«قۇرمەتتى ءدىن ليدەرلەرى, قۇرمەتتى قوناقتار, حانىمدار مەن مىرزالار! قوناقجاي قازاق جەرىنە قوش كەلدىڭىزدەر! ءبىز ءۇشىن الەمدەگى ەڭ ىقپالدى كوشباسشىلاردى ەلوردادا جيناپ, ديالوگ جۇرگىزۋ ۇلكەن مارتەبە. قازاقستانعا العاش رەت مەملەكەتتىك ساپارمەن كەلگەن ۆاتيكان مەن كاتوليك شىركەۋىنىڭ باسشىسى ريم پاپاسى فرانتسيسككە ءوز قۇرمەتىمدى بىلدىرەمىن. ءسىز دىندەر مەن حالىقتار اراسىنداعى ءوزارا تۇسىنىستىكتى نىعايتۋعا زور ۇلەس قوستىڭىز.
مەن ەلىمىزگە ەجەلگى يسلام ۋنيۆەرسيتەتىنىڭ جوعارعى يمامى ءال-ازحاردىڭ قۇرمەتتى دوكتورى, شەيح احمەد ات-تايەبتىڭ كەلگەنىنە قۋانىشتىمىن. قازاق حالقى ءسىزدى قازىرگى مۇسىلمان الەمىنىڭ كورنەكتى قايراتكەرى رەتىندە باعالايدى. ءسىز ادامگەرشىلىك قۇندىلىقتاردى دارىپتەۋگە ولشەۋسىز ۇلەس قوستىڭىز», دەدى قاسىم-جومارت توقاەۆ فورۋمنىڭ اشىلۋىندا.
پرەزيدەنت سونداي-اق ورىس پراۆوسلاۆيە شىركەۋىنىڭ وكىلدەرىن دە قارسى الدى.
«مەن ورىس پراۆوسلاۆيە شىركەۋىنىڭ جوعارى وكىلدەرىن قارسى الۋعا قۋانىشتىمىن. پراۆوسلاۆ حريستياندارى قازاقستانداعى بىرلىك پەن كەلىسىمدى نىعايتۋعا قوماقتى ۇلەس قوسۋدا. مەن ماسكەۋ جانە بۇكىل رەسەي پاتريارحى كيريللمەن جاقىندا بولعان اڭگىمەمىزدى جىلى لەبىزبەن ەسكە الامىن, ول كونفەسسياارالىق ديالوگتى دامىتۋداعى ەلىمىزدىڭ كۇش-جىگەرىنە قولداۋ ءبىلدىردى. ءبىزدىڭ ارامىزدا ءيزرايلدىڭ اشكەنازي ءراۆۆينى دەۆيد لاۋ جانە سەفاردي ءراۆۆينى دجوزەف بار. ءبىز ەلىمىزدىڭ ەۆرەي قاۋىمداستىعىنىڭ وكىلدەرىمەن بىرگە بۇل ساپارعا ەرەكشە ءمان بەرەمىز. وسى شاقىرۋدى قابىلداپ, قازاقستانعا كەلگەنىڭىز ءۇشىن العىسىمدى بىلدىرەمىن. فورۋم قاتىسۋشىلارى الەمدە بەيبىتشىلىكتى ساقتاۋعا جانە وركەنيەتارالىق ديالوگتى نىعايتۋعا مۇددەلى», دەپ تۇيىندەدى مەملەكەت باسشىسى.
