وبلىس اكىمى سەرىك شاپكەنوۆتىڭ تاپسىرماسىمەن اتىراۋ قالاسى مەن اۋدانداردا ارنايى شتابتار قۇرىلدى. شتاب وكىلدەرىنىڭ كومەگىمەن جينالعان ازىق-ت ۇلىك, كيىم-كەشەك, جەكە گيگيەنالىق قۇرالدار مەن توسەك-جابدىق تۇرىندەگى گۋمانيتارلىق كومەك 30 توننانى قۇرادى.
– قوستاناي وبلىسىنداعى دالا ءورتى قابىرعامىزدى قايىستىرماي قويمادى. مۇنداي قيىن سىناقتان جۇدىرىقتاي جۇمىلىپ, ءبىر ەل بولىپ وتە الامىز. قازىر قوستاناي وبلىسىنداعى Amanat پارتياسى فيليالىنىڭ باسشىسىمەن بايلانىس جاساپ وتىرمىز. زارداپ شەگۋشىلەرگە تىكەلەي قاراجات جىبەرگىسى كەلگەندەر ءۇشىن بانك شوتى اشىلدى, –دەيدى Amanat پارتياسى وبلىستىق فيليالىنىڭ اتقارۋشى حاتشىسى ابدوللا يدرەسوۆ.
ونىڭ ايتۋىنشا, كۇندەلىكتى تۇرمىستا قولدانىلاتىن زاتتار تيەلگەن العاشقى 10 جۇك كولىگى جولعا شىقتى. جاقىن كۇندەرى تاعى بىرنەشە كولىكپەن گۋمانيتارلىق كومەك جىبەرىلەدى. ارنايى قۇرىلعان شتاب قۇرامىندا «جاستار رۋحى» جاستار قاناتىنىڭ مۇشەلەرى دە بار. «ەرىكتىلەر دە قوستانايلىقتارمەن بىرگەمىز. كومەك كورسەتۋگە دايىنبىز», – دەيدى ەرىكتى زامانبەك قۇراقباي.
دالا ءورتىنىڭ سالدارىنان باسپاناسىنان ايىرىلعان قوستانايلىقتارعا كومەك كورسەتۋ ءۇشىن اتىراۋ وبلىسى بويىنشا ارنايى چات اشىلدى. جەرگىلىكتى ەرىكتى نۇرلان جوناسوۆتىڭ ايتۋىنشا, چاتقا قوسىلعان ازاماتتار اقشالاي جانە زاتتاي كومەك كورسەتۋگە دايىن ەكەنىن بىلدىرگەن.
ال «اتامەكەن» ۇكپ اتىراۋ فيليالىنىڭ ديرەكتورى نۇرلان سۇيىنباەۆتىڭ مالىمەتىنە سۇيەنسەك, جەرگىلىكتى كاسىپكەرلەر قوستاناي وبلىسىنىڭ تۇرعىندارىنا كومەك كورسەتۋگە بەلسەنە اتسالىسىپ وتىر. ءوڭىر كاسىپكەرلەرى تابيعي اپاتتان زارداپ شەككەن قوستانايلىقتار ءۇشىن 30 ملن تەڭگە جيناعان.
اتىراۋ وبلىسى
