسىندە جاڭا تابىستارعا جەتەتىنى كۇمانسىز. قىتاي ۇكىمەتى قازاقستانمەن اراداعى قارىم-قاتىناستارعا زور كوڭىل بولەتىنىنە تاعى دا قايتالاپ ايتقىم كەلەدى. حالىقارالىق جاعداي قالاي وزگەرسە دە, ءبىز الداعى ۋاقىتتا قازاقستاننىڭ تاۋەلسىزدىگىن, ەگەمەندىگىن جانە تەرريتوريالىق تۇتاستىعىن ساقتاۋىنا قولداۋ كورسەتەمىز. تۇراقتىلىق پەن دامۋدى قامتاماسىز ەتۋ جونىندەگى ءسىز جۇرگىزىپ جاتقان رەفورمالاردى تولىق قولداي وتىرىپ, ءسىزدىڭ ەلىڭىزدىڭ ىشكى ىستەرىنە قانداي دا ءبىر كۇشتەردىڭ ارالاسۋىنا ءۇزىلدى-كەسىلدى قارسى بولامىز. قازاقستاننىڭ سەنىمدى دوسى جانە سەنىمدى سەرىكتەسى بولدى جانە بولىپ قالا بەرەدى. ديپلوماتيالىق قارىم-قاتىناستار ورناعالى بەرى قازاقستان مەن قىتاي اراسىنداعى بەرىكتىك سىنىنان لايىقتى وتكەن قارىم-قاتىناستار ۇنەمى جاڭا مازمۇنمەن تولىعىپ, دامۋمەن, جەمىسىن بەرىپ كەلەدى. ءبىزدىڭ ەلدەرىمىز بىرقاتار سالالارداعى ىنتىماقتاستىقتىڭ اۆانگاردىنا اينالدى. شەكارا ماسەلەلەرىن العاشقىلاردىڭ ءبىرى بولىپ شەشتىك. ء«بىر بەلدەۋ, ءبىر جول» باعدارلاماسى اياسىنداعى ىنتىماقتاستىق ۇلگىسىن كورسەتىپ, يندۋستريالاندىرۋ سالاسىنداعى حالىقارالىق ىنتىماقتاستىقتى العاشقىلاردىڭ ءبىرى بولىپ دامىتتىق. ءبىز ەكىجاقتى قارىم-قاتىناستاردى سەرپىندى دامۋعا قول جەتكىزىپ, قىتاي ديپلوماتياسىندا تەڭدەسى جوق ماڭگىلىك جان-جاقتى ستراتەگيالىق ارىپتەستىك دەڭگەيىنە شىعاردىق. بۇگىندە قازاقستان-قىتاي قارىم-قاتىناسى جاڭا تاريحي باستاۋ الدى, – دەدى سي تسزينپين.
تاراپتار كولىك-لوگيستيكا, ازىق-ت ۇلىك ونەركاسىبى, اۋىلشارۋاشىلىق سالالارىنىڭ ماسەلەلەرى جانە ترانسشەكارالىق وزەندەر جايىن تالقىلادى.
كەلىسسوزدەردەن كەيىن ەكى مەملەكەتتىڭ باسشىلارى قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى ديپلوماتيالىق قاتىناستاردىڭ ورناتىلعانىنا 30 جىل تولۋىنا وراي بىرلەسكەن مالىمدەمەگە قول قويىلدى.
