بەسىنشى سىنىپتىڭ وزىندە ۇلكەن قالا ماسكەۋدى كورگەن ول سول ءساتىن, كەرەمەت ونەر تۋىندىلارىن كورگەندەگى قۋانىشىن بىلاي باياندايدى: «1979 جىلى اكەم مەنى ماسكەۋگە الىپ باردى. ترەتياكوۆ گالەرياسىنا اپاراتىن بولدى. مۋزەيگە كىردىك, ونداعى كارتينالاردى كورىپ, كوزىم شىعىپ كەتە جازدادى. ول كەزدە اۋىل بالاسى ۇزاسا كەي كارتينالاردى كىتاپتاردان كورەتىن شىعار, ال ء«تىرى» سۋرەتتەردى كورگەندە, ءوزىمدى ۇمىتتىم. سولاردىڭ ىشىندە يۆانوۆ دەيتىن ورىس سۋرەتشىسىنىڭ «يسا پايعامباردىڭ حالىققا كورىنۋى» دەيتىن تۋىندىسى بار ەدى, ول بۇل سۋرەتىن 24 جىل سالىپتى». ونەرگە, اسىرەسە كوركەمسۋرەت سالۋعا دەگەن قۇلشىنىس, اڭسار انە سول كەزدە شىنداپ وياندى.
ونىڭ «باقىت» اتتى كارتيناسىن تىنىش ءومىردىڭ, جايباراقات كوڭىل كۇيدىڭ تۋىندىسى دەر ەدىك. قىزىل كەرىشتى تاۋدىڭ بالاعىندا قامسىز جايىلىپ جۇرگەن ەكى ات باقىتتىڭ سيمۆولى رەتىندە بەينەلەنگەن. بۇل تۋىندىدا تاۋ ءوز ورنىندا, ال باسىنداعى مۇنار ءوز بەينەسىندە, ءتىپتى ەتەكتەگى قوس جىلقى دا ءوز كۇيىندە تۇر. شەبەر قولمەن سالىنعان كارتينا ءبىر قاراعاندا سىرىن بەرە قويمايتىنداي. ال ءۇڭىلىپ, تەرەڭىرەك كوز سالساڭىز, ءبارىن ايتىپ تۇرعان سياقتى. مۇنداعى تاۋ بەينەسى – تابيعاتتىڭ, كەرىش – كەڭ دالانىڭ, ال ات ءومىر تىنىسىن استارلاعانىن اڭداۋ كەرەك. سيقىرلى الەمگە تولى سۋرەت ونەرىنىڭ جان دۇنيەسىن ءتۇسىنۋ ءۇشىن دە وعان وي كوزىمەن قاراعان ءجون.
پەيزاج جانرىندا ءجيى قالام تەربەيتىن سۋرەتشى جامبىل ناتباەۆتىڭ تۋىندىلارىنىڭ كوبى تابيعاتپەن ەتەنە بايلانىستى. سان قىرىنا تەرەڭ بويلاساڭ تابيعات انانىڭ ءوزى ۇلكەن سۋرەتكەر ەمەس پە؟! ال ودان الۋ دا, وعان بەرۋ دە ۇلكەن ويدىڭ, سىرشىل جۇرەكتىڭ جۇمىسى. قىلقالام يەگەرىنىڭ «اساۋلار. سايرام اسۋى» اتتى كارتيناسى دا قازاقى ءومىردىڭ قالپىن كەنەپ بەتىندە سويلەپ بەرەدى. اساۋ, ويحوي, اساۋلار! كەڭ دالانىڭ توسىندە ويقاستاعان, جەلدەن جۇيرىك, قۇستان ۇشقىر دالا جىلقىلارى. ەندى ولاردىڭ بەينەسىن الاقانداي اق ماتانىڭ بەتىنە سالۋ قيىننىڭ قيىنى بولماق. ال سۋرەتشى ناتباەۆ بۇعان دا شەبەرلىگىن پايدالانىپتى. بۇل تۋىندىدا دا تاۋ, اسپان, بۇلت جانە جىلقى بار. وسى ءتورت ۇعىم ول ءۇشىن تىم قاستەرلى ەكەنىن كارتينالار ارقىلى سەزىنە الامىز. تاۋ ەتەگىندە تۇرعان كيىزۇي اتالعان تۋىندىنىڭ كوركىن اشقانداي. تىرشىلىكتىڭ قايناپ جاتقان كۇيى, ءومىر اعىسى ءبارى-ءبارى ءوز دەڭگەيىندە سىر شەرتكەنىن جاسىرمايمىز.
سۋرەتشىنىڭ بۇدان باسقا تۋىندىلارى دا «مەن تابيعات تۋرالىمىن» دەپ ايقايلاپ ايتىپ تۇرادى. مۇنىڭ سەبەبى جامبىل ناتباەۆ بالا جاسىنان اۋىل تىرلىگىن, ماڭعاز دالا, اساۋ جىلقىلار مەن اق شاڭقان كيىزۇيلەردى, مەيىرلى اۋىل ادامدارىن كورىپ وسكەندىگىندە.
قارشادايىنان كوكەيىنە جيعان قۇندىلىقتار ەسەيگەندە كوركەمسۋرەت بولىپ ويىنا ورالعانى شىندىق. تاۋداي اسقاق رۋح, بۇلتتاي اپپاق پەيىل, دالاداي كەڭ كوڭىل, جىلقىداي جۇيرىك قيال جامبىل ناتباەۆتىڭ شىعارماشىلىق الەمىن ودان ءارى بيىكتەتە ءتۇستى. ول ءۇشىن سۋرەت – دالا, دالا – سۋرەتتىڭ ءوزى.
